malayal.am

ആത്മവഞ്ചനയുടെ ഗിരിപ്രഘോഷണങ്ങള്‍

Titto Joy — Thu, 01 Mar 2012 04:26:54 +0000

നൂറ്റൊന്നാവര്‍ത്തിക്കുന്ന നുണകള്‍ രണ്ടാംഭാഗം:

ചന്ദ്രപ്പനെ 'കമ്യൂണിസ്റ്റ് നേതാവ്' എന്നു വിശേഷിപ്പിക്കാന്‍ മാരീചന് ലജ്ജയുണ്ടത്രേ! പിന്നെ, സിപിഎം വളരുന്നതില്‍ അമര്‍ഷവും അസൂയയുമുള്ളവരാണത്രെ, സിപിഐക്കാര്‍. ആയതിനാല്‍ അവര്‍ സിപിഎമ്മിനെ തകര്‍ക്കാന്‍ കൂട്ടുനിക്കുന്നു... ആരോപണങ്ങള്‍ ഇങ്ങനെ പോകുന്നു.

സിപിഎമ്മിന്റെ ഇന്നത്തെ പല 'എമണ്ടന്‍' നേതാക്കളെക്കാള്‍ എന്തുകൊണ്ടും മികച്ച കമ്യൂണിസ്റ്റു തന്നെയാണ് ചന്ദ്രപ്പന്‍ . അതിനിപ്പോള്‍ മാരീചന്റെ സാക്ഷ്യപത്രത്തിന്റെ കുറവ് അങ്ങു സഹിച്ചു എന്നേ പറയാന്‍ കഴിയൂ. എന്റെ സഖാവേ, സിപിഎമ്മിന്റെ കരുത്തിനെ കുറച്ചുകണ്ട് ഒരു ഗുസ്തിമത്സരത്തിനു കൈകൊടുക്കാനല്ല സിപിഐ അതിന്റെ ഊര്‍ജ്ജം ചെലവാക്കുന്നത്. സിപിഎം വളരുകയും ഒപ്പമുള്ള സഹോദരപ്രസ്ഥാനങ്ങളെയും വളരാന്‍ അനുവദിക്കുകയുമാണ് വേണ്ടത്. അതിനു പകരം നാട്ടിലും വെര്‍ച്വല്‍ സ്പേസിലും തെറിയും ഗൂണ്ടായിസവുമല്ല വേണ്ടത്. ചന്ദ്രപ്പനെ തേജോവധം ചെയ്യുന്ന കൂട്ടത്തില്‍ 'ആടിനെ പട്ടിയാക്കുക, പിന്നെ പേപ്പട്ടിയാക്കുക, പിന്നീട് തല്ലിക്കൊല്ലുക' എന്ന 'വാചാടോപ ന്യായം അത്രയ്ക്കങ്ങ് വിലപ്പോകില്ല എന്നറിയുക.

"ശരിയെന്നു തോന്നുന്ന അഭിപ്രായങ്ങള്‍ തുറന്നു പറയാനുള്ള അവസരം ഏതു മാദ്ധ്യമം നല്‍കിയാലും അത് വിനിയോഗിക്കുന്നതില്‍ മറ്റുള്ളവര്‍ അസ്വസ്ഥരാകുന്നതില്‍ അര്‍ത്ഥമൊന്നുമില്ല. ഇത്തരം കാര്യങ്ങളില്‍ വ്യക്തിത്വവും ഐഡന്റിറ്റിയും നിലനിര്‍ത്തി അഭിപ്രായം പറഞ്ഞു വരുന്ന പാര്‍ട്ടിയാണ് സിപിഐ. അവ ഇടതുപക്ഷത്തിന്റെ ശാക്തീകരണത്തിനു വിരുദ്ധമാകാതിരിക്കാന്‍ സിപിഐ ശ്രദ്ധിക്കാറുണ്ട്. എന്നാല്‍ ഏതെങ്കിലും നേതാക്കളുടെ സ്ഥാപിത താല്‍പ്പര്യങ്ങളെ ഹനിക്കുന്നുണ്ടോ എന്നു വേവലാതിപ്പെടാറുമില്ല."

പിണറായി വിജയനെ സ്ഥാനഭ്രഷ്ടനാക്കാന്‍ വ്രതമെടുത്ത് കാവടി തുള്ളിയ 'യഥാര്‍ത്ഥ' കമ്മ്യൂണിസ്റ്റുകളുടെ കഥയില്‍ , സിപിഎമ്മിന്റെ ശിബിരത്തര്‍ക്കം പരിഹരിക്കാനുള്ള ബാധ്യത അവര്‍ക്ക് തന്നെ. ശക്തമായ സംഘടനാസംവിധാനമുള്ള സിപിഎമ്മിന്റെ സംസ്ഥാന സെക്രട്ടറിയെ മാറ്റാന്‍ സിപിഐ കൊതിച്ചു എന്നൊക്കെയുള്ള ആരോപണം "ഒരു ആര്‍എസ്‌പി അട്ടിമറികുറിപ്പിന്റെ" ഓര്‍മ്മയിലാകും തട്ടിമൂളിക്കുന്നത്. ശരിയെന്നു തോന്നുന്ന അഭിപ്രായങ്ങള്‍ തുറന്നു പറയാനുള്ള അവസരം ഏതു മാദ്ധ്യമം നല്‍കിയാലും അത് വിനിയോഗിക്കുന്നതില്‍ മറ്റുള്ളവര്‍ അസ്വസ്ഥരാകുന്നതില്‍ അര്‍ത്ഥമൊന്നുമില്ല. ഇത്തരം കാര്യങ്ങളില്‍ വ്യക്തിത്വവും ഐഡന്റിറ്റിയും നിലനിര്‍ത്തി അഭിപ്രായം പറഞ്ഞു വരുന്ന പാര്‍ട്ടിയാണ് സിപിഐ. അവ ഇടതുപക്ഷത്തിന്റെ ശാക്തീകരണത്തിനു വിരുദ്ധമാകാതിരിക്കാന്‍ സിപിഐ ശ്രദ്ധിക്കാറുണ്ട്. എന്നാല്‍ ഏതെങ്കിലും നേതാക്കളുടെ സ്ഥാപിത താല്‍പ്പര്യങ്ങളെ ഹനിക്കുന്നുണ്ടോ എന്നു വേവലാതിപ്പെടാറുമില്ല.

മാരീചന്റെ ലേഖനങ്ങളില്‍ നിറഞ്ഞുതുളുമ്പുന്നത് ഫ്യൂഡല്‍വിരുദ്ധ നാട്യങ്ങളൂം ഗീര്‍വ്വാണങ്ങളുമാണ്. പക്ഷെ ഇദ്ദേഹത്തിന്റെ ആക്ഷേപങ്ങളെ ഒന്നു ആഴത്തില്‍ വിശകലനം ചെയ്താല്‍ ആ മനോഭാവങ്ങളില്‍ത്തന്നെ ഫ്യൂഡല്‍ ട്രയിറ്റുകള്‍ ആവശ്യത്തിലധികം കാണാം. സഖ്യകക്ഷികളെ തങ്ങളുടെ വീടിന്റെ വടക്കേപ്പുറത്ത് കുഴികുത്തി 'കഞ്ഞിക്കു പാള' വെച്ചിരിക്കുന്ന അടിമകളായാണ് അദ്ദേഹം കാണുന്നത്. തമ്പ്രാനെതിരെ ഒന്നും പറയാന്‍ അവകാശമില്ലാത്ത അടിമകള്‍.

വ്യക്തിത്വവും സ്വന്തമായി അഭിപ്രായവുമുള്ള പല പാര്‍ട്ടികള്‍ ചേര്‍ന്നാണ് ഒരു മുന്നണി ഉണ്ടാവുക. രാഷ്ട്രീയമായ നിവര്‍ത്തികേടുകളില്‍ നിന്നു കൂടിയാണ് മുന്നണികള്‍ ഉണ്ടാകുന്നത്. അതു കൊണ്ട് തന്നെ ഒരു ത്യാഗിയും കുറേ പരാന്നഭോജികളും എന്ന നിരീക്ഷണം തന്നെ അബദ്ധജടിലവും യുക്തിഹീനവുമാണെന്നതിനു 1969 മുതല്‍ 79 വരെയുള്ള കാലഘട്ടം തന്നെ തെളിവും സാക്ഷിയും. യോജിക്കാവുന്ന മേഖലകളില്‍ യോജിക്കുമ്പോഴും വിയോജിപ്പിന്റെ മേഖലകള്‍ തുറന്നു പറയാന്‍ എല്ലാ ഘടകകക്ഷികള്‍ക്കും അവകാശമുണ്ട്. സ്വീകരിക്കാവുന്നത് മറ്റുള്ളവര്‍ക്ക് സ്വീകരിക്കാം, വിയോജിക്കുന്നതിനോട് വിയോജിക്കാം, അതിനെ തീക്ഷ്ണമായി വിമര്‍ശിക്കുകയും ചെയ്യാം. അങ്ങനെയൊക്കെയാണ് ജനാധിപത്യത്തിന്റെ ചക്രവാളം വികസിക്കുന്നത്.

ഒരു ജനാധിപത്യത്തില്‍ ഏകാധിപത്യത്തിന്റെ മുഷ്ക്ക് കൊണ്ട് എതിര്‍സ്വരങ്ങളെ ഇല്ലാതാക്കാന്‍ കഴിയുമെന്നത് ഫാസിസ്റ്റ് ചിന്താഗതിയാണ്. അതിനെ ഏത് സര്‍വ്വാധിപത്യമെന്ന് ഓമനപ്പേരിട്ടു വിളിച്ചാലും. ഇന്ത്യന്‍ അവസ്ഥകളെക്കുറിച്ച് ചന്ദ്രപ്പന്റെ നിരീക്ഷണങ്ങളില്‍ എതിരഭിപ്രായമുള്ളവര്‍ ഉണ്ടായിരിക്കും. പക്ഷെ അതിലെ യാഥാര്‍ത്ഥ്യബോധത്തെക്കുറിച്ച് കുറേക്കൂടി സത്യസന്ധമായ വിലയിരുത്തലുകള്‍ ആവശ്യമുണ്ട്. വര്‍ഗ്ഗപരിണാമങ്ങളെക്കുറിച്ചും മധ്യവര്‍ഗ്ഗത്തിന്റെ വളര്‍ച്ചയെക്കുറിച്ചും ഇന്ത്യയുടെ ജിയോ സോഷ്യോ പൊളിറ്റിക്കല്‍ പരിസരങ്ങളില്‍ ഒരു കാലത്തും സാധ്യമല്ലാത്ത ഒരു സായുധവിപ്‌ളവത്തെക്കുറിച്ചും ആത്മനിന്ദ തോന്നാത്ത വണ്ണം കുറേക്കൂടി സത്യസന്ധമായി സമീപിക്കേണ്ടതുണ്ട്.

മാരീചന്റെ തന്നെ ഉദാഹരണമൊന്നു പറിച്ചു നട്ടാല്‍ ചെത്തുകാരനായ മുണ്ടയില്‍ കോരനില്‍ നിന്നും വിദേശവിദ്യാഭ്യാസം സിദ്ധിച്ച മുണ്ടയില്‍ വിവേക് വിജയനിലേക്കുള്ള സാമൂഹികമാറ്റം കേരളത്തില്‍ തികച്ചും സാധാരണമായ ഒന്നാണ് (ആരെങ്കിലും, അത് സഖാവിന്റെ മകനായാലും, വിദേശ വിദ്യാഭ്യാസം നേടുന്നതൊന്നും ഒരു തെറ്റായി 'വലതുസ്വഭാവി'കള്‍ എന്നു മാരീചന്‍ പറയുന്ന സിപിഐക്കാര്‍ തെറ്റായി കാണുന്നില്ല. ആകെയുള്ള ആ മാറ്റം പോലെ തന്നെ അടിമ-ഉടമ വര്‍ഗ്ഗവിശകലനത്തിലും, ജാതി-മത സ്വാധീനതകളുടെ യാഥാര്‍ത്ഥ്യങ്ങളെ സംബന്ധിച്ച നിലപാടുകളിലും, ഗാന്ധിയന്‍ ചിന്തയുടെ അവശിഷ്ടങ്ങളിലും ഒക്കെ ഇഴചേരുന്ന ഇന്ത്യയിലെ സാഹചര്യങ്ങളെപ്പറ്റി കാലാനുസൃതമായ ചിന്തയും സംവാദവുമൊക്കെ ആവശ്യമാണ്‌).

മധ്യവര്‍ഗ്ഗത്തിന്റെ വളര്‍ച്ചയും ഇന്ത്യന്‍ സമൂഹത്തില്‍ അതിനുള്ള സ്വാധീനവും അവഗണിക്കാനാവില്ലെന്നു ചന്ദ്രപ്പന്‍ കരുതുന്നത് തികഞ്ഞ യാഥാര്‍ത്ഥ്യ ബോധത്തോടെയാണ്. (എച്ച്എസ്ബിസി ഉദ്യോഗസ്ഥനായ വിവേക് വിജയന്‍ വിപ്‌ളവത്തിന്റെ ഏത് കണ്ണിയിലാണ് അണിചേരുക എന്നൊക്കെ അറിയാന്‍ കൗതുകമുണ്ട്.) ദേശീയ ബൂര്‍ഷ്വാസി എന്നതിനെ 'പത്ത് ജന്‍പഥ്' എന്നു വായിക്കുന്നത് ആശയപരമായ ഹൃസ്വദൃഷ്ടി കൊണ്ട് മാത്രമാണ്. ജാര്‍ഗണുകളില്‍ ചേര്‍ത്തു വിളമ്പുന്ന സത്യസന്ധമല്ലാത്ത നിലപാടുകള്‍ പഴയ പോലെ ഇനിയും വിറ്റുപോകില്ല എന്നും മനസ്സിലാക്കണം.

ഭൂപരിഷ്ക്കാരത്തോടുള്ള മാരീചപ്രഭൃതികളുടെ ആത്മാര്‍ത്ഥതയ്ക്കുള്ള സാക്ഷ്യപത്രമായ ആര്‍‌ ബ്‌ളോക്ക് ഭൂമി തട്ടിപ്പിനെ കുറിച്ച് പറഞ്ഞു കൊണ്ട് ഈ ലേഖനം നിര്‍ത്താം. മാരീചന്‍ ഓര്‍ത്തോര്‍ത്ത് പുളകം കൊള്ളുന്ന ഭൂസമര പ്രഖ്യാപനം നടന്ന അറവുകാട് ഉള്‍പ്പെടുന്ന അമ്പലപ്പുഴ മണ്ഡലത്തില്‍പ്പെട്ട കുട്ടമംഗലത്താണ് ഇത് സംഭവിച്ചതെന്നത് കാലത്തിന്റെ ഒരു കുസൃതിയായിരിക്കാം.

ഭൂപരിഷ്ക്കാരത്തെ ഭര്‍ത്സിക്കാന്‍ മനോരമയും ഭൂപ്രഭുവര്‍ഗ്ഗവും നിരന്തരം ഉയര്‍ത്തുന്ന ഒരു വിമര്‍ശനമാണ് മുരിക്കന്റെ കായല്‍ നിലങ്ങള്‍ സംബന്ധിച്ചുള്ളത്. അടിസ്ഥാനമില്ലാത്ത മനോരമയുടെ ജല്‍പ്പനങ്ങള്‍ക്ക് കുറേയെങ്കിലും വിശ്വാസ്യത പകരാന്‍ ഉപകരിച്ചൂ, സിപിഎം നേതാക്കളൂടെ കാര്‍മ്മികത്വത്തില്‍ നടന്ന ആര്‍- ബ്‌ളോക്ക് ഭൂമി തട്ടിപ്പ്.

ഭൂപരിഷ്ക്കാരത്തിലൂടെ ഭൂരഹിതര്‍ക്ക് കിട്ടിയ ഭൂമിയാണ് ഉപജാപത്തിലൂടെ ടൂറിസം മാഫിയയുടെ കൈയിലെത്തിയത്. തിരുവഞ്ചൂരിനു ആളാകാനുള്ള ഒരു മഹനീയ അവസരം കൂടിയാണ് ഇതിലൂടെ നല്‍കപ്പെട്ടത്. നന്ദിഗ്രാമിന്റെയും സിംഗൂരിന്റെയും ഹാര്‍ദിയയുടെയും ഒരു ചെറു പതിപ്പ്. ഭൂമി നേടി തന്നവര്‍ തന്നെ കുടിയൊഴിപ്പിക്കലുകാരാകുന്ന സാമൂഹികദുരന്തം. അതു ഡൗ കെമിക്കല്‍സ് (ഭോപ്പാല്‍ ദുരന്തത്തിനുത്തരവാദികള്‍), സലിം ഗ്രൂപ്പ് (ഇന്തോനേഷ്യയില്‍ കമ്മ്യൂണിസ്റ്റ് വിരുദ്ധ മൂവ്‌മെന്റിനു ആളും അര്‍ത്ഥവും നല്‍കി സഹായിച്ചവര്‍) തുടങ്ങിയവര്‍ക്കാകുമ്പോള്‍ അമ്പരന്നിരിക്കുവാനേ നമ്മെ പോലുള്ള ചെറുകിട ബൂര്‍ഷ്വാസിയുടെ ആരാധകര്‍ക്ക് കഴിയുന്നുള്ളൂ.

ഒരു ജനപക്ഷമുന്നണിയായി നിലനില്‍ക്കാനും വികസിക്കുവാനും സിപിഎമ്മിനെപ്പോലെ ആഗ്രഹിക്കുന്നവരാണ് സിപിഐക്കാരും. എന്നാല്‍ പഴയ നാടുവാഴി/മാടമ്പി സമ്പ്രദായം അംഗീകരിച്ചു കൊടുക്കാന്‍ എല്ലായ്പ്പോഴും കഴിഞ്ഞെന്നു വരില്ല. പറയാനുള്ളതു പറഞ്ഞും മറ്റുള്ളവര്‍ക്കു പറയാനുള്ളത് സ്വീകരിച്ചും ഇടതു മുന്നണി മുന്നോട്ട് പോവും. ഫ്യൂഡല്‍ ഹാങ്ങോവറില്‍ പടിയടച്ച് പിണ്ഡം വെയ്ക്കാന്‍ നിയോഗിക്കപ്പെട്ട ഒരു തറവാട്ടു കാരണവരും ഈ മുന്നണിയില്‍ ഇല്ല.

ടിറ്റോ ജോയി

News Quotes

ശരിയെന്നു തോന്നുന്ന അഭിപ്രായങ്ങള്‍ തുറന്നു പറയാനുള്ള അവസരം ഏതു മാദ്ധ്യമം നല്‍കിയാലും അത് വിനിയോഗിക്കുന്നതില്‍ മറ്റുള്ളവര്‍ അസ്വസ്ഥരാകുന്നതില്‍ അര്‍ത്ഥമൊന്നുമില്ല. ഇത്തരം കാര്യങ്ങളില്‍ വ്യക്തിത്വവും ഐഡന്റിറ്റിയും നിലനിര്‍ത്തി അഭിപ്രായം പറഞ്ഞു വരുന്ന പാര്‍ട്ടിയാണ് സിപിഐ. അവ ഇടതുപക്ഷത്തിന്റെ ശാക്തീകരണത്തിനു വിരുദ്ധമാകാതിരിക്കാന്‍ സിപിഐ ശ്രദ്ധിക്കാറുണ്ട്. എന്നാല്‍ ഏതെങ്കിലും നേതാക്കളുടെ സ്ഥാപിത താല്‍പ്പര്യങ്ങളെ ഹനിക്കുന്നുണ്ടോ എന്നു വേവലാതിപ്പെടാറുമില്ല.

പിണറായി വിജയന്‍, സി കെ ചന്ദ്രപ്പന്‍

കേരളം

പീഡനവും മദ്യവും പിന്നെ റെയില്‍വെയും

Jiyad K M — Thu, 01 Mar 2012 02:13:45 +0000

വലിയ കുഴപ്പമൊന്നുമില്ലാതെ ട്രാക്കിലൂടെ ഓടിക്കൊണ്ടിരുന്ന ഇന്ത്യന്‍ റെയില്‍വേയില്‍ നിന്നും ഈയടുത്ത കാലത്തായി കേള്‍ക്കുന്നത് അപശ്രുതിയുടെ ചൂളംവിളികളാണ്. സൗമ്യയുടെ കൊലപാതകത്തിലൂടെ ചോദ്യം ചെയ്യപ്പെട്ട ട്രെയിനിലെ സ്ത്രീകളുടെ സുരക്ഷ ഇന്നും റെയില്‍വേ ട്രാക്ക് പോലെ നീണ്ടു പോകുന്നു. ഗോവിന്ദചാമിമാരെപ്പോലുള്ളവരില്‍ നിന്നും രക്ഷകരാവേണ്ട ടി.ടി. ഇ.മാര്‍ വേലി തന്നെ വിളവു തിന്നുന്ന അവസ്ഥയിലെത്തി എന്നതിന്റെ ഉദാഹരണങ്ങളാണ് ജയഗീത, ഹേമലത എന്നിവര്‍ക്ക് ഉണ്ടായ ദുരനഭവങ്ങള്‍ കാണിക്കുന്നത്.

എറണാകുളം കേന്ദ്രീകരിച്ച് ട്രെയിനില്‍ വളരെ സജീവമായി ഉണ്ടായിരുന്ന ഒരു ടി.ടി.ഇ കുട്ടികളെ പീഡിപ്പിച്ചതിന്റെ പേരില്‍ ഇപ്പോള്‍ ജയിലിലാണ്. ഗോവിന്ദച്ചാമിമാര്‍ പീഡനത്തിന് തെരുവും റെയില്‍വേ ട്രാക്കും തെരഞ്ഞെടുക്കുമ്പോള്‍ കോട്ടിട്ട ടി.ടി. ഇ.മാര്‍ ശീതീകരിച്ച മുറികള്‍ തെരഞ്ഞെടുക്കുന്നു എന്നതാണ് ഒരേയൊരു വ്യത്യാസം. പീഡനത്തിന് ജാതിയും മതവും തൊഴിലും സ്ഥലവും ഒന്നും ബാധകമല്ല എന്നാ സാമാന്യ തത്വത്തിലേക്കാണ് കേരളം നടന്നു പോയിക്കൊണ്ടിരിക്കുന്നത്.

"എല്ലാ മദ്യപാനികളും പ്രശ്നക്കാരാണ് എന്ന മുന്‍വിധിയോടെയാണ് റെയില്‍വേ ഈ പ്രശ്നത്തെ കൈകാര്യം ചെയ്യുന്നത്. ഒറ്റക്കയ്യനായ ഒരാള്‍ ട്രെയിനില്‍ ഒരു പെണ്‍കുട്ടിയെ പീഡിപ്പിക്കുമ്പോള്‍ പരിഹാരമായി കൂടുതല്‍ സുരക്ഷ ഉറപ്പു വരുത്തുന്നതിന് പകരം എല്ലാ ഒറ്റക്കയ്യന്മാരെയും നിരോധിക്കുക എന്ന് എളുപ്പ വഴിയില്‍ ക്രിയ ചെയ്യുന്നത് പോലെ അപകടകരമാണ് ഈ നടപടിയും. പ്രശ്നക്കാരെല്ലാം മദ്യപരാണെന്നു വരുത്തിത്തീര്‍ക്കുമ്പോള്‍ മദ്യപരല്ലാത്ത പ്രശ്നക്കാര്‍ റെയില്‍വേ ഗേറ്റിലൂടെ അനായാസം രക്ഷപെടുന്നു. "

തുടര്‍ന്നു വരുന്ന ഇത്തരം ട്രെയിന്‍ പീഡന കഥകള്‍ റെയില്‍വേ അധികാരികളെ അല്പം അസ്വസ്തമാക്കിയിരിക്കണം. റെയില്‍വേക്കെതിരെ ഉയരുന്ന ജനരോഷത്തില്‍ നിന്നും രക്ഷപെടാന്‍ അവര്‍ കണ്ട എളുപ്പവഴിയാണ് മദ്യപാനം നിരോധിക്കുക എന്നത്. അതായത് ഈ എല്ലാ പ്രശ്നങ്ങള്‍ക്കും കാരണം മദ്യപര്‍ ആണെന്നൊരു സാമാന്യ തത്വം അവതരിപ്പിക്കുകയും മദ്യപരെ റെയില്‍വേയുടെ മേഖലകളില്‍ നിന്നും അകറ്റുകയും ചെയ്ത് കയ്യടി വാങ്ങാനുള്ള എളുപ്പവഴിയാണ് റെയില്‍വേ ചെയ്യുന്നത്.

എല്ലാ മദ്യപാനികളും പ്രശ്നക്കാരാണ് എന്ന മുന്‍വിധിയോടെയാണ് റെയില്‍വേ ഈ പ്രശ്നത്തെ കൈകാര്യം ചെയ്യുന്നത്. ഒറ്റക്കയ്യനായ ഒരാള്‍ ട്രെയിനില്‍ ഒരു പെണ്‍കുട്ടിയെ പീഡിപ്പിക്കുമ്പോള്‍ പരിഹാരമായി കൂടുതല്‍ സുരക്ഷ ഉറപ്പു വരുത്തുന്നതിന് പകരം എല്ലാ ഒറ്റക്കയ്യന്മാരെയും നിരോധിക്കുക എന്ന് എളുപ്പ വഴിയില്‍ ക്രിയ ചെയ്യുന്നത് പോലെ അപകടകരമാണ് ഈ നടപടിയും. പ്രശ്നക്കാരെല്ലാം മദ്യപരാണെന്നു വരുത്തിത്തീര്‍ക്കുമ്പോള്‍ മദ്യപരല്ലാത്ത പ്രശ്നക്കാര്‍ റെയില്‍വേ ഗേറ്റിലൂടെ അനായാസം രക്ഷപെടുന്നു.

സര്‍ക്കാര്‍ തന്നെ മദ്യം വില്‍ക്കുന്ന ഒരു സംസ്ഥാനമാണ് കേരളം. മദ്യപര്‍ കൊടുക്കുന്ന നികുതി കൊണ്ടാണ് നമ്മുടെ സംസ്ഥാനം നിലനില്‍ക്കുന്നതെന്ന് പറഞ്ഞാലും അതില്‍ അതിശയോക്തിയില്ല. ഒരാള്‍ക്ക് മദ്യം വാങ്ങാനും കുടിക്കാനും നിശ്ചിത അളവ് കയ്യില്‍ വക്കാനും നമ്മുടെ നിയമം അനുമതി നല്‍കുന്നുമുണ്ട്. മദ്യപിച്ച് വാഹനം ഓടിക്കുന്നത് മാത്രമാണ് കുറ്റകരമായുള്ളത്.

അതായത് ഒരാള്‍ക്ക് മദ്യം കഴിച്ചു കൊണ്ട് മറ്റുള്ളവര്‍ക്ക് ശല്യമാകാത്ത തരത്തില്‍ യാത്ര ചെയ്യുന്നതിന് നിയമം പരിരക്ഷ നല്‍കുന്നുണ്ട്. ഈ സാഹചര്യമാണ് റെയില്‍വേ ഇല്ലാതെയാക്കുന്നത്. ഒരാള്‍ മദ്യപിച്ചു എന്ന് കരുതി മാത്രം അയാള്‍ ഒരു കുറ്റവാളിയാണെന്ന് എങ്ങനെ നമുക്ക് പറയുവാന്‍ കഴിയും? ഇതിനേക്കാള്‍ ഭീകരമായ അവസ്ഥയാണ് ഈ മദ്യപരിശോധനയുടെ പേരില്‍ സാധാരണ യാത്രക്കാര്‍ക്ക് ഏല്‍ക്കേണ്ടി വരുന്ന പരിശോധനാ പീഡനങ്ങള്‍. എപ്പോള്‍ വേണേലും പ്ലാറ്റ്ഫോമില്‍ പരിശോധിക്കപ്പെടാം എന്ന സ്ഥിതിവിശേഷമുണ്ടാവുകയും യാത്രക്കാര്‍ അപമാനിക്കപ്പെടുകയും യാത്ര മുടങ്ങുകയും കള്ളക്കേസുകള്‍ ഉണ്ടാക്കപ്പെടുകയും ചെയ്തേക്കാം.

ഏറ്റവും രസകരമായ കാര്യം ഈ നിയമം കേരളത്തില്‍ മാത്രമാണ് ബാധകം എന്നതാണ്. അതായത് കോയമ്പത്തൂരില്‍ നിന്നും മദ്യപിച്ച് ട്രെയിനില്‍ കയറുന്ന ഒരാള്‍ ഒരു കുറ്റകൃത്യവും ചെയ്യാതെ തന്നെ പാലക്കാട് സ്റ്റേഷനില്‍ വച്ച് അറസ്റ്റ് ചെയ്യപ്പെട്ടേക്കാം. ഇതുവരെ കേരളത്തിന്‌ ഒരു സോണ്‍ അനുവദിക്കാത്ത ഇന്ത്യന്‍ റെയില്‍വേ കേരളത്തിന്‌ മാത്രമായി ഒരു നിയമം നടപ്പാക്കി എന്നതില്‍ റെയില്‍വേക്ക് അഭിമാനിക്കാം.

മദ്യപരെ റെയില്‍വേ വിലക്കുമ്പോള്‍തന്നെ റെയില്‍വേയുടെ ടി.ടി.ഇ.മാര്‍ ഉള്‍പ്പെടെയുള്ള പല തൊഴിലാളികളും ഡ്യൂട്ടി സമയത്ത് തന്നെ മദ്യപിക്കുന്നത് സര്‍വസാധാരണമാണ്. ഇവര്‍ക്കൊന്നും ഈ നിയമം ബാധാകമാവുകയുമില്ല. അഥവാ പിടിക്കപ്പെട്ടാല്‍ തന്നെ ഇവരെ വിചാരണ ചെയ്യുന്നത് റെയില്‍വേയുടെ വിഭാഗങ്ങള്‍ തന്നെയാണ്. സഹമദ്യപരെ രക്ഷപെടുത്താനുള്ള വഴി തേടിക്കൊണ്ട് ഇവര്‍ക്ക് പച്ചക്കൊടി കാട്ടുക തന്നെ ചെയ്യും.

യഥാര്‍ത്ഥത്തില്‍ യാത്രികരുടെ സുരക്ഷയാണ് റെയില്‍വേ ഉന്നം വെക്കുന്നതെങ്കില്‍ കൂടുതല്‍ സുരക്ഷാ ഉദ്യോഗസ്ഥരെ ട്രെയിനുകളില്‍ വിന്യസിക്കുകയാണ് വേണ്ടത്. കൂടാതെ സ്ത്രീകളുടെ സുരക്ഷ വര്‍ധിപ്പിക്കാനുള്ള നിര്‍ദേശങ്ങളും പ്രാവര്‍ത്തികമാക്കേണ്ടതുണ്ട്. ലേഡീസ് കംപാര്‍ട്ട്മെന്റ് മധ്യത്തില്‍ ആക്കുക, എക്സ്‌പ്രസ്സ്‌ ട്രെയിനുകളിലേത് പോലെ ബോഗികള്‍ പരസ്പരം ബന്ധിപ്പിക്കുക, അതിലൂടെ ലേഡീസ് കംപാര്‍ട്ട്മെന്റ് ഒറ്റപ്പെട്ടുകിടക്കുന്ന അവസ്ഥ ഒഴിവാക്കുക എന്നിങ്ങനെ അനേകം നിര്‍ദ്ദേശങ്ങള്‍ പാലിച്ചു കൊണ്ട് സുരക്ഷ വര്‍ധിപ്പിക്കാവുന്നതാണ്. അതൊന്നും ചെയ്യാതെ മദ്യപരെ നിരോധിച്ചു കൊണ്ടുള്ള പുകമറയിലൂടെ സുരക്ഷയെ സംബധിച്ചുള്ള ചോദ്യങ്ങളില്‍ നിന്നും റെയില്‍വേ ഒഴിഞ്ഞു മാറുകയാണ് ചെയ്യുന്നത്.

റെയില്‍വേയുടെ ഈ നിയമത്തെ പിന്‍പറ്റി നാളെ കെഎസ്ആര്‍ടിസിയും ഇതേപോലെ ഒരു നിയമം പാസ്സാക്കിയേക്കാം. മദ്യം വില്‍ക്കാം, വാങ്ങാം, കഴിക്കാം പക്ഷെ മദ്യപിച്ച് യാത്ര ചെയ്യരുത് എന്ന് മാത്രം നിയമം ഉണ്ടാകുന്നത് ഏത് അര്‍ഥത്തിലും ശരിയായ നടപടിയല്ല. റെയില്‍വേയുടെ ഈ വിചിത്ര നടപടിയില്‍ കേരള സര്‍ക്കാര്‍ പാലിക്കുന്ന മൌനം ആരെ തൃപ്തിപ്പെടുത്തുവാനാണ് എന്ന് വിശദീകരിക്കേണ്ടതുണ്ട്. മദ്യപരെല്ലാം പ്രശ്നക്കാര്‍ എന്നതാണ് ഭരണക്കാരുടെ വാദമെങ്കില്‍ കേരളത്തില്‍ മദ്യം നിരോധിക്കാനുള്ള ആര്‍ജവമാണ് കാണിക്കേണ്ടത്.

വാല്‍ക്കഷണം : മദ്യം വില്‍ക്കരുത് കൊടുക്കരുത് കുടിക്കരുത് - ശ്രീ നാരായണ ഗുരു

മദ്യം വില്‍ക്കാം കൊടുക്കാം വാങ്ങാം പക്ഷെ മദ്യപിച്ച് യാത്ര ചെയ്യരുത് - റെയില്‍വേ

ജിയാദ് കെ എം

News Quotes

നിരീക്ഷണം

ഗോക്രിത്തരങ്ങള്‍

Saji Markose — Wed, 29 Feb 2012 07:44:51 +0000

അന്ത്യ കാലത്ത് ചില ഉഗ്രന്മാര്‍ പുറത്തു വരും എന്നു യേശു പ്രവചിച്ചിരുന്നു. എന്നാല്‍ യേശുവിനെപ്പോലും അമ്പരിപ്പിക്കുന്ന ചില അത്യുഗ്രന്മാര്‍ ശാസ്ത്രജ്ഞന്മാരുടെ രൂപത്തില്‍ കേരളത്തില്‍ അവതരിച്ചിരിക്കുന്നു.

സാധാരണ ജനങ്ങള്‍ക്ക് അപ്രാപ്യമായ വേദസംസ്കൃതത്തെ ഭാവനയ്ക്കനുസരിച്ച് വ്യാഖ്യാനിച്ച് 'കര്‍ണ്ണരസമാകുമാറ്' അവതരിപ്പിച്ച് കേള്‍വിക്കാരെ അമ്പരപ്പിക്കുന്ന വിദ്യയാണ് അടുത്ത കാലം വരെ ഇന്‍ഡ്യന്‍ ഇന്‍സ്റ്റിറ്റ്യൂട്ട് ഓഫ് സയന്റിഫിക്‍ ഹെറിറ്റേജിന്റെ ജീവാത്മാവും പരമാത്മാവുമായ ഡോ. എന്‍ ഗോപാലകൃഷ്ണന്‍ (ഓണ്‍ലൈന്‍ ലോകത്ത് ഗോക്രി എന്ന പരിഹാസപ്പേരിലും ഇദ്ദേഹം അറിയപ്പെടുന്നു) നടത്തിയിരുന്നത്. വര്‍ണ്ണവെറി രഹസ്യമായി മനസില്‍ കൊണ്ടു നടന്നിരുന്ന എല്ലാ മേല്‍ജാതിക്കാര്‍ക്കും സുഖിക്കുന്ന സന്ദേശങ്ങള്‍ വിളമ്പി, ഒരു പരിഷ്കൃത സമൂഹത്തിന്റെ യുക്തിബോധത്തെ നാലായിരം വര്‍ഷം പിന്നില്‍ കൊണ്ടുപോയി ഏതൊക്കെയോ പര്‍ണ്ണശാലയില്‍ കെട്ടിയിടാന്‍ ശ്രീമാന്‍ ഗോപാലകൃഷ്ണന്‍ ഊരു ചുറ്റുകയാണ്. അഹങ്കാരത്തിന്റേയും പരപുച്ഛത്തിന്റേയും ആള്‍രൂപമായ മാന്യദേഹത്തിനു കൃത്യമായ മറുപടി കൊടുക്കുവാന്‍, ഉമേഷ്, ഡോ സൂരജ്, കാല്‍വിന്‍ തുടങ്ങിയവന്‍ ബ്ലോഗിലൂടെ ശ്രമിച്ചപ്പോള്‍ അവരെ നായ്ക്കളെന്നു വിളിച്ച് അധിക്ഷേപിച്ച് വിമര്‍ശന വിധേയമായ അദ്ദേഹത്തിന്റെ പ്രസംഗങ്ങളെല്ലാം യൂ ട്യൂബില്‍ നിന്നും നീക്കം ചെയ്യുകയാണുണ്ടായത്.

ശാസ്ത്രത്തിന്റെ നേട്ടങ്ങളെല്ലാം പണ്ടു മുനിമാര്‍ കണ്ടു പിടിച്ചിരുന്നുവെന്ന പൊട്ടവാദത്തെ പ്രത്യക്ഷരം ഖണ്ഡിക്കുന്ന ലേഖനങ്ങള്‍ ഉമേഷിന്റെ "ഗുരുകലം" എന്ന ബ്ലോഗില്‍ ഇപ്പോഴും ലഭ്യമാണ്. ഇന്നു വരെ ഈ ലേഖനങ്ങള്‍ക്കു ഒരു മറുപടി അദ്ദേഹം പറഞ്ഞിട്ടില്ല.

ചില വര്‍ഷങ്ങള്‍ക്കു മുന്‍പ് ബഹറിനിലെ ഒരു വേദിയില്‍ അദ്ദേഹം പതിവുപോലെ കൃത്രിമ വിനയത്തോടെ പറഞ്ഞു,

"പൗരാണീക ഭാരതീയ വിജ്ഞാന ശാഖയില്‍ എന്നെ അമ്പരപ്പിച്ച ഒരു കാര്യം ക്രിപ്റ്റോളജിയുടെ ഉപയോഗമാണ്. അക്ഷരങ്ങളെ ചില പ്രത്യേക ഗണിത ശാസ്ത്ര സങ്കേതങ്ങള്‍ ഉപയോഗിച്ച് അക്കങ്ങളാക്കി മാറ്റുന്ന രീതി ആണിത്. അതിന് കടപയാദി എന്നാണ് ചുരുക്കപ്പേര്‍"

പൊതുജനം അമ്പരന്നിരിക്കുകയണ്. കടപയാദിയേക്കുറിച്ചു കേട്ടതുകൊണ്ടല്ല, ഗോക്രിയുടെ വിജ്ഞാനത്തിന്റെ വൈപുല്യം ഓര്‍ത്തിട്ട്. പെട്ടെന്നു സാംസ്ക്കാരിക പ്രവര്‍ത്തകനായ ശ്രീ. പി.ടി. തോമസ് എഴുന്നേറ്റ് പറഞ്ഞു,

"ഡോക്‌ട്ടറേ, കടപയാദി ഉണ്ടായിടത്തു തന്നെ ഇന്നും നില്‍ക്കുമ്പോള്‍ പാശ്ചാത്യ ക്രിപ്റ്റോളജി അനേക കാതം മുന്നോട്ടു പോയ വിവരം താങ്കള്‍ക്ക് അറിയില്ലേ? മാത്രമല്ല, കര്‍ണ്ണാടക സംഗീതം പഠിക്കുന്ന വിദ്യാര്‍ത്ഥികള്‍ ഓരോ രാഗങ്ങളുടെ സ്വരങ്ങള്‍ കണ്ടു പിടിക്കാന്‍ കടപയാദിയാണ് ഉപയോഗിക്കുന്നത്. രാഗങ്ങളുടെ പേരുകളില്‍ സൗകര്യപൂര്‍വ്വം വാക്കുകള്‍ കൂട്ടി ചേര്‍ത്ത് ഒപ്പിച്ചെടുക്കുന്ന പരിപാടിയാണ് അത്, അല്ലാതെ അതില്‍ ശാസ്ത്രീയത ഒന്നും ഇല്ല."

മലപോലെ കൊണ്ടുവന്നത് എലിപോലെ ആകുന്നത് കണ്ട് അദ്ദേഹം അന്നു ഒരു നിമിഷം പകച്ചതോര്‍ക്കുന്നു. സാധാരണ വേദികളില്‍ നിന്നും വരുന്ന പ്രതികരണങ്ങള്‍ക്കു മറുപടിയായി പ്രതികരിച്ചവരെ വിഡ്ഢിയാക്കുന്ന പ്രവണതയാണ് ഗോപാലകൃഷ്ണന്റേത്. സദസ്യര്‍ക്കു അജ്ഞമായതും എന്നാല്‍ തികച്ചും അപ്രധാനവുമായ വിഷയങ്ങളെ വന്‍കാര്യങ്ങളായി ചിത്രീകരിച്ച് കൈയടി നേടുകയാണ് ശ്രീമാന്‍. ഭാരതത്തിന്റെ പൗരാണികതയോ പ്രായോഗിക ജീവിതത്തിലെ അതിന്റെ പ്രസക്തിയോ ഒന്നും അല്ല അദ്ദേഹത്തിന്റെ ഉന്നം. ഇതിന്റെയെല്ലാം അടിയിലൂടെ തന്റെ ജീര്‍ണ്ണിച്ച വിജ്ഞാനഭാണ്ഡം തുറന്ന് താന്‍ ഒരു സംഭവമാണെന്നു വരുത്തി തീര്‍ക്കുന്ന വേദികളാണ് അദ്ദേഹത്തിന്റെ സമ്മേളന മഹാമഹങ്ങള്‍.

എന്നാല്‍ ഇപ്പോള്‍ ഗോപാലകൃഷ്ണന്‍ അവിടെ നിന്നും ഒരു പടി കൂടി മുന്നോട്ടു പോയിരിക്കുന്നു. മറ്റു മതഗ്രന്ഥങ്ങളെ വികൃതമായി വ്യാഖ്യാനിച്ച് പച്ചക്കള്ളം പ്രചരിപ്പിക്കുന്ന തരത്തിലേയ്ക്ക് അദ്ദേഹം "ഉയര്‍ന്നിരിക്കുന്നു". പക്ഷേ, ഈ ദുര്‍വ്യാഖ്യാനങ്ങളുടേയും കള്ള പ്രചരണത്തിന്റേയും ഇടയിലൂടെ മതവൈര്യവും വര്‍ഗ്ഗീയതയും പ്രചരിപ്പിക്കുവാന്‍ ശ്രമിക്കുന്നു എന്നതുകൊണ്ടാണ് ഈ കുറിപ്പ് എഴുതുന്നത്.

ഇപ്പോള്‍ യൂട്യൂബിലൂടെ iishtv പ്രചരിപ്പിക്കുന്ന മുക്കാല്‍ മണിക്കൂര്‍ ദൈര്‍ഘ്യം വരുന്ന രണ്ടു വീഡിയോകളില്‍ ( ഏതു നിമിഷവും അപ്രത്യക്ഷമാകാം) ക്രിസ്തുവിന്റെ ഉപദേശങ്ങളും കൃസ്ത്യാനികളുടെ വിശ്വാസവും ആണ് വിഷയങ്ങള്‍. ക്രിസ്ത്യാനികള്‍ സ്വന്തം മക്കളെക്കൊണ്ട് ഹിന്ദുക്കളെ പ്രേമിപ്പിച്ചു മതം മാറ്റുന്നു പോലും! ലൗ ജിഹാദിന്റെ കോലാഹങ്ങള്‍ അവസാനിച്ചു വരുന്നതേയുള്ളൂ, അപ്പോഴേയ്ക്കും അടുത്ത വെടി മരുന്നിനു തീ കൊളുത്തുകയണ് ശാസ്ത്ര-അജ്ഞന്‍.

"ഉള്ളില്‍ സര്‍പ്പത്തിന്റെ വിഷവും പുറത്തു മാടപ്രാവിന്റെ ലാളിത്യവുമായി ഞാന്‍ നിങ്ങളെ ജനങ്ങള്‍ക്കിടെ അയക്കുന്നു" എന്ന് യേശു ക്രിസ്തു പറഞ്ഞിരിക്കുന്നു എന്നാണ് ഒന്നാമത്തെ വീഡിയോയിലെ അദ്ദേഹത്തിന്റെ വാദം. അങ്ങിനെ യേശു പറഞ്ഞിട്ടില്ല എന്ന് അദ്ദേഹത്തിനു നന്നായി അറിയാം. പിന്നെ എന്തിനാണ് ഈ വിഷം പാവപ്പെട്ട ഹിന്ദുക്കളുടെ ഉള്ളിലേയ്ക്കു കുത്തിവയ്ക്കുന്നത്?

"ഞാന്‍ ചെന്നായ്ക്കളുടെ ഇടയിലേയ്ക്ക് ആടുകളെ എന്നപോലെ അയക്കുന്നു. അതുകൊണ്ട് നിങ്ങള്‍ പാമ്പിനേപ്പോലെ വിവേകമുള്ളവരും പ്രാവിനേപ്പോലെ നിഷ്കളങ്കരും ആയിരിപ്പീന്‍" ( മത്താ. 10: 16)

എന്നാണ് യേശു ശിഷ്യന്മാരോട് പറഞ്ഞത്. ഇത് ശാസ്ത്രജ്ഞന്‍ വ്യാഖ്യാനിച്ചപ്പോള്‍ വന്ന മാറ്റം ശ്രദ്ധിക്കുക. അതാണ് ഗോക്രീ വ്യാഖ്യാന രീതി.

യേശുവിനെ ഒരു വിപ്ലവകാരിയോ, ഗുരുവോ, നേതാവോ ഒക്കെയായി പലരും ചിത്രീകരിക്കാറുണ്ട്. എന്നാല്‍ ക്രിസ്ത്യാനികളെ സംബന്ധിച്ച് യേശു രക്ഷകനാണ്. ക്രിസ്ത്യാനികളെ പരമാവധി പ്രകോപിപ്പിക്കുന്നതിനു രക്ഷകന്‍ ആശയത്തെ തന്നെയാണ് ഗോപാലകൃഷ്ണന്‍ മനഃപൂര്‍വ്വം ആക്രമിക്കുന്നതും. യേശു ഒരു രക്ഷകനാണെങ്കില്‍ എന്തു കൊണ്ട് സ്വയം ക്രൂശില്‍ നിന്നും ഇറങ്ങി വന്നില്ല എന്ന ബുദ്ധിപരമായ ചോദ്യം കേള്‍ക്കുമ്പോള്‍ ശ്രോതാക്കള്‍ ഗോപാലകൃഷ്ണന്റെ യുക്തിബോധത്തെ പുകഴ്ത്താതിരിക്കില്ല. എന്നാല്‍ 2000 വര്‍ഷം മുന്‍പ് ക്രിസ്തുവിനെ കുരിശില്‍ തറച്ച പടയാളിയും ഇതേ ചോദ്യം ചോദിച്ചിരുന്നു എന്ന് ബൈബിള്‍ വായിക്കുന്നവര്‍ക്കല്ലേ അറിയൂ.

പ്രസംഗം പുരോഗമിക്കുമ്പോള്‍ യഹോവയെ ബിന്‍ലാദനുമായി സാമ്യപ്പെടുത്തി രസിക്കുകയാണ് ശ്രീ ഗോപാലകൃഷ്ണന്‍. ഒരു വലിയ സമൂഹം ആരാധിക്കുന്ന 'ദൈവപുത്ര'നെ നികൃഷ്ടനായ ഒരു തീവ്രവാദിയുമായി താരതമ്യം ചെയ്യുന്ന രോഗാതുരമായ ആ മനസിനെ ചികിത്സിക്കേണ്ടതുണ്ട്. ഹിന്ദുക്കള്‍ക്ക് ഹിന്ദുക്കളുടെ കപ്പില്‍ ബൈബിള്‍ എന്ന വിഷം കൊടുക്കുകയാണ് എന്നു നിരീക്ഷിച്ചു അദ്ദേഹം ഒന്നാമത്തെ പ്രസംഗം അവസാനിപ്പിക്കുകയാണ്.

ഈ പുലയാട്ടിനെ ബഹുഭൂരിപക്ഷം ഹൈന്ദവരും അവഗണിക്കും. പക്ഷേ, അദ്ദേഹം വിതയ്ക്കുന്ന വിഷവിത്തില്‍ ചിലതെങ്കിലും നാളെ ഈ നാട്ടില്‍ മുളയ്ക്കും. ഹിന്ദുത്വ എന്ന അക്രമാത്മക രാഷ്ട്രീയശക്തിയുടെ ആവശ്യവും അതുതന്നെയാണ്.

അദ്ദേഹത്തിന്റെ രണ്ടാമത്തെ വീഡിയോയിലെ ഒന്നാമത്തെവാദം ശ്രദ്ധിക്കുക. യേശു ജനിക്കുന്നത് എന്തിനാണെന്നു ബൈബിളില്‍ പറഞ്ഞിട്ടില്ല, എന്നാല്‍ ശ്രീകൃഷ്ണന്‍ ജനിക്കുന്നത് എന്തിനാണെന്ന് പുരാണങ്ങളില്‍ പറഞ്ഞിട്ടുണ്ട് എന്നും അദ്ദേഹം കണ്ടെത്തിയിരിക്കുന്നു. ഇതു വസ്തുതാവിരുദ്ധമാണ്, ഒന്നുകില്‍ അദ്ദേഹം ബൈബിള്‍ വായിച്ചിട്ടില്ല, അല്ലെങ്കില്‍ അദ്ദേഹം കള്ളം പറയുന്നു. പല ഭാഗങ്ങളിലായി ക്രിസ്തു ജനിച്ചതിന്റെ പതിനഞ്ചു ലക്ഷ്യങ്ങള്‍ ബൈബിളില്‍ പറഞ്ഞിട്ടുണ്ട്. അതില്‍ എനിക്ക് ഏറ്റവും ഇഷ്ടപ്പെട്ടത് മാത്രം ഇവിടെ ഉദ്ധരിക്കുന്നു.

"കാണാതെ പോയതിനെ തിരഞ്ഞു രക്ഷിപ്പാനല്ലോ മനുഷ്യപുത്രന്‍ വന്നതു" ലൂക്കോസ് 19:10.

യേശുവിന്റെ ജനനശേഷം മാതാപിതാക്കള്‍ യേശുവിനേയും കൊണ്ട് എന്തിനു ഈജിപ്റ്റിലേയ്ക്കു പോയി എന്നു ബൈബിളില്‍ പറയുന്നില്ല എന്നതാണ് രണ്ടാമത്തെ വാദം. ഇതും ശരിയല്ല.

"കര്‍ത്താവിന്റെ ദൂതന്‍ യോസേഫിന്നു സ്വപ്നത്തില്‍ പ്രത്യക്ഷനായി: നീ എഴുന്നേറ്റു ശിശുവിനെയും അമ്മയെയും കൂട്ടിക്കൊണ്ടു മിസ്രയീമിലേക്കു ഓടിപ്പോയി, ഞാന്‍ നിന്നോടു പറയുംവരെ അവിടെ പാര്‍ക്കുക. ഹെരോദാവു ശിശുവിനെ നശിപ്പിക്കേണ്ടതിന്നു അവനെ അന്വേഷിപ്പാന്‍ ഭാവിക്കുന്നു എന്നു പറഞ്ഞു" മത്തായി 2. 13.

ഹേരോദാവില്‍ നിന്നും രക്ഷപ്പെടുന്നതിനാണ് അവര്‍ ഈജിപ്റ്റിലേയ്ക്കു പോയത് എന്നും അടുത്ത വാചകത്തില്‍ ഹേരോദാവിന്റെ മരണശേഷം അവര്‍ മടങ്ങി വന്നു എന്നും ബൈബിളില്‍ രേഖപ്പെടുത്തിയിട്ടുണ്ട്.

അദ്ദേഹത്തിന്റെ സന്ദേശത്തിലെ തെറ്റുകള്‍ ഒരു പക്ഷേ അജ്ഞതകൊണ്ടായിരിക്കാം. പക്ഷേ, ഈ വിഷം ചീറ്റുന്ന പ്രസംഗങ്ങള്‍ നമ്മുടെ സമൂഹത്തിനു അപകടം വരുത്തുമെന്നതില്‍ സംശയം വേണ്ട. കൃത്രിമ വിനയത്തില്‍ പൊതിഞ്ഞ ഈ കാളകൂടം കുടിച്ചാല്‍ മഹാദേവനു പോലും അന്ത്യം ഭവിച്ചേക്കാം.

ഒരു മത ഗ്രന്ഥത്തില്‍ വിശ്വസിക്കാനും വിശ്വസിക്കാതിരിക്കുവാനും ഓരോരുത്തര്‍ക്കും ഓരോ കാരണങ്ങള്‍ ഉണ്ട്. എന്നാല്‍ മറ്റൊരു മതത്തിന്റെ വിശുദ്ധ ഗ്രന്ഥത്തിനുള്ളില്‍ ഞങ്ങളുടെ ദൈവത്തെക്കുറിച്ച് പറഞ്ഞിട്ടുണ്ട് എന്നു പറഞ്ഞ് അന്യമതഗ്രന്ഥങ്ങള്‍ക്കുള്ളിലൂടെ സ്വന്തം മതം വിരിയിച്ചെടുക്കുന്ന തന്ത്രം കേരളത്തില്‍ എല്ലാ പ്രമുഖ മതങ്ങളും പയറ്റിയിട്ടുള്ളതാണ്. അത് ഒഴിവാക്കേണ്ടത് തന്നെയാണ്. പക്ഷേ, ഡോ. എന്‍ ഗോപാലകൃഷ്ണന്‍ അതിന്റേയും അപ്പുറം കടന്നു പോയിരിക്കുന്നു. ബൈബിളില്‍ എഴുതിയിരിക്കുന്ന കാര്യങ്ങള്‍ അതില്‍ ഇല്ല എന്നു കള്ളം പ്രചരിപ്പിക്കുക, യഹോവയെ ബിന്‍ ലാദനോട് ഉപമിക്കുക, യേശുവിനു മാനസിക രോഗം ഉണ്ടെന്നു പറയുക ഇതൊന്നും ശരിയല്ല, ഇതു നമുക്കു ഗുണം ചെയ്യില്ല- നിശ്ചയം.

സജി മര്‍ക്കോസ്

ചേര്‍ത്തുവായിക്കാന്‍

ഡോ. എന്‍ ഗോപാലകൃഷ്ണന്‍

ആത്മീയം

കാന്തപുരത്തിന്റെ പള്ളിയും പിണറായി വിജയനും

പുലരി — Wed, 29 Feb 2012 06:23:52 +0000

ഇതുപോലുള്ള ഒരു പ്രഹരം പിണറായി വിജയനില്‍ നിന്നുണ്ടാകുമെന്നു കാന്തപുരം ഒരിക്കലും വിചാരിച്ചിരിക്കില്ല. നാല്പതു കോടി ചെലവില്‍ പ്രവാചകന്റെ മുടിയുടെ പേരില്‍ പള്ളി പണിയാനുള്ള കാന്തപുരത്തിന്റെ നീക്കത്തിനു നാളിതുവരെ നേരിട്ട പ്രതിസന്ധികളേക്കാള്‍ വലിയ വെല്ലുവിളിയാണ് പിണറായി വിജയന്റെ പ്രസ്താവന മൂലം കാന്തപുരം വിഭാഗം നേരിടുന്നത്. പ്രവാചക മുടിയുടെ പേരില്‍ സമുദായത്തിനുള്ളില്‍ നിന്നുണ്ടായ അതിശക്തമായ എതിര്‍പ്പുകളെ സംഘടിതമായി ചെറുത്തു മുന്നോട്ടു പോകുകയായിരുന്നു കാന്തപുരം.

മുടി പ്രവാചകന്റേതു തന്നെ ആണെന്നതിനു തെളിവു തരാന്‍ പറഞ്ഞ ഔദ്യോഗിക സുന്നികളോട് തെളിവ് എന്റെ പക്കല്‍ ഉണ്ട് അത് വിശ്വസിച്ചുകൊള്ളുക എന്നു മാത്രം പറഞ്ഞ് വായടപ്പിക്കാനുള്ള ശ്രമം ഒരു വശത്തു. മറുവശത്ത് പ്രവാചകന്റെ മുടി ആണെങ്കില്‍ തന്നെ അതിനെ ബഹുമാനിക്കേണ്ടത് ഇങ്ങിനെയാണൊ എന്ന മറ്റു വിഭാഗങ്ങളുടെ ചോദ്യങ്ങള്‍ക്ക് മറുപടിയായി കുറെ ഹദീസുകള്‍ മാത്രം നല്‍കി, ഈ ഹദീസുകളും മുടിയുടെ പേരിലുള്ള പള്ളിയും തമ്മില്‍ എന്തു ബന്ധം എന്ന ചോദ്യങ്ങള്‍ക്ക് മറ്റു വിശദീകരണങ്ങള്‍ നല്‍കാതെ എന്തും വിശ്വസിക്കുന്ന അണികളെ പ്രവാചക മുടിയുടെ പേരില്‍ ആവേശഭരിതരാക്കി പള്ളിപണിയുമായി മുന്നോട്ടുപോകുകയായിരുന്നു.

കാന്തപുരം വിഭാഗത്തിന്റെ നിയന്ത്രണത്തിലുള്ള സ്ഥാപനങ്ങള്‍ വഴി നാടൊട്ടുക്കും മുടിയിട്ട് വെള്ളം വിതരണം ചെയ്തു. പള്ളിപണിയാനായി കോടികളുടെ ധനശേഖരണം. ഇങ്ങിനെ മുന്നോട്ടു പോകുമ്പോഴാണ് അപ്രതീക്ഷിതമായി സാക്ഷാല്‍ സഖാവു പിണറായിയുടെ ഭാഗത്തുനിന്നുണ്ടാകുന്ന അതിശക്തമായ പ്രഹരം വരുന്നത്. പിണറായി അല്ലേ പറയുന്നത്, അതും ഇക്കാലമത്രയും കൂടെ കൊണ്ടുനടന്നിരുന്ന കാന്തപുരത്തിനെതിരെ. പൊതുസമൂഹം ഇതേറ്റെടുക്കുവാന്‍ പിന്നെ അമാന്തിച്ചില്ല. മറ്റെല്ലാം വിട്ടു മാദ്ധ്യമങ്ങള്‍ ഈ വിഷയത്തിന്റെ പിന്നാലെ കൂടി.

ഇറ്റാലിയന്‍ നാവികരുടെ വെടിയേറ്റ് മത്സ്യതൊഴിലാലീകള്‍ കൊലചെയ്യപ്പെട്ട വിഷയത്തിനു പോലും രണ്ടാം സ്ഥാനമാണ് മാദ്ധ്യമങ്ങള്‍ പലപ്പോഴും നല്‍കിയത്. മതത്തിന്റെ വിഷയത്തില്‍ രാഷ്ട്രീയക്കാരും, പൊതുസമൂഹവും ഇടപെടേണ്ടതില്ല എന്ന് കാന്തപുരത്തിനു പ്രസ്താവന ഇറക്കേണി വന്നു. ഇടപെടാം എന്നു മറ്റുള്ളവരും. അങ്ങിനെ വിവാദം കൊഴുത്തു.

"വിമര്‍ശകര്‍ അരിവാള്‍ സുന്നികള്‍ എന്നൊക്കെ വിളിച്ചാക്ഷേപിച്ചെങ്കിലും ഇടതുപക്ഷവുമായുള്ള ബന്ധം ദശാബ്ദങ്ങളായി സുദൃഢമായി തുടര്‍ന്നു. കാന്തപുരം സുന്നി യുവാക്കള്‍ ഒരേ സമയം എസ്എസ്എഫിലും ഡിവൈഎഫൈയിലും അംഗമായി, മതവും രാഷ്ട്രീയവും തമ്മിലുള്ള ബന്ധത്തിനു പുതിയ മാനങ്ങള്‍ നല്‍കി. മതപ്രസംഗ പരമ്പരയിലൂടെയും, സംഘടനാ പ്രസിദ്ധീകരണങ്ങളിലൂടെയുമൊക്കെ സ്ത്രീകളുടെ പൊതുപ്രവേശനത്തിനെതിരെയും പള്ളിപ്രവേശനത്തിനെതിരെയും അതിശക്തമായി നിലകൊള്ളുമ്പോഴും മുള്ളൂര്‍കര സഖാഫിയെ പോലുള്ള യുവതുര്‍ക്കികള്‍ സിപിഎം നേതൃത്വം നല്‍കിയ മനുഷ്യ മതിലിലും, മനുഷ്യചങ്ങളയിലും അന്യമതസ്തരായ സ്ത്രീകളുടെ കൈകള്‍ കൂട്ടിപ്പിടിച്ച് പാര്‍ട്ടിയോടുള്ള് കൂറു പരസ്യമായി വ്യക്തമാക്കി. "

സുന്നി പ്രസ്ഥാനം വിഘടിതമായതു മുതല്‍ ചുവപ്പിന്റെ ഓരം പറ്റി നാളിതുവരെ നടക്കുകയായിരുന്നു കാന്തപുരവും അനുയായികളും. പിളര്‍പ്പിനെ തുടര്‍ന്നുണ്ടായ പിടിച്ചടക്കല്‍ സംഘര്‍ഷത്തിന്റെ ഭാഗമായി ലീഗിന്റെ രാഷ്ട്രീയബലത്തില്‍ ഔദ്യോഗിക വിഭാഗം സുന്നികള്‍ കാന്തപുരം വിഭാഗത്തെ വേട്ടയാടിയപ്പോള്‍ സംരക്ഷണം തേടി ഓടിക്കയറിയ അന്നുമുതലുള്ള ബന്ധമാണ് ഇടതുപക്ഷവുമായി. വിമര്‍ശകര്‍ അരിവാള്‍ സുന്നികള്‍ എന്നൊക്കെ വിളിച്ചാക്ഷേപിച്ചെങ്കിലും ഇടതുപക്ഷവുമായുള്ള ബന്ധം ദശാബ്ദങ്ങളായി സുദൃഢമായി തുടര്‍ന്നു. കാന്തപുരം സുന്നി യുവാക്കള്‍ ഒരേ സമയം എസ്എസ്എഫിലും ഡിവൈഎഫൈയിലും അംഗമായി, മതവും രാഷ്ട്രീയവും തമ്മിലുള്ള ബന്ധത്തിനു പുതിയ മാനങ്ങള്‍ നല്‍കി. മതപ്രസംഗ പരമ്പരയിലൂടെയും, സംഘടനാ പ്രസിദ്ധീകരണങ്ങളിലൂടെയുമൊക്കെ സ്ത്രീകളുടെ പൊതുപ്രവേശനത്തിനെതിരെയും പള്ളിപ്രവേശനത്തിനെതിരെയും അതിശക്തമായി നിലകൊള്ളുമ്പോഴും മുള്ളൂര്‍കര സഖാഫിയെ പോലുള്ള യുവതുര്‍ക്കികള്‍ സിപിഎം നേതൃത്വം നല്‍കിയ മനുഷ്യ മതിലിലും, മനുഷ്യചങ്ങളയിലും അന്യമതസ്തരായ സ്ത്രീകളുടെ കൈകള്‍ കൂട്ടിപ്പിടിച്ച് പാര്‍ട്ടിയോടുള്ള് കൂറു പരസ്യമായി വ്യക്തമാക്കി. അത്രമാത്രം സുദൃഢമായിരുന്നു സിപിഎമ്മുമായി കാന്തപുരം ഗ്രൂപ്പിനുള്ള ബന്ധം.

സിപിഎമ്മും മാന്യമായ സുഹൃത്തെന്ന പദവി നല്‍കി കാന്തപുരം ഗ്രൂപ്പിനെ ആദരിച്ചു. പാര്‍ട്ടി നേതാവായ സഖാവ് ഹംസ, ഹംസ സാഹിബായി മര്‍ക്കസില്‍ പോയി പലപ്പോഴും കാന്തപുരവുമായി ഒരുമിച്ചിരുന്നു ഭക്ഷണം കഴിച്ചു. മുസ്ലിം സമുദായവുമായി സംഘര്‍ഷം ഉണ്ടാകുമ്പോഴും കാന്തപുരത്തെ താലോടി കൂടെ നിറുത്താന്‍ സിപിഎം ശ്രദ്ധിച്ചു. സിപിഎമ്മിന്റെ തന്ത്രപരമായ രാഷ്ട്രീയ നീക്കത്തിനും അടവുനയത്തിനും ഫലം കണ്ടു. ദശാബ്ദങ്ങളായി ഇളകാതെ കിടന്നിരുന്ന മലപ്പുറം ജില്ലയിലെ ലീഗിന്റെ പല പൊന്നാപുരം കോട്ടകളും കാലക്രമേണ ഇളകിത്തുടങ്ങി. സഖാവ് ടി.കെ ഹംസ മലപ്പുറം ജില്ലയില്‍ നിന്നുള്ള സിപിഎം എംപിയായി പാര്‍ലമെന്റിലേക്കും ജയിച്ചുകയറി. മാത്രമല്ല പിന്നീടു നടന്ന നിയമസഭാ തെരഞ്ഞെടുപ്പില്‍ ലീഗിന്റെ പുപ്പുലി സാക്ഷാല്‍ കുഞ്ഞാക്ക കുറ്റിപ്പുറത്തു വന്‍ ഭൂരിപക്ഷത്തോടെ പരാജയപ്പെട്ടു. കേരളത്തില്‍ ഇടതുപക്ഷം വീണ്ടും അധികാരത്തില്‍ വന്നു.

സിപിഎമ്മും കാന്തപുരവും തമ്മിലുള്ള സുദൃഢബന്ധത്തിന്റെ വിള്ളലുകള്‍ ഇവിടെ മുതല്‍ തുടങ്ങുന്നു. മലപ്പുറത്തിന്റെ മണ്ണില്‍ ചെങ്കൊടി പാറിക്കാന്‍ കൂടെനിന്ന കാന്തപുരം ഗ്രൂപ്പിനു പക്ഷെ ഭരണതലത്തില്‍ പരിഗണനയൊന്നും ലഭിച്ചില്ല. എന്നു മാത്രമല്ല കാന്തപുരം വിഭാഗത്തിനെ പ്രകോപിപ്പിക്കുന്ന ചില നീക്കങ്ങളും ഭരണപക്ഷത്തുനിന്നുണ്ടായി. അതില്‍ പ്രധാനമായത് കാന്തപുരം വിഭാഗം നേതൃത്വം നല്‍കുന്ന ഹജ്ജ് ഗ്രൂപ്പ് യാത്രക്കാരെ സിപിഎമ്മുകാര്‍ അക്രമിച്ചതാണ്. കണ്ണൂരിലെ പതിവ് ലീഗ്-സിപിഎം സംഘര്‍ഷത്തിന്റെ മറവിലാണ് കാന്തപുരം ഗ്രൂപ്പ് നേതൃത്വം നല്‍കുന്ന സ്ത്രീകള്‍ അടക്കമുള്ള ഹജ്ജ് യാത്രക്കാരെ കടവത്തൂരില്‍ വെച്ച് രണ്ടായിരത്തി ഏഴില്‍ സിപിഎമ്മുക്കാര്‍ മാരകമായി അക്രമിച്ചതു. ഇതു കാന്തപുരം വിഭാഗത്തിനു സിപിഎമ്മിനു മേലുള്ള വിശ്വാസത്തിനു മുറിവേല്പിച്ച സംഭവമായിരുന്നു. എങ്കിലും ബന്ധം തുടര്‍ന്നു.

ഇതിനിടയിലാണ് കാന്തപുരം വിഭാഗത്തിനു വേണ്ടി ഇടതുപക്ഷ സര്‍ക്കാര്‍ അംഗീകരിച്ചു നല്‍കിയ വിദ്യാഭ്യാസ സ്ഥാപനങ്ങള്‍ ഹൈക്കോടതി ഇടപെട്ടു റദ്ദാക്കുന്നതു. ഇവിടെയും കാന്തപുരം വിഭാഗം വഞ്ചിക്കപ്പെട്ടു എന്ന തോന്നലുണ്ടായി. കാരണം അനിവാര്യമായ മുന്‍ കരുതലുകളോ മാനദണ്ഡങ്ങളോ പാലിക്കാതെയായിരുന്നു മേല്പറഞ്ഞ വിദ്യാഭ്യാസസ്ഥാപനങ്ങള്‍ക്ക് സര്‍ക്കാര്‍ അനുമതി നല്‍കിയത്. സ്വാഭാവികമായും ഇതിനെതിരെ കോടതിയില്‍ ചോദ്യം ചെയ്തു. മാനദണ്ഡങ്ങള്‍ പാലിച്ചില്ല എന്നു കണ്ടെത്തിയ കോടതി അനുമതി നല്‍കിയത് റദ്ദാക്കുകയും ചെയ്തു. ഇതു കാന്തപുരം വിഭാഗത്തില്‍ ഉണ്ടാക്കിയ പ്രയാസം ചെറുതായിരുന്നില്ല.

അതേസമയം മലപ്പുറം ജില്ലയില്‍ ലീഗിനേറ്റ ചരിത്രപരമായ തിരിച്ചടിയില്‍ നിന്നു പാഠം ഉള്‍ക്കൊണ്ട് കുഞ്ഞാലിക്കുട്ടിയുടെ നേതൃത്വത്തില്‍ പരമ്പരാഗതമായി സ്വീകരിചു പോന്ന നയനിലപാടുകള്‍ പുനഃപരിശോധിക്കുവാന്‍ തയ്യാറെടുക്കുന്നതു ഈ പശ്ചാത്തലത്തിലാണ്. ഔദ്യോഗിക സുന്നികളെ മാത്രം ആശ്രയിച്ച് ഇനി രാഷ്ട്രീയത്തില്‍ മുന്നോട്ടുപോകുവാന്‍ സാധിക്കില്ല എന്ന തിരിച്ചറിവിന്റെ അടിസ്ഥാനത്തില്‍ കാന്തപുരം സുന്നികളുമായും ഇതര മുസ്ലിം സംഘടനകളുമായും കുഞ്ഞാലികുട്ടിയുടെയും ഇ.ടി മുഹമ്മദ് ബഷീരിന്റെയും നേതൃത്വത്തില്‍ ബന്ധപ്പെടാന്‍ തുടങ്ങി.

നാളിതുവരെ എതിര്‍പക്ഷത്തു നിര്‍ത്തിയിരുന്ന കാന്തപുരം സുന്നികളുമായി ബന്ധം സ്ഥാപിക്കാനുള്ള ആഗ്രഹം കുഞ്ഞാലിക്കുട്ടി പ്രകടിപ്പിക്കുന്നു. കാന്തപുരം വിഭാഗം അതിനനുകൂലമായി പ്രതികരിക്കുന്നു. ചര്‍ച്ചകള്‍ മുന്നോട്ടു പോകവെ സാക്ഷാല്‍ പാണക്കാട് തങ്ങള്‍ തന്നെ കാന്തപുരം വിഭാഗത്തിന്റെ പരിപാടിയില്‍ പങ്കെടുക്കുന്നു എന്ന നിലക്ക് വരെ വാര്‍ത്തകള്‍ പ്രചരിച്ചെങ്കിലും ഔദ്യോഗിക സുന്നികളുടെ കടുത്ത എതിര്‍പ്പിനെ തുടര്‍ന്ന് പാണക്കാട് തങ്ങളുടെ നീക്കത്തിനു താല്‍ക്കാലികമായെങ്കിലും തടയിടപ്പെട്ടു. എന്നാല്‍ പോലും പരമ്പാരാഗതമായി നിലനില്‍ക്കുന്ന പരസ്പരമുള്ള ശത്രുതയ്ക്ക് ഇനിയും പ്രസക്തി ഇല്ലെന്ന് ഇരുവിഭാഗത്തിന്നും ബോധ്യം വന്നിരുന്നു.

കാന്തപുരത്തിന്റെ തന്ത്രപരമായ ചുവടുമാറ്റം സിപിഎമ്മും സൂക്ഷ്മമായി നിരീക്ഷിക്കുകയായിരുന്നു. പലപ്പോഴും വിജയത്തില്‍ പങ്കു അവകാശപ്പെടുന്ന അതേസമയം പരാജയത്തിന്റെ പാപഭാരത്തില്‍ നിന്നു തലയൂരുന്ന കാന്തപുരം വിഭാഗത്തിന്റെ സ്ഥിരം ശൈലിയും സിപിഎമ്മിനു ബോധ്യം വന്നുതുടങ്ങി. മാത്രമല്ല അടുത്ത നിയമസഭാ തെരഞ്ഞെടുപ്പില്‍ കാന്തപുരം ഗ്രൂപ്പിന്റെ ഭാഗികമായ പിന്തുണമാത്രമേ ചരിത്രത്തിലാദ്യമായി ഇടതുപക്ഷത്തിനു ലഭിച്ചുള്ളൂ. ഇതും സിപിഎമ്മിനെ വീണ്ടുവിചാരത്തിനു പ്രേരിപ്പിക്കുവാന്‍ ഒരുകാരണമായി.

ഈ പശ്ചാത്തലത്തിലാണ് പിണറായി വിജയന്റെ പ്രസ്താവന ശ്രദ്ധേയമാകുന്നത്. മതം രാഷ്ട്രീയത്തില്‍ ഇടപെടേണ്ടതില്ല എന്ന് നിരന്തരം പ്രസ്താവന നടത്തുന്ന ഇടതുപക്ഷവും അതിന്റെ നേതാവു പിണറായി വിജയനുമാണ് മത വിഷയങ്ങളില്‍ അഭിപ്രായം പറയുന്നത് എന്നത് ഇവിടെ ശ്രദ്ധേയമാണ്. കാന്തപുരം മുന്നോട്ടു വെക്കുന്ന പ്രവാചകന്റേതെന്നു പ്രചരിപ്പിക്കുന്ന മുടിയോടും പള്ളിയോടും ആദര്‍ശപരമായ വിയോജിപ്പുള്ളവര്‍ പിണറായിയുടെ പ്രസ്താവനയേയും പിണറായി വിജയന്‍ എന്ന നിര്‍മത പ്രസ്ഥാനത്തിന്റെ അമരക്കാരനു മതവിഷയത്തില്‍ ഇടപെടുവാനുള്ള അവകാശത്തെ പറ്റിയും രണ്ടാമതൊന്ന് ആലോചിക്കാതെ സമ്മതം നല്‍കി കാന്തപുരം വിഭാഗത്തിനെതിരെയുള്ള പോരാട്ടത്തിനു വീര്യം പകര്‍ന്നു.

ഇവിടെ പ്രസക്തമായ വിഷയം പിണറായി നടത്തിയ പ്രസ്താവന തന്നെയാണ്. അതായത് പ്രവാചക വചനങ്ങള്‍ ആണു പ്രധാനം, അല്ലാതെ പ്രവാചകന്റെ അവിശിഷ്ടങ്ങള്‍ അല്ല എന്ന പ്രസ്താവന. മതത്തെയും, മതാചാര്യന്മാരെയും നിഷേധിക്കുന്ന, ദൈവം, പ്രവാചകര്‍ എന്നതിനെ തന്നെ പാടേ നിഷേധിക്കുന്ന നിര്‍മ്മത പ്രസ്ഥാനങ്ങള്‍ക്ക് ഏതടിസ്ഥാനത്തിലാണ് പ്രവാചക വചനങ്ങള്‍ സ്വീകാര്യമാകുന്നതെന്ന ചോദ്യം. ദൈവീകമോ, പ്രവാചകരുമായി ബന്ധപ്പെടാതെയോ ഒരു വേദവും ഇറങ്ങിയിട്ടില്ല. ഇവിടെ ദൈവത്തില്‍ വിശ്വസിക്കാതെ, പ്രവാചകരില്‍ വിശ്വസിക്കാതെ എങ്ങിനെയാണ് പ്രവാചക വചനങ്ങള്‍ക്കാണ് പ്രസക്തി എന്നു പറയുന്നത്?

പാര്‍ട്ടി സമ്മേളനങ്ങളില്‍ യേശു ക്രിസ്തു മുതല്‍ പ്രാദേശിക ദൈവങ്ങളുടെ വരെ ഫ്ലെക്സ് വച്ച് അഭിവാദ്യം അര്‍പ്പിക്കുമ്പോള്‍ പ്രവാചകന്റെ ചിത്രമെങ്ങാനും ഇവരുടെ കയ്യില്‍ ഇല്ലാതിരുന്നത് ഭാഗ്യം എന്ന് പലരും ആശ്വാസം കൊള്ളുന്നുണ്ടായിരുന്നു.

അതോടൊപ്പം ചേര്‍ത്തുവായിക്കേണ്ട ഒന്നാണ് പിണറായിയുടെ പ്രസ്താവനയിലെ പ്രവാചകന്റെ ബോഡീ വേസ്റ്റിനല്ല പ്രാധാന്യം എന്ന വാചകം. പുരുഷ ലിംഗവും, സ്ത്രീ യോനിയും വരെ ബിംബങ്ങളാക്കി ആരാധിക്കുന്ന ആരാധാനാലയങ്ങള്‍ ഉള്ള നാടാണ് ഇന്ത്യാ മഹാരാജ്യം. കേരളത്തിലും ഈ നിലക്കുള്ള നൂറുകണക്കായ ആരാധനാലയങ്ങള്‍ നിലവില്‍ ഉണ്ട്.

ഇവിടെ നടന്നുകൊണ്ടിരിക്കുന്ന ആചാരങ്ങളും ഉത്സവങ്ങളും എത്രമാത്രം പുരോഗമനപരമെന്നത് വേറെ വിഷയം. അതേ സമയം ഇത്തരം ആരാധാനാലയങ്ങള്‍ നിലവിലുണ്ടായിരിക്കുകയും ഇതിന്റെയെല്ലാം ഭരണം പിടിക്കാന്‍ ഇടതുപക്ഷം തന്നെ മുന്നിട്ടിറങ്ങുകയും ചെയ്യുന്നു എന്നതാണ് ഇന്നു കണ്ട് വരുന്ന അവസ്ഥ. ഈ നിലക്കുള്ള പല ആരാധാനാലയങ്ങളുടെയും ഭരണസാരഥ്യം വഹിക്കുന്നത് ഇടതുപക്ഷമാണ്. പലപ്പോഴും സംഘപരിവാരവുമായി ഭരണസാരഥ്യത്തിനായും ഉത്സവ നടത്തിപ്പിന്റെ ആധിപത്യത്തിനായും മത്സരം നടക്കുന്നു. സംഘര്‍ഷം ഉടലെടുക്കുന്നു.

മുസ്ലിം സമുദായത്തില്‍ തന്നെ തീര്‍ത്തും അനാരോഗ്യകരമയ വിശ്വാസം കൊണ്ട് നടക്കുന്ന പല ആരാധാനാലയങ്ങളുടെയും തലപ്പത്ത് ഇന്നു ഇടതുപക്ഷമാണ് ഉള്ളത്. മുസ്ലിം പണ്ഡിതര്‍ തള്ളിക്കളഞ്ഞ ചന്ദനക്കുടം നേര്‍ച്ചകള്‍ മുസ്ലിം ആരാധാനലയങ്ങള്‍ കേന്ദ്രീകരിച്ചു നടത്താന്‍ വാശിപിടിക്കുന്നതും ഭരണത്തിന്റെ തണല്‍ ഉപയോഗിച്ചു ബലാല്‍ക്കാരമായി നടത്തുന്നതും സിപിഎം പ്രവര്‍ത്തകരും നേതാക്കളും തന്നെയാണ്.

ഈ പശ്ചാത്തലത്തില്‍ പ്രവാചകന്റെ മുടിയുടെ പേരില്‍ ഉള്ള പള്ളിയെ കുറിച്ചുള്ള പിണറായിയുടെ പ്രസ്താവന എത്രമാത്രം ആത്മാര്‍ഥമാണ് എന്ന ചോദ്യം പ്രസക്തമാണ്. കാന്തപുരവുമായി ബന്ധപ്പെട്ട വിശ്വാസങ്ങള്‍ അറിയാത്ത വ്യക്തി അല്ല സഖാവ് പിണറായി വിജയന്‍. മാത്രമല്ല മുസ്ലിം സമുദായത്തില്‍ നിന്നു ചില പ്രത്യേക ആചാരങ്ങളെ പ്രമോട്ട് ചെയ്യുന്ന വിഭാഗങ്ങളെ പ്രോത്സാഹിപ്പിക്കുകയും മുസ്ലിം ഐഡന്റിറ്റിയെ കുറിച്ചും അവകാശങ്ങളെ കുറിച്ചും പ്രചാരണം നടത്തുന്ന വിഭാഗങ്ങളെ ഇത്തരം സംഘടനകളെ ഉപയോഗിച്ചു എതിര്‍ത്തില്ലാതാക്കുക എന്നതും സിപിഎം ലക്ഷ്യത്തിന്റെ ഭാഗം തന്നെയാണ്.

അതായത് മുസ്ലിം സമുദായം ചില ആഘോഷങ്ങളുടെയും ആചാരങ്ങളുടെയും തടവറയില്‍ തന്നെ കഴിയണം, സ്വന്തം അവകാശത്തെ കുറിച്ചും ഭരണ പ്രാതിനിധ്യത്തെ കുറിച്ചും സുരക്ഷയെ കുറിച്ചും ഒന്നും സംസാരിക്കരുത്, അതെല്ലാം മറന്നുകൊണ്ട് ഇടതുപക്ഷ പാളയത്തില്‍ ഇരുന്നുകൊള്ളുക എന്ന നയത്തിന്റെ ഭാഗമായി തന്നെയാണ് കാന്തപുരം വിഭാഗത്തെ നാളിതുവരെ സിപിഎം കൊണ്ട് നടന്നത്. ഒരു സുപ്രഭാതത്തില്‍ പിണറായിയില്‍ നിന്നു മറിച്ചൊരു പ്രസ്താവന വരുമ്പോഴേക്ക് അതിന്റെ പിന്നിലുള്ള രാഷ്ട്രീയം തിരിച്ചറിയാതെ മതവിശ്വാസത്തില്‍ പിണറായിക്കും ഇടപെടാം എന്നു പറഞ്ഞു നിരുപാധിക പിന്തുണയുമായി ചെല്ലുന്ന പുരോഗമനം അവകാശപ്പെടുന്ന മുസ്ലിം സംഘടനകല്‍ പലതും ഇതിന്റെ പിന്നിലെ അജണ്ടകള്‍ അറിഞ്ഞില്ലെന്നു നടിക്കുകയാണ്.

വാസ്തവത്തില്‍ കാന്തപുരം ഗ്രൂപ്പിന്റെ രാഷ്ട്രീയ ചാഞ്ചല്യത്തിനുള്ള മറുപടി മാത്രമാണ് പിണറായി നടത്തിയ പ്രസ്താവന. അതിനപ്പുറം ഒന്നുമില്ല ഈ പ്രസ്താവനക്കു പുറകില്‍. ഇതിനേക്കാള്‍ വലിയ ചൂഷണം നടക്കുന്ന ആരാധനാലയങ്ങള്‍ക്കും ആചാരങ്ങള്‍ക്കും നേരെ കണ്ണടയ്ക്കുന്ന, അത്തരം സ്ഥാപങ്ങളുടെ തലപ്പത്ത് എത്തിപ്പെടാന്‍ മത്സരിക്കുന്ന, പിണാറായി വിജയന്‍ നേതൃത്വം നല്‍കുന്ന ഇടതുപക്ഷത്തിന്റെ പ്രവാചക വചനങ്ങള്‍ പറഞ്ഞുകൊണ്ടുള്ള മതത്തിനുള്ളിലേക്കുള്ള കടന്നുകയറ്റത്തെ ആ നിലക്ക് തന്നെ നോക്കിക്കാണുവാന്‍ കാന്തപുരത്തിന്റെ നടപടികളോടു വിയോജിപ്പുള്ളവര്‍ തയ്യാറാകേണ്ടതുണ്ട്. ശത്രുവിന്റെ ശത്രു മിത്രം എന്ന നിലക്ക് കാന്തപുരത്തിനെതിരെയുള്ള പിണറായിയുടെ പ്രസ്താവനയെ കണ്ട് പിണറായിയുടെ പ്രസ്താവനയ്ക്കു കീഴില്‍ ഒപ്പു വെക്കുന്നവര്‍ ഇതെല്ലാം ഓര്‍ക്കുന്നതു നന്നായിരിക്കും.

പുലരി

(ബ്ലോഗില്‍ പ്രസിദ്ധീകരിച്ചതു്)

News Quotes

വിമര്‍ശകര്‍ അരിവാള്‍ സുന്നികള്‍ എന്നൊക്കെ വിളിച്ചാക്ഷേപിച്ചെങ്കിലും ഇടതുപക്ഷവുമായുള്ള ബന്ധം ദശാബ്ദങ്ങളായി സുദൃഢമായി തുടര്‍ന്നു. കാന്തപുരം സുന്നി യുവാക്കള്‍ ഒരേ സമയം എസ്എസ്എഫിലും ഡിവൈഎഫൈയിലും അംഗമായി, മതവും രാഷ്ട്രീയവും തമ്മിലുള്ള ബന്ധത്തിനു പുതിയ മാനങ്ങള്‍ നല്‍കി. മതപ്രസംഗ പരമ്പരയിലൂടെയും, സംഘടനാ പ്രസിദ്ധീകരണങ്ങളിലൂടെയുമൊക്കെ സ്ത്രീകളുടെ പൊതുപ്രവേശനത്തിനെതിരെയും പള്ളിപ്രവേശനത്തിനെതിരെയും അതിശക്തമായി നിലകൊള്ളുമ്പോഴും മുള്ളൂര്‍കര സഖാഫിയെ പോലുള്ള യുവതുര്‍ക്കികള്‍ സിപിഎം നേതൃത്വം നല്‍കിയ മനുഷ്യ മതിലിലും, മനുഷ്യചങ്ങളയിലും അന്യമതസ്തരായ സ്ത്രീകളുടെ കൈകള്‍ കൂട്ടിപ്പിടിച്ച് പാര്‍ട്ടിയോടുള്ള് കൂറു പരസ്യമായി വ്യക്തമാക്കി.

കാന്തപുരം എ പി അബുബക്കര്‍ മുസല്യാര്‍, മുസ്ലീം ലീഗ് നേതാക്കളായ ഇ ടി മുഹമ്മദ് ബഷീര്‍, ഇ അഹമ്മദ് എന്നിവര്‍

കേരളം

സിപിഎം സ്വാശ്രയ കോളജ് തുടങ്ങുമ്പോള്‍

kpsukumaran — Tue, 28 Feb 2012 17:24:44 +0000

സിപിഎം കോഴിക്കോട് ആരംഭിക്കുന്ന സ്വാശ്രയ എഞ്ചിനീയറിങ്ങ് കോളേജിന്റെ പേര് എത്ര സുന്ദരം! M.DIT എന്നാണ് കോളേജിന്റെ പേര്. പറയാനും എളുപ്പമുള്ള നല്ലൊരു ബ്രാന്‍ഡ് നെയിം ആണിത്; എംഡിറ്റ്.

സ്വാശ്രയ മേഖലയില്‍ എഞ്ചിനീയറിങ്ങ് കോളേജ് തുടങ്ങാന്‍ മാര്‍ക്സിസ്റ്റ് പാര്‍ട്ടിക്കാര്‍ക്ക് അവരുടേതായ കാരണമുണ്ട്. ഈ മേഖലയില്‍ ഒരു കൂട്ടം കോളേജ് മാനേജ്‌മെന്റുകള്‍ കൊള്ള നടത്തുകയാണത്രെ. അത്കൊണ്ട് സാമൂഹ്യപ്രതിബദ്ധതയുള്ള ഇത്തരം സ്ഥാപനങ്ങള്‍ സംസ്ഥാനമൊട്ടാകെ ഉയര്‍ന്നുവരണം എന്നതാണ് പോലും ഡിവൈഎഫ്ഐക്കാരുടെ അഭിപ്രായം.

സിപിഎംകാര്‍ വിസ്മയ അമ്യൂസ്‌മെന്റ് പാര്‍ക്ക് തുടങ്ങിയതും സൂപ്പര്‍ സ്പെഷ്യാലിറ്റി ആശുപത്രികള്‍ ആരംഭിച്ചതും ഷോപ്പിങ് മാളുകളും പഞ്ചനക്ഷത്ര ഹോട്ടലുകളും എല്ലാം തുടങ്ങുന്നതും ഇങ്ങനെ അതാത് മേഖലയില്‍ കൊള്ള നടക്കുന്നതുകൊണ്ട് അവരുടെ സാമൂഹ്യ പ്രതിബദ്ധത നിറവേറ്റാനായിരിക്കണം. ഈ ഒരു മഹത്തായ കാഴ്ചപ്പാടിനെ എത്ര കടുപ്പപ്പെട്ട മാര്‍ക്സിസ്റ്റ് വിരുദ്ധര്‍ പോലും എതിര്‍ക്കുമെന്ന് തോന്നുന്നില്ല. എതിര്‍ക്കുന്നവര്‍ കൊള്ളക്കൂട്ടത്തെ അനുകൂലിക്കുന്നവരും സാമൂഹ്യപ്രതിബദ്ധത ഇല്ലാത്തവരുമായിരിക്കും. സിപിഎം എന്ത് തുടങ്ങിയാലും അതില്‍ കൊള്ള ഉണ്ടാവില്ല. ഒരു പക്ഷെ മറ്റ് കൊള്ളക്കാരുടെ സ്ഥാപനങ്ങളിലും സിപിഎം സ്ഥാപനങ്ങളിലും ഒരേ വിലയും ചാര്‍ജ്ജും ഫീസും തന്നെയാണെങ്കില്‍ തന്നെയും സിപിഎമ്മിന്റേതില്‍ സാമൂഹ്യ പ്രതിബദ്ധത കാണും. അതാണ് അതിന്റെ മെച്ചം.

"സിപിഎം എന്ത് തുടങ്ങിയാലും അതില്‍ കൊള്ള ഉണ്ടാവില്ല. ഒരു പക്ഷെ മറ്റ് കൊള്ളക്കാരുടെ സ്ഥാപനങ്ങളിലും സിപിഎം സ്ഥാപനങ്ങളിലും ഒരേ വിലയും ചാര്‍ജ്ജും ഫീസും തന്നെയാണെങ്കില്‍ തന്നെയും സിപിഎമ്മിന്റേതില്‍ സാമൂഹ്യ പ്രതിബദ്ധത കാണും. അതാണ് അതിന്റെ മെച്ചം."

കൂത്തുപറമ്പില്‍ രക്തസാക്ഷികളെ സൃഷ്ടിച്ചത് എന്തിനായിരുന്നു എന്ന് ചില ദോഷൈകദൃക്കുകള്‍ ചോദിക്കുന്നുണ്ട്. അത് സിപിഎമ്മിനെ പറ്റി ഒരു ചുക്കും അറിയാത്തതുകൊണ്ടാണ്. ഒന്ന് നടപ്പില്‍ വരുമ്പോള്‍ അതിന്റെ ഗുണദോഷം ആര്‍ക്കും അറിയില്ല. അപ്പോള്‍ അത് ദോഷമായാലോ? ഉദാഹരണത്തിന് കമ്പ്യൂട്ടര്‍ വന്നു. അത് ദോഷമായിരുന്നെങ്കിലോ? സാമൂഹ്യപ്രതിബദ്ധതയുള്ള ഒരു പ്രസ്ഥാനത്തിന് അത് സഹിക്കാന്‍ പറ്റുമോ?

അതുകൊണ്ടാണ് എല്ലാറ്റിനെയും ആദ്യം എതിര്‍ക്കുന്നത്. പിന്നീട് ദോഷമൊന്നുമില്ല ഗുണമേയുള്ളൂ എന്ന് കണ്ടെത്തിയാല്‍ അംഗീകരിക്കുന്നു. അങ്ങനെ അംഗീകരിച്ച ചില മേഖലകളില്‍ പക്ഷെ കൊള്ള നടക്കുന്നു. ആ കൊള്ള തടയാനാണ് സാമൂഹ്യപ്രതിബദ്ധത നിമിത്തം സ്വന്തമായി തന്നെ സംരംഭങ്ങള്‍ തുടങ്ങുന്നത്.

ടി വി വന്നപ്പോള്‍ അത് ദോഷമാണെന്ന് തോന്നി എതിര്‍ത്തു. പിന്നെ ഗുണമാണെന്ന് മനസ്സിലായപ്പോള്‍ വേറിട്ട ഒരു ചാനലില്‍ മാത്രമേ സാമൂഹ്യ പ്രതിബദ്ധത കാത്തുസൂക്ഷിക്കാന്‍ പറ്റൂ എന്ന് ബോധ്യമായി. അമ്യൂസ്മെന്റ്മെന്റ് പാര്‍ക്കുകളില്‍ പകല്‍ക്കൊള്ള തന്നെയായിരുന്നു. അങ്ങനെയാണ് വിസ്മയ തുടങ്ങിയത്. ആരെയും നിര്‍ബ്ബന്ധിക്കുന്നില്ലല്ലൊ. കൊള്ള വേണ്ടവര്‍ക്ക് കൊള്ള നടക്കുന്ന സ്ഥാപനങ്ങളില്‍ പോകാം. സാമൂഹ്യപ്രതിബദ്ധത വേണ്ടവര്‍ക്ക് സിപിഎംകാര്‍ നടത്തുന്ന സ്ഥാപനങ്ങളില്‍ തന്നെ പോകേണ്ടി വരും.

ഏകെജി ഹോസ്പിറ്റല്‍ , റബ്കോ , റെയിഡ്കോ ഇങ്ങനെ സിപിഎം നടത്തുന്ന സ്ഥാപനങ്ങള്‍ നോക്കുക. അതിന്റെയൊക്കെ ഉടമസ്ഥത ആര്‍ക്കാണ്? സാങ്കേതികമായി പറഞ്ഞാല്‍ അതൊക്കെ സഹകരണ മേഖലയില്‍ പ്രവര്‍ത്തിക്കുന്ന സ്ഥാപനങ്ങളാണ്. ഭരണസമിതിയും അതിലെ ജീവനക്കാരും തൊഴിലാളികളും എല്ലാം സിപിഎംകാര്‍ തന്നെ. ഇപ്രകാരം അനേകം സഹകരണ സ്ഥാപനങ്ങളാണ് സിപിഎമ്മിന്റെ ശക്തി.

ഓരോ സഹകരണസ്ഥാപനവും മറ്റ് അനേകം അനുബന്ധസ്ഥാപനങ്ങള്‍ തുടങ്ങും. ഉദാഹരണത്തിന് പ്രാഥമിക സഹകരണ ബാങ്കുകള്‍ ഗൃഹോപകരണ ഷോറൂമുകളും മറ്റ് കച്ചവട സ്ഥാപങ്ങളും തുടങ്ങും. റെയിഡ്കോ കറിപൌഡര്‍ വരെ ഉണ്ടാക്കി വില്‍ക്കുന്നുണ്ട്. റബ്കോ കണ്ണൂരില്‍ ഏറ്റവും ആധുനികമായ ഓഡിറ്റോറിയം പണിതിട്ടുണ്ട്. ദിനേശ് ബീഡി സഹകരണ സംഘത്തിനും ഓഡിറ്റോറിയവും സോഫ്റ്റ്‌വേര്‍ പാര്‍ക്കും മറ്റുമുണ്ട്. ഇവയിലെക്കെ പതിനായിരങ്ങള്‍ക്ക് ജോലി കൊടുക്കാം. അങ്ങനെ ജോലി കിട്ടിയവര്‍ പാര്‍ട്ടി പ്രവര്‍ത്തനങ്ങള്‍ക്കും പോയേ പറ്റൂ. സമ്മേളനങ്ങള്‍ക്കും ജാഥകള്‍ക്കും ബന്ദും ഹര്‍ത്താലും നടത്താനും ഒക്കെ ആയിരക്കണക്കിന് പ്രവര്‍ത്തകര്‍ സദാ സന്നദ്ധരായിരിക്കും.

സഹകരണ സംഘങ്ങള്‍ ഇങ്ങനെ പാര്‍ട്ടിയുടെ അധീനതയില്‍ കുറെ ഉണ്ടെങ്കിലും അതൊക്കെ പാര്‍ട്ടിക്ക് ഉപയോഗപ്പെടുത്താമെന്നല്ലാതെ പാര്‍ട്ടിക്കാരുടെ സ്വത്ത് എന്ന് പറഞ്ഞുകൂട. ഏത് സഹകരണ സംഘത്തിലും സര്‍ക്കാരിന് 51% ഓഹരിയുണ്ടാകും. ഏതെങ്കിലും ഒരു മൊശകോടന്‍ സഹകരണ മന്ത്രിയാവുകയാണെങ്കില്‍ ഭരണസമിതിയെ പിരിച്ചുവിട്ട് അഡ്മിനിസ്ട്രേറ്റര്‍ ഭരണം നടപ്പാക്കാന്‍ പറ്റും. അതുകൊണ്ട് സിപിഎം ഇപ്പോള്‍ തുടങ്ങുന്ന സ്ഥാപനങ്ങളും സംരംഭങ്ങളും എല്ലാം വെറും സൊസൈറ്റികള്‍ ആണ്. അതായത് ചാരിറ്റബിള്‍ സൊസൈറ്റി ആക്ട് പ്രകാരം റജിസ്റ്റര്‍ ചെയ്യുന്ന സൊസൈറ്റികള്‍.

പത്തോ നാല്പതോ സിപിഎം നേതാക്കള്‍ ചേര്‍ന്ന് ഒരു ചാരിറ്റബിള്‍ സൊസൈറ്റി റജിസ്റ്റര്‍ ചെയ്യുന്നു. ആ സൊസൈറ്റി സംരംഭം തുടങ്ങുന്നു. സഹകരണ സൊസൈറ്റി ആണെന്ന് അണികള്‍ ധരിക്കും. മരണപ്പെട്ടുപോയ ഏതെങ്കിലും നേതാവിന്റെ പേര് ആ സംരംഭത്തിന് നല്‍കിയാല്‍ സംഭവം പാര്‍ട്ടിയുടെ ആണെന്ന് അനുഭാവികള്‍ കരുതും. യഥാര്‍ത്ഥത്തില്‍ അതിന്റെ ഉടമസ്ഥത ആ സൊസൈറ്റിയുടെ അംഗങ്ങള്‍ക്ക് മാത്രമാണെന്ന് അണികള്‍ തിരിച്ചറിയുകയില്ല.

മേലെയുള്ള ചിത്രത്തില്‍ എം.ഡിറ്റിന്റെ ബോര്‍ഡ് നോക്കുക. കാഴ്ചയില്‍ ഒരു സ്വകാര്യസ്ഥാപനം പോലെ ഇല്ലേ? ഇതും ഒരു സൊസൈറ്റിയുടെ പേരില്‍ റജിസ്റ്റര്‍ ചെയ്യപ്പെട്ടതാണ്. സഹകരണ മേഖലയില്‍ അല്ല എന്നര്‍ത്ഥം. സഹകരണ സൊസൈറ്റിയും ചാരിറ്റബിള്‍ സൊസൈറ്റിയും തമ്മിലുള്ള വ്യത്യാസം സാധാരണ അനുഭാവികള്‍ക്ക് അറിയാന്‍ ന്യായമില്ല. ഏതെങ്കിലും കാലത്ത് പാര്‍ട്ടി പൊളിഞ്ഞുപോയാലും നേതാക്കള്‍ക്കും മേല്‍ത്തട്ടിലുള്ള പ്രവര്‍ത്തകര്‍ക്കും ഇങ്ങനെ ഒരുപാട് സംരംഭങ്ങള്‍ സ്വന്തമായി ബാക്കിയുണ്ടാവും. പാര്‍ട്ടിക്ക് ദീര്‍ഘകാലത്തേക്ക് നിലനില്‍പ്പ് ഉണ്ടാകില്ല എന്നും പാര്‍ട്ടി വിപ്ലവം സംഘടിപ്പിക്കാന്‍ പോകുന്നില്ല എന്നും സോഷ്യലിസം ഇനിയുള്ള കാലത്ത് ആളുകള്‍ ഉച്ചരിക്കുക പോലുമില്ലെന്നും ഏറ്റവും നന്നായി ബോധ്യപ്പെട്ടവര്‍ സിപിഎമ്മിന്റെ നേതാക്കള്‍ തന്നെയായിരിക്കുമല്ലൊ.

അങ്ങനെ സിപിഎം സ്വകാര്യ സൊസൈറ്റിയുടെ പേരില്‍ സ്വാശ്രയ എഞ്ചിനീയറിങ്ങ് കോളേജ് തുടങ്ങുമ്പോള്‍ ആ പാര്‍ട്ടിയുടെ വിശ്വാസ്യതയും സ്വീകാര്യതയും കുത്തനെ ഇടിയുകയാണെന്ന് അതിന്റെ നേതാക്കള്‍ക്ക് മനസ്സിലാകുന്നുണ്ടോ എന്നറിയില്ല. ആസ്തിയുടെയും ബിസിനസ്സ് സ്ഥാപങ്ങളുടെയും പിന്‍‌ബലത്തില്‍ ഒരു രാഷ്ട്രീയപ്രസ്ഥാനത്തെ ഏറെക്കാലം എന്തായാലും നടത്തിക്കൊണ്ടുപോകാന്‍ കഴിയില്ല.

ഡിവൈഎഫ്ഐ നേതാക്കള്‍ സാമൂഹ്യപ്രതിബദ്ധതയെ പറ്റി വാചാലമാകുന്നുണ്ടെങ്കിലും സാമൂഹ്യപ്രതിബദ്ധയുള്ള പ്രവര്‍ത്തകരെ സിപിഎമ്മിനോ പോഷകസംഘടനകള്‍ക്കോ ആകര്‍ഷിക്കാന്‍ ഇനി കഴിയില്ല എന്നതാണ് സത്യം. എനിക്ക് എന്ത് സാമ്പത്തികനേട്ടം ഉണ്ടാക്കാന്‍ കഴിയും, അല്ലെങ്കില്‍ എനിക്ക് എന്ത് ജോലി കിട്ടും എന്ന് ചിന്തിക്കുന്നവരെ മാത്രമേ ഇനി സിപിഎമ്മിന് ആകര്‍ഷിക്കാന്‍ കഴിയൂ. നിസ്വാര്‍ത്ഥരായ, സാമൂഹ്യപ്രതിബദ്ധതയുള്ള , സമൂഹത്തിന് വേണ്ടി തന്നാല്‍ കഴിയുന്ന സേവനം നല്‍കാന്‍ തയ്യാറുള്ള ആളുകള്‍ ഇനി സിപിഎമ്മില്‍ പോയിട്ട് എന്ത് കാര്യം?

സാമ്പത്തികമായി ഇങ്ങനെ മുന്നേറുന്നുണ്ടെങ്കിലും കേരളത്തില്‍ സിപിഎമ്മിന്റെ ഭാവി എന്തായിരിക്കും? നാലാം തവണയും പിണറായി സംസ്ഥാന സെക്രട്ടറിയായി തെരഞ്ഞെടുക്കപ്പെട്ടതോടുകൂടി വി.എസ്. അച്യുതാനന്ദന്‍ പാര്‍ട്ടിയില്‍ ഇനി ഉണ്ടായാലും ഇല്ലാത്തതിന് സമമായിരിക്കും. വി.എസ്. അതിഭയങ്കരമായ കൌശലം പ്രയോഗിച്ച് പൊതുസമൂഹത്തില്‍ ഒരു സ്വീകാര്യത പിടിച്ചു പറ്റിയിരുന്നു. പാര്‍ട്ടിക്ക് അകത്തും പുറത്തും വി.എസ്. എന്തോ ആണെന്ന ഒരു ഇമേജ് നിര്‍മ്മിച്ചെടുക്കാന്‍ അദ്ദേഹത്തിന് സാധിച്ചിരുന്നു. ആ ഇമേജ് സിപിഎം മുതലാക്കിയിട്ടുമുണ്ട്. എന്നാല്‍ ആ ഇമേജും തകരാനാണ് പോകുന്നത്. ‌

ഇത് വരെ സൂപ്പര്‍ വ്യവഹാരിയായി വിലസിയ വി.എസ്സിനെ പ്രതിരോധത്തിലേയ്ക്ക് തളച്ചിടാന്‍ പോരുന്ന കേസുകളാണ് അദ്ദേഹത്തെ കാത്തിരിക്കുന്നത്. അദ്ദേഹത്തെ പഴയത് പോലെ ഉപയോഗപ്പെടുത്താന്‍ ഇനി സിപിഎമ്മിന് കഴിയില്ല എന്ന് ചുരുക്കം.

പിണറായി ഒരു മികച്ച നേതാവും സംഘാടകനുമാണ്. എന്നാല്‍ അത് പാര്‍ട്ടിക്കകത്ത് മാത്രമാണ്. പാര്‍ട്ടിക്ക് പുറത്ത് പൊതുസമൂഹത്തില്‍ പിണറായിയെ ഇഷ്ടപ്പെടുന്ന ആരുമുണ്ടാവില്ല. എന്ന് മാത്രമല്ല, പാര്‍ട്ടിക്ക് വേണ്ടി പാര്‍ട്ടിക്ക് പുറത്തുള്ളവരെ വെറുപ്പിക്കാനും പിണറായി പിശുക്ക് കാട്ടാറില്ല. വി.എസ്സും പിണറായിയും കഴിഞ്ഞാല്‍ തലയെടുപ്പുള്ള ഒരൊറ്റ നേതാവും കേരള സിപിഎമ്മില്‍ ഇല്ല എന്നു പറയാം. കോടിയേരിക്ക് അങ്ങനെയൊരാഗ്രഹം കാണുമെങ്കിലും കണ്ണൂര്‍ ജില്ലയ്ക്ക് പുറത്ത് അദ്ദേഹത്തിന്റെ സ്വീകാര്യത സംശയമായിരിക്കും.

മാറിമാറി ഭരണത്തില്‍ കയറലും ഒട്ടേറെ സഹകരണ പ്രസ്ഥാനങ്ങളും തദ്ദേശസ്വയംഭരണ സ്ഥാപനങ്ങളും കൈയില്‍ ഉള്ളതും പിന്നെ ഇടതടവില്ലാത്ത സാമ്പത്തികവരുമാനവുമാണ് സിപിഎമ്മിനെ നിലനിര്‍ത്തുന്ന ഘടകങ്ങള്‍. എന്നാല്‍ പാര്‍ട്ടി ഒരു ഇടത് രാഷ്ട്രീയപ്രസ്ഥാനം എന്നതിനപ്പുറം സാമ്പത്തികനേട്ടങ്ങള്‍ കൊയ്യുന്ന എസ്റ്റാബ്ലിഷ്മെന്റ് കൂടിയാണെന്ന തിരിച്ചറിവ് അതിന്റെ ലക്ഷക്കണക്കിന് അനുയായികള്‍ക്ക് ഉണ്ടാവുമ്പോള്‍ ഒരു രാഷ്ട്രീയപാര്‍ട്ടി എന്ന നിലയില്‍ സിപിഎമ്മിന് മുന്നോട്ട് പോകാന്‍ കഴിയാതെ വരും. കുറച്ചു പേര്‍ കാശ് ഉണ്ടാക്കാന്‍ വേണ്ടി തങ്ങള്‍ എന്തിനാണ് ഉഷ്ണിക്കുന്നത് എന്ന് അനുയായികള്‍ക്ക് തോന്നാമല്ലൊ.

സ്വാശ്രയമേഖലയില്‍ പാര്‍ട്ടിക്കാരുടെ സ്വകാര്യസൊസൈറ്റി എഞ്ചിനീയറിങ്ങ് കോളേജ് ആരംഭിക്കുമ്പോള്‍ ആ തോന്നലിന് ആക്കം കൂടുകയാണ് ചെയ്യുക. ആത്മാവ് എന്നൊന്നുണ്ടെങ്കില്‍ കൂത്തുപറമ്പ് രക്തസാക്ഷികളുടെ ആത്മാവുകള്‍ ഈ സ്വാശ്രയക്കാര്‍ക്ക് മാപ്പ് നല്‍കട്ടെ.

കെ പി സുകുമാരന്‍ അഞ്ചരക്കണ്ടി

(ശിഥിലചിന്തകളില്‍ പ്രസിദ്ധീകരിച്ചത്)

News Quotes

സിപിഎം എന്ത് തുടങ്ങിയാലും അതില്‍ കൊള്ള ഉണ്ടാവില്ല. ഒരു പക്ഷെ മറ്റ് കൊള്ളക്കാരുടെ സ്ഥാപനങ്ങളിലും സിപിഎം സ്ഥാപനങ്ങളിലും ഒരേ വിലയും ചാര്‍ജ്ജും ഫീസും തന്നെയാണെങ്കില്‍ തന്നെയും സിപിഎമ്മിന്റേതില്‍ സാമൂഹ്യ പ്രതിബദ്ധത കാണും. അതാണ് അതിന്റെ മെച്ചം.

കോഴിക്കോട്ടെ എം ദാസന്‍ ഇന്‍സ്റ്റിറ്റ്യൂട്ട് ഓഫ് ടെക്‍നോളജിയുടെ കെട്ടിടം

കേരളം