malayal.am

കേന്ദ്രമന്ത്രിസഭാപുനഃസംഘടനയും വാലുമുറിയന്‍ പല്ലികളും

Gossip Mongers — Tue, 06 Nov 2012 03:39:35 +0000

കേന്ദ്രമന്ത്രിസഭ പുനഃസംഘടിപ്പിച്ചു. മുഖംമിനുക്കല്‍ എന്നാണു മാദ്ധ്യമങ്ങള്‍ സംഭവത്തെ വിശേഷിപ്പിച്ചത്. പക്ഷേ, സംഭവത്തില്‍ കോണ്‍ഗ്രസിലെ കേരളപ്രാദേശികമുന്നണിയിലെ രണ്ടു പ്രധാനസംഘാംഗങ്ങള്‍ക്കും പരാതിയാണു മിച്ചമുള്ളത്. ഉണ്ടവനു പാകിട്ടാഞ്ഞിട്ടാണു വാ പൊളിയുന്നതെങ്കില്‍, ഉണ്ണാത്തവന് ഉരുള കിട്ടാഞ്ഞിട്ടാണു കൈ ചൊറിയുന്നത് എന്ന വ്യത്യാസമേയുള്ളൂ.

മാണിക്കോണ്‍ഗ്രസാണ് ആദ്യം പരാതിയുടെ ഭാണ്ഡക്കെട്ടഴിച്ചത്. കേന്ദ്രമന്ത്രിസഭാപ്രവേശം കഥകളി, അഥവാ, കേന്ദ്രസര്‍ക്കാരില്‍ പേരിനെങ്കിലും ഒരു സീറ്റ് എന്ന ആ ഭാണ്ഡക്കെട്ട് അവര്‍ക്ക് ഒസ്യത്തായിക്കിട്ടിയതാണ്. ഇടയ്ക്കിടയ്ക്ക് അഴിക്കും. പന്നക്കവും പരിദേവനവും നെഞ്ചത്തടിയും നിലവിളിയും നടത്തും. പിന്നെയും ഭദ്രമായി പൊതിക്കെട്ട് പൊതിഞ്ഞു പാലായില്‍ പരണത്തുവയ്ക്കും, ഇനിയും വരുമല്ലോ മന്ത്രിസഭാപുനഃസംഘടന. അന്നും സീറ്റുതരാതിരിക്കുമല്ലോ. അന്നെടുക്കാം എന്ന മട്ടില്‍. ഇനിയെങ്ങാനും ഒരു മന്ത്രിസ്ഥാനമെങ്ങാനും കിട്ടിപ്പോയാലാണ് സംഗതി പ്രശ്‌നമാകുക എന്നുവരെ വേണമെങ്കില്‍ പറയാം.

പണ്ടൊരിക്കല്‍ എന്‍ഡിഎ മന്ത്രിസഭയിലൊരു ഒടിഞ്ഞതെങ്കില്‍ ഒടിഞ്ഞ കസേര കിട്ടിപ്പോയേക്കാമായിരുന്നു. അന്നാണ്, പി സി തോമസിനെ വെട്ടി, കോട്ടും സ്യൂട്ടും മലയാളം ഗ്ലാസ്‌നോസ്തിന്റെ ഒന്നുരണ്ടുപ്രതികളുമായി കെ എം മാണി ഡല്‍ഹിക്കു വണ്ടിപിടിച്ചത്. വണ്ടി പതിവിനുവിരുദ്ധമായി ലേറ്റാകാതെ ഡല്‍ഹി തൊട്ടു. പാലം വിമാനത്താവളത്തിലാണോ ഇറങ്ങിയതെന്നു നിശ്ചയമില്ല. പക്ഷേ, ആരോ പാലംവലിച്ചു. മാണിസാര്‍ കിട്ടിയ വണ്ടിക്കു തിരിച്ചുകേരളത്തിലേക്കു പോരേണ്ടിവന്നു. ഭാണ്ഡം വീണ്ടുമെടുത്തു തുറന്നു കരഞ്ഞു.

അന്നാണ് നായനാര്‍ മാണിയെ കളിയാക്കിയത്. കേന്ദ്രമന്ത്രിസഭാപുനഃസംഘടനയുടെ ചരിത്രത്തില്‍ കരിഞ്ഞ ലിപികളില്‍ എഴുതിവച്ചിരിക്കുന്ന സംഭവമാണ് മേല്‍പ്പറഞ്ഞ മാണിമാധവം കഥ. നല്ല മാണിക്കോത്ത് കസേരയൊരെണ്ണമാണ് അവസാനനിമിഷം കൈവിട്ടുപോയത്.

ഇപ്പോഴും സംഘടനയിലും പുനഃസംഘടനയിലും മന്ത്രിയില്ലാതെ വേവുകയാണു മാണിമനസ്സ്. പുത്രന്‍ ജോസ് കെ മാണിയെ എംപിയാക്കിയെടുത്തപ്പോള്‍ ഇനി മന്ത്രിയാക്കുക എന്നതായിരുന്നു മനസ്സിലിരുപ്പ്. എന്നാല്‍, മനോമോഹനവിചാരം അതേ പേരുള്ള സിംഹത്തിന്റെ അടുത്ത് എത്തിയില്ല. യുവത്വം എന്നാല്‍ അറുപതുവയസ്സ് എന്നു ഗുണനപ്പട്ടിക തെറ്റായിച്ചൊല്ലിശീലിച്ച രാഹുലന്‍ രാഹുവായി.

ലീഗിന് ഒരേയൊരു എംപി മാത്രമുള്ളപ്പോള്‍ അവര്‍ക്കു മന്ത്രിസ്ഥാനം കൊടുത്തതിനെച്ചൊല്ലിയായി പരിദേവനം. സംഗതി ശരിയാണ്. ലീഗിന് ഒരു എംപി പോലുമില്ലാത്തപ്പോഴും മന്ത്രിസ്ഥാനം കൊടുത്തെന്നിരിക്കും. കാരണം ലീഗ് കോണ്‍ഗ്രസിന്റെ സംസ്ഥാനഘടകത്തിന് ആ വിധത്തില്‍ ഒരു വെല്ലുവിളിയല്ല. ലീഗ് എന്നത് സംസ്ഥാനകോണ്‍ഗ്രസിനു പുറത്തുള്ള ഒരു സംഗതിയാണ്. കേരളകോണ്‍ഗ്രസ് അതല്ല, അത് സംസ്ഥാന കോണ്‍ഗ്രസിനുള്ളില്‍നിന്നു വിരിഞ്ഞുവന്നതും സംസ്ഥാനത്തുതന്നെ കൃത്യം മദ്ധ്യത്തില്‍ സ്ഥിതി ചെയ്യുന്നതുമായ ഒരു അരൂപിയാകുന്നു. അതിന് വളരാന്‍ വെള്ളവും വളവും മന്ത്രിസ്ഥാനവും ഒഴിച്ചുകൊടുക്കാനുംമാത്രം തലയില്‍ ആള്‍താമസമില്ലാത്തവരാണോ കോണ്‍ഗ്രസുകാര്‍? ഇതേ സ്ട്രാറ്റജി തന്നെയാണ് സംസ്ഥാനത്തും സീറ്റും മന്ത്രിസ്ഥാനവും പങ്കുവയ്ക്കുമ്പോഴും സംഭവിക്കുന്നതെന്ന് പാവം മാണിസാറിന് അറിയാഞ്ഞിട്ടാണോ അതോ മൊത്തത്തില്‍ അങ്ങനെ പ്രിട്ടന്റു ചെയ്യുകയാണോ?

ഇപ്പോള്‍ മാണിയുടെ ഭാഷയില്‍ പറഞ്ഞാല്‍ ഉണ്ടിരിക്കുന്നവനും പായയ്ക്കുവേണ്ടി ആവലാതിയും കോട്ടുവായും വിട്ടുതുടങ്ങിയിരിക്കുന്നു. ലീഗിന് മന്ത്രിയുണ്ട്, പക്ഷേ, കാബിനറ്റില്ല. മന്ത്രി ലീഗിന്റെ സ്ഥിരം ഡല്‍ഹിക്കുറ്റിയായ ഇ അഹമ്മദു തന്നെ. പക്ഷേ, കാബിനറ്റിനുപകരം കാല്‍ ബിനറ്റേ ഉള്ളൂ. എന്നു പറഞ്ഞാല്‍ ഒരു കാബിനറ്റു മന്ത്രിയുടെ കാല്‍ഭാഗം പവറേ ഈ മന്ത്രിക്കുള്ളൂവെന്ന്. അതാണവറ്റേന്റെ പരാതി.

ഒരേയൊരു എംപിയും ഒന്നരജില്ലയില്‍ സ്വാധീനവുമുള്ളവനും വേണ്ടത് കാബിനറ്റ് പദവി. പണ്ട് മുസ്ലിം ലീഗിന്റെ നേതാവ് കേരള സംസ്ഥാന മുഖ്യമന്ത്രിയായി. അന്നത് കോണ്‍ഗ്രസ് മുന്നണിയിലെ അലമ്പുകാരണമായിരുന്നു. എന്നാലും ആ പാരമ്പര്യം വച്ചുകൊണ്ട് മുസ്ലിം ലീഗ് പ്രധാനമന്ത്രിസ്ഥാനം ചോദിക്കാത്തതുതന്നെ ഇന്ത്യന്‍ ജനാധിപൈത്യത്തിന്റെ മുജ്ജന്മസുകൃതം!

ജോസ് കെ മാണി

പരിഹാസം

Country:

Default Home Page

UK Home Page

Authors:

Gossip Mongers

പാചകവാതകത്തിന്റെ പേരിലൊരു വാചകപാതകം

Gossip Mongers — Tue, 18 Sep 2012 08:50:05 +0000

മമതയെന്നാണു തന്റെ പേര്. മമതയെന്നാല്‍ എന്തിനോടെങ്കിലുമുള്ള മമത്വംതന്നെയെന്നാണ്. എന്നാല്‍, താന്‍ എന്നും മമ എന്ന രണ്ടക്ഷരത്തിലാണ് ഊന്നിയിട്ടുള്ളത്. മമ എന്നാല്‍ അവനവന്റേത് എന്നാണല്ലോ അര്‍ത്ഥം. പിന്നെ, മൂന്നാമത്തെ അക്ഷരമായ ത ആണെങ്കില്‍ തരൂ എന്നും അര്‍ത്ഥമുല്പാദിക്കും. ഉദാഹരണത്തിന് രൂപതാ, അതിരൂപതാ എന്നീ വാക്കുകള്‍ നിങ്ങള്‍ക്കേവര്‍ക്കും പരിചയമുണ്ടായിരിക്കുമല്ലോ.

അപ്പോള്‍ മമതയെന്നാല്‍ തനിക്കു താ, തനിക്കു കിട്ടുക എന്നെല്ലാം അര്‍ത്ഥം വരും. തനിക്കെന്തെങ്കിലും തരപ്പെടാതെ പോയാല്‍ കശപിശയായി, പിടിവലിയായി, അതായി, ഇതായി...

അങ്ങനെ പണ്ടു കാങ്ക്രസുകാരിയായിരുന്ന താന്‍ വടവൃക്ഷത്തെ വെടിഞ്ഞു തൃണമൂലമായി. കാറ്റത്തും മഴയത്തും മാമരങ്ങള്‍ ഒടിഞ്ഞേക്കാം, കടപുഴകിയേക്കാം, പക്ഷേ, പുല്‍ക്കൊടികള്‍ നിലംപൊത്താറില്ല എന്ന ന്യായേനയാണ് അതായത്. പുല്‍ക്കൊടികള്‍ക്ക് സമൃദ്ധമായി വളരാന്‍ മാമരങ്ങളുടെ ചുവടുവേണമെന്നുമാത്രം. അതിന്റെ തണലുപറ്റേണ്ടിവരുമെന്നുമാത്രം. പിന്നെ, കാറ്റും മഴയും വരുമ്പോള്‍ അല്പമൊന്നും വളഞ്ഞുംപുളഞ്ഞും കൊടുക്കണം. ഫ്‌ളെക്‌സിബിലിറ്റി എന്നാണിതിനുപേര്. കാറ്റിനുതോന്നണം, ഹൗ, ആ പുല്‍ക്കൊടികളെ താനിട്ടു മെതിക്കുകയാണെന്ന്. രാഷ്ട്രീയത്തിലാകുമ്പോള്‍ ഇതിനെ പൊളിറ്റിക്കല്‍ ഫ്‌ളെക്‌സിബിലിറ്റി എന്നു പറയും. അതാണു താന്‍ തൃണമൂലത്തിലേക്കു മാറിയത്. പുല്ലിനെ തൃണവല്‍ഗണിക്കരുതെന്ന് മേതില്‍ രാധാകൃഷ്ണന്‍ പറഞ്ഞതും താന്‍ തൃണവല്‍ഗണിച്ചിട്ടില്ല.

കാങ്കിരസിന്റെ തറവാട്ടില്‍നിന്നു പടിയിറങ്ങിയെങ്കിലും താമസം പടിപ്പുരയില്‍ത്തന്നെയാണ്. അതുകൊണ്ടുള്ള ഗുണം മച്ചകത്തേക്കു നോക്കി എപ്പോള്‍വേണമെങ്കിലും കുരയ്ക്കാമെന്നതാണ്. കുരയൊഴിയാന്‍ അകത്തുള്ളാളുകളെപ്പോലും അവഗണിച്ച് തറവാട്ടമ്മയും മിണ്ടാട്ടം മുട്ടം അട്ടംനോക്കിക്കിടക്കുന്ന മുതുകാരണവരും ഏറ്റവും നല്ല ഇറച്ചിത്തുണ്ടം തന്നെ തരികയും ചെയ്യും. എല്ലാംകൊണ്ടും കുശാല്‍.

പിന്നെ, ഈയിടെയുള്ള ഒരേയൊരു അസ്‌കിത അന്ത്യശാസനത്തിന്റേതാണ്. ഏറിയാല്‍ ആഴ്ചയിലൊന്ന്, അതിലും കവിഞ്ഞാല്‍ മാസത്തിലൊന്ന്, എന്നിട്ടും നിന്നില്ലെങ്കില്‍ രണ്ട് അമാവാസികള്‍ക്കിടയിലൊരുനാളെങ്കിലും അന്ത്യശാസനം പുറപ്പെടുവിച്ചില്ലെങ്കില്‍ പിന്നെ, പിടിച്ചാല്‍ കിട്ടില്ല. ശ്വാസാനന്ദംഗുളിക തേനിലരച്ചുകഴിച്ചാലൊന്നും ശ്വാസമോ ആശ്വാസമോ കിട്ടില്ല. അവിപത്തി കുഴച്ചുതട്ടിയാലും വിരേചനം കഷ്ടി. വലിയ ചന്ദനാദി കുടന്നക്കണക്കിനു നിറുകില്‍കമിഴ്ത്തിയാലും നിദ്രയും തഥൈവ. ഒന്നുകില്‍ അന്ത്യശാസനം അല്ലെങ്കില്‍ അന്ത്യശ്വാസം എന്നമട്ടിലാണു തന്റെ കാര്യങ്ങള്‍.

തറവാട്ടില്‍ എന്തു തീരുമാനമെടുക്കലുണ്ടായാലും ഉടനെ താന്‍ അന്ത്യശാസനം പുറപ്പെടുവിച്ചിരിക്കും. നേരത്തേതന്നെ കെട്ടിപ്പൊതിഞ്ഞുവച്ചിരിക്കുന്ന കുട, വടി, ചെരിപ്പ്, സോപ്പ്, ചീപ്പ്, കണ്ണാടി തുടങ്ങിയവയുടെ ഭാണ്ഡമെടുത്ത്, അന്ത്യശാസനം ടെലിഗ്രാം, മുദ്രപ്പത്രം, ഈമെയില്‍, അന്‍പതുപൈസക്കാര്‍ഡ് ഇത്യാദികള്‍ വശം തറവാട്ടിലേക്കു കൊടുത്തയയ്ക്കും.

കാര്‍ഡു കിട്ടിയാലൊന്നും കണ്ടെന്നു നടിക്കില്ല ഭരതമുനിയെയും നവരസനാട്യത്തെയും അരച്ചുകലക്കിക്കുടിച്ച കെട്ടിലമ്മയും മുതുകാര്‍ന്നോരും കിങ്ങിണിക്കുട്ടനും. ഭരതനാട്യത്തില്‍ താനാണോ അവരാണോ കേമര്‍? കൊള്ളാം. താന്‍ പത്തൊന്‍പതാമത്തെ അടവിലേക്കു ചുവടുമാറും. കാര്‍ഡയച്ചിട്ടേയില്ലെന്ന മട്ടുകാട്ടും. അന്ത്യശാസനത്തിന്റെ കാര്യം നാട്ടിലെമ്പാടുമുള്ള പത്രങ്ങളിലും ചാനലുകളിലും പൊടിപ്പും തൊങ്ങലും വച്ചുവരും. അയിച്ചിട്ടുണ്ടെന്നു ചിലരോടും ഇല്ലെന്നു മറ്റുചിലരോടും താനും പറയും. അവസാനം ഉവ്വോ ഇല്ലയോ എന്ന കാര്യത്തില്‍ മാദ്ധ്യമങ്ങള്‍ തമ്മില്‍ തര്‍ക്കമാകും, തല്ലുംപിടിയുമാകും.

തനിക്ക് ഇടയ്ക്കിടെ അന്ത്യശാസനത്തിന് ഇന്ധനമാകുന്നത് പെട്രോള്‍, ഡീസല്‍, പാചകവാതകം തുടങ്ങിയവയാണ്. പാചകവാതകം സഹായിച്ച് തന്റെ വാചകപാതകത്തിന് മുട്ടുണ്ടായിട്ടില്ല. തന്നെ പ്രകോപിപ്പിക്കാനെന്നോണം കാര്‍ന്നോമ്മാരും കെട്ടിലമ്മയും ചേര്‍ന്ന് ഇടയ്ക്കിടെ ഇന്ധനചന്ദനാദികളുടെ വില വര്‍ദ്ധിപ്പിച്ചുകൊണ്ടിരിക്കുകയും ചെയ്യും. ഒരു കേറ്റത്തിന് ഒരിറക്കം വേണമെന്ന് പഴമൊഴിസംഹിതയില്‍ പറഞ്ഞിരിക്കുന്നതു പാലിക്കാന്‍ ആവശ്യത്തിലുമേറ്റിവച്ച്, അതിന്മേല്‍ ഇറക്കം കൊടുക്കുന്നതാണ് രീതി. ഇല്ലെങ്കില്‍ ആര്‍ഷന്മാര്‍ ഹര്‍ഷിക്കില്ലെന്നുതന്നെയല്ല, വികര്‍ഷിക്കുകയും വര്‍ഷപാതമുണ്ടാകയും ചെയ്യും.

ഇതിനുമുന്‍പും വിലവര്‍ദ്ധനയുടെ പേരില്‍ തന്റെ അന്ത്യശാസനങ്ങളുണ്ടായിട്ടുണ്ട്. ഇപ്പോള്‍ ഉണ്ട്. ഇനി ഉണ്ടായിരിക്കുകയും ചെയ്യും. താന്‍ പടിപ്പുരയുടെ പടികടക്കുന്നോ ഇല്ലയോ എന്നതല്ല പ്രശ്‌നം, ഇന്ധനവിലയേറ്റവും തന്റെ അന്ത്യശാസനവും അന്ത്യമില്ലാതെ തുടരുന്നുണ്ടോ എന്നതു മാത്രം.

പരിഹാസം

Country:

Default Home Page

UK Home Page

Authors:

Gossip Mongers

മൂന്നു കുഞ്ഞുങ്ങള്‍ അഥവാ, നമ്മുടെയീ കുഞ്ഞുകേരളം

Anvar Abdullah — Fri, 14 Sep 2012 12:44:21 +0000

കേരളത്തെപ്പറ്റി ഇത്രകാലവും പറഞ്ഞുവന്നിരുന്നത് നമ്മുടെ കൊച്ചുകേരളം എന്നാണ്. ഇന്ത്യന്‍ ഉപഭൂഖണ്ഡത്തിന്റെ തെക്കേയറ്റത്ത് പാവയ്ക്കുയുടെ പടുതിയില്‍ ഞാന്നുകിടക്കുകയും ഇന്ത്യന്‍ മഹാസമുദ്രത്തില്‍ കാല്‍നനച്ചുരസിക്കുകയും ചെയ്യുന്ന ഈ കൊച്ചുഭൂമിയെ ഭൂമിമലയാളമെന്നും പറയാറുണ്ട്. ഭൂമിയില്‍ നിറയെ മലയാളികളുള്ളതുകൊണ്ട് ഈ വിളിപ്പേര് ഭൂലോകത്തിലെ ആകമാനം മലയാളിസമൂഹത്തെ അഭിസംബോധന ചെയ്താണെന്നും അഭ്യൂഹമുണ്ട്. ഇന്നിപ്പോള്‍ ഭൂമിയിലെ സകലമാന വ്യവസായഭീമന്മാരെയും ഈ കൊച്ചുകേരളത്തിലേക്ക് സ്വാഗതം ചെയ്തുകൊണ്ട് മലയാളശ്രീ ഉടുത്തൊരുങ്ങി ഒരുമ്പെട്ടവളായി നില്‍ക്കുന്ന വേളയില്‍ കൊച്ചുകേരളം എന്ന വിളിപ്പേര് മാറുകയാണോ എന്നാണു സംശയം. എമര്‍ജിംഗ് കേരളമെന്നാണ് ഇംഗ്ലീഷില്‍ ഈ കൊച്ചുഭൂമിക്ക്, ഈ വലിയ വിപണിക്ക് അധികാരികള്‍ പേരുനല്കുന്നതെങ്കിലും കൊച്ചുകേരളം ഇതിനിടെ പേരുമാറി കുഞ്ഞുകേരളമാകുന്നുവോ എന്നാണു ചിലര്‍ക്കെങ്കിലും ഉദിക്കുന്ന സംശയം.

കേരളം വളരുന്നു എന്നു പണ്ടുപണ്ടേ പറഞ്ഞത് മഹാകവി പാലായാണ്. കേരളം വളര്‍ന്നാലും വളര്‍ന്നില്ലെങ്കിലും പാലാ വളരുമെന്നു പറഞ്ഞത് പാലാക്കാരന്‍ മാണിസാറാണ്. പാലായുടെയും മാണിസാറിന്റെയും കുടുംബത്തിന്റെയും വളര്‍ച്ചകണ്ടാണോ പാലാക്കാരന്‍ മഹാകവി കേരളം വളരുന്നു എന്നു വച്ചുകാച്ചിയത് എന്നറിയണമെങ്കില്‍ ഇക്കാര്യത്തില്‍ ഒരു പുനരന്വേഷണം ആവശ്യമാണ്. ഈ സര്‍ക്കാര്‍ പുനരന്വേഷണത്തിന്റെ ആശാന്മാരാണ് എന്നതിനാല്‍ അക്കാര്യത്തിലും അവരുടെ ബഹുമാന്യശ്രദ്ധ ക്ഷണിക്കുകമാത്രം ചെയ്യട്ടെ.

മഹാകവി പാലായ്ക്കു ശേഷം പാലയില്‍നിന്നിറങ്ങി കേരളത്തിലുടനീളം പെരിസ്‌ട്രോയിക്ക, പെരിസ്‌ട്രോയിക്ക എന്നു പറഞ്ഞുകൊണ്ടു കറങ്ങിനടക്കുകയും ചെയ്യുന്ന ആളാണ് മേല്‍പ്പറഞ്ഞ മാണിസാറ്. മാണിസാറിനെ കൊച്ചുകേരളം, സോറി, കുഞ്ഞുകേരളം വളരെ സ്‌നേഹത്തോടെ വിളിക്കുന്ന പേരാണ് കുഞ്ഞുമാണിയെന്ന്. അങ്ങനെ വിളിക്കുന്നതും എഴുതുന്നതും പറയുന്നതും വായിക്കുന്നതുമൊക്കെ കൊള്ളാം, എഴുതിയോ പറഞ്ഞോ വരുമ്പോള്‍ മകാരം ഇരട്ടിക്കാതെ ശ്രദ്ധിക്കേണമേ!

ഇതാണ് ഒന്നാമത്തെ കുഞ്ഞ്. രണ്ടാമതൊരു കുഞ്ഞുണ്ട് കുഞ്ഞുകേരളത്തില്‍. സാക്ഷാല്‍ കുഞ്ഞുകുഞ്ഞ്. അതായത് കുഞ്ഞിരട്ടിച്ചുണ്ടായ കുഞ്ഞുകുഞ്ഞ്. പുതുപ്പള്ളീലെ കുഞ്ഞൂഞ്ഞ് എന്നു മതിലുകളിലെഴുതിവച്ചാല്‍ വൈക്കം മുഹമ്മദു ബഷീറുപോലും വന്ന് വോട്ടുചെയ്തുപോകുന്ന മഹാമേരു. ഓസിയെന്നും ചിലര്‍ ഇദ്ദേഹത്തെ ഓസിനുവിളിക്കാറുണ്ട്. ഓസീയാര്‍ എന്ന സംശയം കേരളത്തിലെ ഒരു വൈകിട്ടെന്താ പരിപാടിക്കാര്‍ക്കും ഉണ്ടാകില്ല. ഇദ്ദേഹമാണു രണ്ടാമത്തെ കുഞ്ഞ്. അഥവാ, ഇരട്ടക്കുഞ്ഞ്.

മൂന്നാമത്തെ കുഞ്ഞ്, ഒരു കാവ്യനീതിക്കുവേണ്ടി കേരളത്തിന്റെ വടക്കുന്നാണ്. വടക്കെന്നുപറഞ്ഞാല്‍ വടക്കുന്നാഥനും വടക്ക്. വെടക്കാക്കി തനിക്കാക്കുന്നതെങ്ങനെയെന്ന് ഇഎംഎസ് പഠിച്ച കളരി കൂടിയാണീ വടക്ക്. അവിടത്തെ ഈ കുഞ്ഞ് തുടക്കത്തില്‍ കുഞ്ഞായിരുന്നാലും ഒടുക്കം കുട്ടിയായും പിന്നെയും കാലം ചെന്നാറെ കട്ടിയായും കട്ടിക്കാരനായും മാറും. അതാണു കുഞ്ഞാലിക്കുട്ടി, അഥവാ, മൂന്നാംകുഞ്ഞ്.

ഇങ്ങനെ ഖജനാവു കൈയാളും കുഞ്ഞുമാണി, മുഖ്യമന്ത്രിസ്ഥാനം കൈയാളും കുഞ്ഞൂഞ്ഞ്, വ്യവസായം കൈയാളും കുഞ്ഞാലിക്കുട്ടി എന്നീ മൂന്നു കുഞ്ഞുങ്ങളും ചേര്‍ന്നു നടത്തുന്ന ഒരു കുഞ്ഞുകളിയായിരിക്കുകയാണ് ഇന്നു കേരളത്തിന്റെ അവസ്ഥ. ഈ മൂന്നു കുഞ്ഞുങ്ങള്‍ കളിക്കാന്‍ വരുമ്പോള്‍, അഥവാ, അയ്യഞ്ചു കൊല്ലം കൂടുമ്പോള്‍ കേരളം പറക്കാന്‍ തുടങ്ങും. ജിമ്മില്‍ പോയി മസിലുപെരുപ്പിക്കും, പാറിപ്പറന്ന്, അങ്ങ് എമേര്‍ജ് ചെയ്യും. കുഞ്ചന്‍ നമ്പ്യാരുടെ ഭാഷയില്‍ പാടിപ്പറഞ്ഞാല്‍ കുഞ്ഞായിട്ടിരിക്കുന്നു, മുത്തച്ഛനവനുണ്ട് എന്ന മട്ടിലാണ് കേരളം കാലനില്ലാത്ത കാലത്തിലേക്കുള്ള എമേര്‍ജിംഗ് തുടരുന്നത്.

എഴുത്തുകാരന്‍ സക്കറിയയുടെ ഒരു കഥയുടെ പേരാണ് മൂന്നുകുഞ്ഞുങ്ങള്‍ എന്നത്. മൂന്നുകുഞ്ഞുങ്ങള്‍ സ്വര്‍ഗത്തിലെത്തുന്നതും ദൈവത്തെ കാണുന്നതുമാണ് കഥ. ഇവിടെ, ഈ മൂന്നു കുഞ്ഞുങ്ങളും കൂടി ദൈവത്തിന്റെ സ്വന്തം നാടിനെ അങ്ങു സ്വര്‍ഗത്തിലേക്ക് എമേര്‍ജു ചെയ്യിച്ച് അതിന്റെ പതിനാറടിയന്തിരം തീരുമാനിച്ച്, അതിന്റെ സദ്യയ്ക്ക് കമ്മീഷന്‍ വാങ്ങാനാണോ ആലോചിക്കുന്നതെന്നത് വഴിയേ അറിയാം. അധികം വൈകാതെ.

പരിഹാസം

Country:

Default Home Page

UK Home Page

Authors:

Gossip Mongers

അധ്വാനവര്‍ഗ്ഗസിദ്ധാന്തം ബ്രിട്ടണില്‍ സൂപ്പര്‍ഹിറ്റ്

Prasanth Kalathil — Sat, 08 Sep 2012 07:53:55 +0000

ലണ്ടനിൽ മഴ ചാറുന്നുണ്ടായിരുന്നു. വെസ്റ്റ് മിൻസ്റ്റർ കൊട്ടാരത്തിന്റെ പുറത്ത് സ്ഥാപിച്ചിരുന്ന വലിയ സ്‌ക്രീനുകൾക്ക് മുന്നിൽ കുട ചൂടിക്കൊണ്ട് സ്ഥാനം പിടിച്ചവർക്ക്, പോക്കുവെയിലും ചാറ്റൽമഴയും ചേർന്ന് കൊട്ടാരത്തിനു നൽകിയ ശോഭ അദ്ദേഹത്തിനു വേണ്ടി പ്രകൃതി ഒരുക്കിയ പ്രത്യേക വിരുന്നായിതോന്നി. പാലായുടെയല്ല, കേരളത്തിന്റെ മാണിക്യം കെം എം മാണി ബ്രിട്ടീഷ് പാർലമെന്റിൽ നടത്തുന്ന ചരിത്രപ്രധാനമായ പ്രഭാഷണത്തിനായി ആ രാജ്യം മുഴുവൻ കാതോർത്തിരിക്കുകയായിരുന്നു. ബിബിസി പരിപാടിയുടെ തത്സമയ സം‌പ്രേക്ഷണം നടത്തുന്നുണ്ടെന്ന് ആഴ്ചകൾക്ക് മുൻപേതൊട്ട് പ്രേക്ഷകരെ അറിയിച്ചുകൊണ്ടിരുന്നത് എല്ലാവർക്കും സൌകര്യപ്രദമായി.

പ്രഭാഷണത്തിന്റെ കർട്ടൺ റൈസറായി ബിബിസിയിലും മറ്റു ചാനലുകളിലും മാണിസാറിനെക്കുറിച്ചുള്ള പല പരിപാടികളും കാണിക്കുന്നുണ്ടായിരുന്നു. പാലാ മുനിസിപ്പാലിറ്റിയുടെ പല ദൃശ്യങ്ങൾ, മീനച്ചിലാറ്റിലെ വെള്ളം, കുരിശുപള്ളി, അദ്ദേഹത്തിന്റെ കുട്ടിക്കാലത്തെ പല പല ചിത്രങ്ങൾ എന്നിവ കേരവും വികസനവും ഒരുപോലെ തിങ്ങിനിറഞ്ഞ കേരളത്തിന്റെ ചിത്രങ്ങളോടൊപ്പം കാണിക്കുന്നുണ്ടായിരുന്നു.

സാധാരണക്കാരും പ്രശസ്തരുമായ ആൾക്കാർക്ക് അദ്ദേഹത്തെപ്പറ്റിയുള്ള അഭിപ്രായം ഇംഗ്ലീഷ് സബ്ടൈറ്റിലോടെ കാണിച്ചു. അരമനയിലെ തിരുമേനി മാണിസാറിനെക്കുറിച്ച് ഇംഗ്ലീഷിൽത്തന്നെ ഹെല്ലോ ബ്രിട്ടണേഴ്സ് എന്ന് അഭിസംബോധന ചെയ്തുകൊണ്ട് പറഞ്ഞത് ഇംഗ്ലീഷ് ജനതയെ അൽഭുദാദരങ്ങളിൽ മുക്കിക്കളഞ്ഞു. എല്ലാവകുപ്പുകളും ഒരുമിച്ച് ഇദ്ദേഹത്തിനു കൈകാര്യം ചെയ്യാനാവാത്തത് കേരളത്തിന്റെ നഷ്ടമാണെന്ന് തിരുമേനി പ്രത്യേകം പറയുകയുണ്ടായി.

ലോകം മുഴുവൻ ഇരുപത്തിനാലും മണിക്കൂറും ഉറ്റുനോക്കിക്കൊണ്ടിരിക്കുന്ന കേരളത്തിന്റെ മുഖ്യമന്ത്രിയുടെ ആപ്പീസിൽ മാണിസാർ കയറിയിറങ്ങുന്ന ദൃശ്യങ്ങൾ, മുഖ്യമന്ത്രി, വ്യവസായ മന്ത്രി, ചീഫ് വിപ്പ്, പ്രതിപക്ഷ നേതാവ്, അയല്‍ സംസ്ഥാനങ്ങളിലെ മുഖ്യമന്ത്രിമാർ, കേന്ദ്രമന്ത്രിമാർ, ഉദ്യോഗസ്ഥപ്രമുഖർ തുടങ്ങിയവർക്ക് ഭരണോപദേശം നൽകുന്നതിന്റെയും പി സി തോമസിനെ സ്നേഹത്തോടെ മോനേ... എന്നു വിളിക്കുന്നതിന്റെയും ദൃശ്യങ്ങൾ ആവർത്തിക്കുകയുണ്ടായി. പി ജെ ജോസഫ് ഒന്നര വർഷം മുൻപ് സംവിധാനം ചെയ്ത ഒരു കുടയും കുഞ്ഞുമാണിയും എന്ന ഹ്രസ്വചിത്രത്തിന്റെ ഭാഗങ്ങളുമുണ്ടായിരുന്നു.

ഉപചാരങ്ങൾക്ക് ശേഷം പതിഞ്ഞ ശബ്ദത്തിൽ ലോകത്തെ അധ്വാനിക്കുന്ന ജനവിഭാഗത്തിന്റെ വിധി മാറ്റിക്കുറിക്കാൻ പ്രാപ്തമായ ആ പ്രസംഗം തുടങ്ങി. മലയാളികൾക്ക് സുപരിചിതമായ മാണിസാറിന്റെ ഇടയ്ക്കിടയ്‌ക്കുള്ള തൊണ്ടകൊണ്ടുള്ള ആ പ്രത്യേകശബ്ദം കേൾപ്പിച്ചുകൊണ്ട് കോട്ടിട്ട സായിപ്പന്മാരെപ്പോലും നാണിപ്പിക്കുന്ന കോട്ടയം കോൺ‌വെന്റ് വടിവിൽ അദ്ദേഹം തന്റെ അധ്വാനവർഗ്ഗസിദ്ധാന്തം അവതരിപ്പിച്ചു.

സംസാരം തുടങ്ങി ഏതാനും മിനിറ്റുകൾക്കകം ബ്രിട്ടൺ നിശ്ചലമായപോലെ തോന്നി. വാഹങ്ങൾ വഴിയോരത്ത് നിർത്തിയിട്ട് റേഡിയോയിൽ പ്രഭാഷണം കേൾക്കുകയായിരുന്നു. കൂറ്റൻ കെട്ടിടങ്ങളുടെ ചുമരുകളിൽ സ്ഥാപിച്ച എൽ‌ഇ‌ഡി സ്ക്രീനുകളിൽ മാണിയെ നോക്കി നിൽക്കുകയായിരുന്നു സൂര്യനസ്തമിക്കാത്ത സാമ്രാജ്യത്തിന്റെ സ്വന്തം ജനത.

ജനങ്ങൾ ആരും പറയാതെ തന്നെ സ്വമേധയാ മൊബൈൽ ഫോണുകൾ ഓഫ് ചെയ്തു. വാഹനങ്ങൾ ഹോൺ മുഴക്കിയില്ല. ലണ്ടൻ മെട്രോയിലും (ട്യൂബ്) നഗരത്തിലോടുന്ന ബസുകളിലും രാജ്ഞിയുടെ ജനത അദ്ദേഹത്തെ കണ്ടു, ശ്രവിച്ചു. വാചകങ്ങളുടെ ഇടവേളകളിൽ നിർത്താതെ പെയ്യുന്ന നനുത്ത മഴയുടെ താളം മാത്രമേ മറ്റൊരു ശബ്ദമായി കേൾക്കാനുണ്ടായിരുന്നു.

ബക്കിങ്ഹാം കൊട്ടാരത്തിലും എല്ലാവരും ടിവിയ്ക്കു മുന്നിലായിരുന്നു. പരിപാടികണ്ടുകൊണ്ട് അമ്മമഹാറാണി ഇടയ്ക്കിടയ്ക്ക് ഹാഹാ എന്നു പറഞ്ഞിരുന്നത് കൂർക്കം വലിയാണെന്ന് ആരോ കരുതിയത് തെറ്റിദ്ധാരണ പരത്താൻ ഇടയാകുകയും കൊട്ടാരം പിന്നീട് മാണിസാറിനോട് മാപ്പപേക്ഷിക്കുകയും ചെയ്തു.

ചടങ്ങ് നടന്ന ഹാളിൽ മാണിസാറിനെ കൂടാതെ ഇന്ത്യൻ വംശജരായ മൂന്നു എം‌പിമാരും പൊതുസഭയുടെ ഡെപ്യൂട്ടിസ്പീക്കറും ബിബിസിയുടെ ക്രൂവും മാത്രമേ ഉണ്ടായിരുന്നു. മറ്റു എംപിമാർ മഴയത്തുനിന്ന് പൊതുജനത്തിന്റെ കൂടെയാണ് പരിപാടി വീക്ഷിച്ചത്. പാർലമെന്റിലെ മറ്റു ഹാളുകൾ കിട്ടാത്തതുകാരണം ഹൌസ് കീപ്പിങ് സ്റ്റാഫിനുള്ള പാൻ‌ട്രിയിൽ വച്ചാണ് ചടങ്ങ് നടന്നതെന്ന് ഇത് പിന്നീട് വിശദീകരിക്കപ്പെട്ടെങ്കിലും ചടങ്ങു സംഘടിപ്പിക്കുന്നതിൽ വന്ന വീഴ്ചയെപ്പറ്റി പാർലമെന്ററി സമിതി അന്വേഷണം നടത്താൻ പ്രധാനമന്ത്രി ഡേവിഡ് കാമറൂൺ ആവശ്യപ്പെട്ടിട്ടുണ്ട്. ഇക്കാര്യത്തിൽ ലോകരാഷ്ട്രങ്ങൾ തങ്ങളുടെ ആശങ്ക കാമറൂണിനെ അറിയിച്ചു കഴിഞ്ഞു. യൂയെൻ സിക്രട്ടറി ജനറൽ ബാൻ കി മൂൺ അന്വേഷണ റിപ്പോർട്ടിന്റെ കോപ്പി ആവശ്യപ്പെട്ടിട്ടുണ്ട്. അന്വേഷണ സമിതിയിൽ ഇന്ത്യയുടെ പ്രതിനിധികളായി ജോസ് കെ മാണി എം‌പിയും പാലാ നഗരസഭാ ചെയർമാനും ഉണ്ടാവും.

ജനക്കൂട്ടത്തിനിടയിലുണ്ടായിരുന്ന ഇന്ത്യാക്കാർക്ക്, പ്രത്യേകിച്ച് പാലാ, ഭരണങ്ങാനം മുനിസിപ്പാലിറ്റികളിൽനിന്നുള്ള സത്യകൃസ്ത്യാനികൾക്ക് അഭിമാനത്തിന്റെ ഏതാനും മണിക്കൂറുകളായിരുന്നു ഇന്നലെ പാർലമെന്റ് മന്ദിരം സമ്മാനിച്ചത്. ബ്രിട്ടീഷുകാരെ സാമ്പത്തികശാസ്ത്രം പഠിപ്പിക്കാൻ ഒരുകാലത്ത് അവർ അടക്കിഭരിച്ചവരിൽനിന്നുതന്നെ ഒരാൾ വന്നുവെന്നത് ചരിത്രത്തിന്റെ ഫലിതമാവാം, മധുരമായ പകരം വീട്ടലാകാം.

ബ്രിട്ടൺ ലോകത്തിനെ മുന്നിൽനിന്ന് നയിച്ച കാലവും ആ കാലത്തിന്റെ ചരിത്രധൌത്യവും സഫലമാവുകയാണ് കോളനികളിൽനിന്നൊരാൾ വന്ന് പ്രഭുക്കന്മാർക്കൊപ്പമിരുന്ന് പ്രഭാഷണം നടത്തുമ്പോഴെന്ന് ലണ്ടൺ ക്രോണിക്കിൾ തങ്ങളുടെ മുഖപ്രസംഗത്തിൽ എടുത്തുപറഞ്ഞു. മാണിയുടെ നാട്ടിൽ കോട്ടയത്തുനിന്നിറങ്ങുന്ന മലയാളപത്രങ്ങളുടെയും മറ്റുചില പ്രസിദ്ധീകരണങ്ങളുടേയും പേര് പ്രസ്തുത മുഖപ്രസംഗത്തിൽ പരാമർശവിധേയമായിരുന്നു. ഇതിനെത്തുടർന്ന് ആ പത്രമോഫീസുകളിൽ മിഠായി വിതരണം നടത്തി. ലണ്ടനിൽ നിന്ന് പ്രത്യേകം വരുത്തിയ ബിഗ്ബെന്നിന്റെ ആകൃതിയിലുള്ള മിഠായിയായിരുന്നു ഫാമിലിപാക്കുകളായി കൊടുത്തത്. മാണിസാറിന്റെ നേട്ടം ആഘോഷിക്കാൻ നടത്തിയ ലഘുചടങ്ങിൽ പണ്ട് തന്റെ അപ്പൂപ്പൻ ഇന്ത്യയിലെ വൈസ്രോയിയെ മാറ്റാൻ വേണ്ടി രാജ്ഞിയെ നേരിട്ട് കണ്ട് ആവശ്യപ്പെട്ടതും രാജ്ഞി അദ്ദേഹത്തെ കെട്ടിപ്പിടിച്ച് ആശ്വസിപ്പിച്ചതും പത്രാധിപൻ അയവെട്ടിക്കൊണ്ട് ഓർത്തു.

ആഗോള സാമ്പത്തിക പ്രതിസന്ധി രൂക്ഷമായിക്കൊണ്ടിരിക്കുന്ന അവസരത്തിലാണ് ഇന്ത്യയിൽനിന്ന് ഒരു സമാന്തര സാമ്പത്തിക സിദ്ധാന്തം ലോകശ്രദ്ധയാകർഷിക്കുന്നത്. ലോകത്തെ മാറ്റിമറിക്കാൻ ആഹ്വാനം നൽകുന്ന മാർക്സിസത്തിന്റെ ആചാര്യൻ കാറൽ മാർക്സിന്റെ സിദ്ധാന്തത്തിന്റെ ഈറ്റില്ലം ലണ്ടനിനെ ലൈബ്രറിയാണെന്നത് യാദൃശ്ചികതയുടെ ഒരു കൌതുകം ! പ്രസ്തുതലൈബ്രറി സന്ദർശിക്കാനുള്ള ക്ഷണം പുസ്തകങ്ങൾ തനിക്കലർജിയായതുകൊണ്ട് അദ്ദേഹം സ്നേഹപൂർവ്വം നിരസിച്ചു.

കേരളത്തിൽ ജനിച്ചുപോയതുകൊണ്ടാണ് സോക്രട്ടീസിനെയൊ മാർക്സിനെയോ പോലെയൊ അവർക്കുമേലേയൊ പ്രശസ്തനാവേണ്ട മാണിസാറിനെ ലോകം അറിയാതെ പോയതെന്നും അല്ലെങ്കിൽ ലോകചരിത്രം തന്നെ മാറിപ്പോകുമായിരുന്നെന്നും ബ്രിട്ടീഷ് പാർലമെന്റ് അദ്ദേഹത്തിനു നൽകിയ പ്രശസ്തിപത്രത്തിൽ എടുത്തുപറഞ്ഞു. അധ്വാനവർഗ്ഗ സിദ്ധാന്തം പിന്തുടർന്നിരുന്നെങ്കിൽ ലോകം ഇപ്പോഴത്തെ സാമ്പത്തിക പ്രതിസന്ധിയെ അഭിമുഖീകരിക്കില്ലായിരുന്നെന്ന് പല പ്രമുഖ സാമ്പത്തിക ശാസ്ത്രഞ്ജരും അഭിപ്രായപ്പെട്ടു.

ലണ്ടൻ പ്രസംഗത്തെത്തുടർന്ന് മറ്റുപല വിദേശരാഷ്ട്രങ്ങളും അദ്ദേഹത്തെ പ്രസ്തുതസിദ്ധാന്തം അവതരിപ്പിക്കാൻ ക്ഷണിച്ചിട്ടുണ്ട്. എന്നാലും ഇനി വൈറ്റ് ഹൌസിലെ സ്വീകരണം കഴിഞ്ഞുമതി മറ്റുള്ളവർക്ക് ഡേറ്റ് കൊടുക്കൾ എന്ന് മാണിസാറ് തീരുമാനിച്ചതായാണ് അറിയുന്നത്.

പ്രശാന്ത് കളത്തില്‍

for representative purpose only

പരിഹാസം

Country:

Default Home Page

UK Home Page

Authors:

Prasanth Kalathil

തിരുവോണം സ്പെഷ്യല്‍ ചര്‍ച്ച

Kiran Thomas Thompil — Tue, 28 Aug 2012 04:13:29 +0000

ഓണക്കാലത്ത് നവ്യനായര്‍ പിണറായി വിജയനെയും കുടുംബത്തെയും കൈരളിയില്‍ അഭിമുഖം നടത്തുന്നതിനേപ്പറ്റി ഇന്ത്യാവിഷനില്‍ നടക്കാന്‍ സാധ്യതയുള്ള സാങ്കല്‍പ്പിക ചര്‍ച്ച. സ്ഥിരം ചാനല്‍ ചര്‍ച്ചാമുഖങ്ങളെ അവരുടെ ശൈലികള്‍ സഹിതം കഥാപാത്രങ്ങളാക്കുന്ന സ്പൂഫ് തുടര്‍ന്നുവായിക്കുക. (നിയമത്തെപ്പേടിച്ചുള്ള ഒഴിഞ്ഞുമാറല്‍ : ഈ ചര്‍ച്ചയില്‍ കടന്നുവരുന്ന കഥാപാത്രങ്ങള്‍ യഥാര്‍ത്ഥത്തില്‍ ജീവിച്ചിരിക്കുന്നവരാണെങ്കിലും ചര്‍ച്ച പൂര്‍ണ്ണമായും ഒരു work of fiction ആണ്. ഇവരാരും ഇങ്ങനെയൊരു ചര്‍ച്ചയില്‍ പങ്കെടുക്കുകയോ ഇതേ വാചകങ്ങള്‍ പറയുകയോ ഉണ്ടായിട്ടില്ല. ഠ്ണിം!)

അവതാരകന്‍ : സിപിഎം സംസ്ഥാന സെക്രട്ടറി പിണറായി വിജയനെയും കുടുംബത്തേയും ഈ ഓണക്കാലത്ത് പ്രശസ്ത സിനിമാ നടി നവ്യാ നായര്‍ അഭിമുഖം നടത്താന്‍ പോകുന്നു എന്ന ഞെട്ടിക്കുന്ന വാര്‍ത്തയാണ്‌ ഇന്ത്യാവിഷന്‌ ലഭിച്ചിരിക്കുന്നത്. കമ്യൂണിസ്റ്റ് പാര്‍ട്ടികളുടെ ചരിത്രത്തിലാദ്യമായാണ്‌ ഒരു പാര്‍ട്ടി സെക്രട്ടറിയെ സിനിമാ നടി അഭിമുഖം നടത്തുന്നതെന്ന് ഞങ്ങളുടെ കൊച്ചി ബ്യൂറോ റിപ്പോര്‍ട്ട് ചെയ്യുന്നു. ഈ വിഷയത്തില്‍ പ്രതികരിക്കാന്‍ നമ്മോടൊപ്പം ഉമേഷ് ബാബു കെ സി കണ്ണൂര്‍ സ്റ്റുഡിയോവില്‍, ഭാസുരേന്ദ്ര ബാബു തിരുവനന്തപുരം സ്റ്റുഡിയോയില്‍, അഡ്വ: ജയശങ്കര്‍ കൊച്ചിയില്‍ മറ്റ് പ്രമുഖരെ ടെലഫോണിലും പ്രതീക്ഷിക്കുന്നു.

ആദ്യം ശ്രീ ഉമേഷ് ബാബു കെ സി, സിപിഎമ്മിന്റെ ചരിത്രത്തില്‍ ആദ്യമായാകും അതിന്റെ ഒരു സംസ്ഥാന സെക്രട്ടറിയെ ഒരു സിനിമാ നടി അഭിമുഖം ചെയ്യുന്നത്. താങ്കള്‍ എങ്ങനെ ഇതിനെ നോക്കിക്കാണുന്നു?

[blurb:1:right] ഉ.കെ.സി : കേരളത്തിലേ... സിപിഎമ്മില്‍ ... ഉണ്ടായിക്കൊണ്ടിരിക്കുന്ന അപച്ഛയങ്ങളുടെ (sic) ജീര്‍ണ്ണതകളുടെ ഏറ്റവും പുതിയ രൂപമാണ്‌ ഈ അഭിമുഖം. വര്‍ഷങ്ങളായി ഞങ്ങളെപ്പോലെ ഉള്ളവര്‍ പറഞ്ഞുകൊണ്ടിരിക്കുന്ന വിമര്‍ശങ്ങളെ എല്ലാം ശരിവയ്ക്കുന്നതാണ്‌ ഈ സംഭവം. നവ്യ നായര്‍ എന്ന നടി അഭിനയിച്ച ചിത്രങ്ങള്‍ നിങ്ങള്‍ പരിശോധിക്കണം അവര്‍ ആദ്യമായി അഭിനയിച്ച ചിത്രം നന്ദനമാണ്‌ എന്ന് നമ്മള്‍ മറക്കരുത്. എന്തായിരുന്നു അതിന്റെ കഥ? ആരായിരുന്നു അതിന്റെ സംവിധായകന്‍ ? ഗുരുവായൂരപ്പന്റെ ഭക്തകളാകാന്‍ പ്രേക്ഷകരെ പ്രേരിപ്പിക്കുന്ന ആ ചിത്രത്തെപ്പറ്റി ഓര്‍ക്കുമ്പോഴും ആഗോളീകരണത്തിനും ഉദാരീകരണത്തിനുമൊക്കെ ചൂട്ടുപിടിക്കുന്ന ചിത്രങ്ങളുടെ സംവിധായകനായ രജ്ഞിത്തിനെ ഓര്‍ക്കുമ്പോഴും ഒരു പാര്‍ട്ടി സെക്രട്ടറിക്ക് എങ്ങനെ നവ്യ നായര്‍ക്കൊപ്പം അഭിമുഖത്തില്‍ പങ്കെടുക്കാന്‍ കഴിയും എന്നതാണ്‌ ഈ വൈകുന്നേരം നമ്മള്‍ ചിന്തിക്കേണ്ടതെന്ന് ഞാന്‍ പറഞ്ഞാല്‍ അത് സിപിഎം ഇന്ന് എത്തിച്ചേര്‍ന്നിട്ടുള്ള പ്രതിസന്ധിയുടെ ആഴത്തെപ്പറ്റി മാത്രമല്ല അതിന്റെ നൈതികതയുമായി ബന്ധപ്പെട്ടുള്ള മറ്റ് ചില പ്രശ്നങ്ങളിലെക്ക് കൂടി വിരല്‍ ചൂണ്ടുന്നതാണ്‌ എന്ന് കാണാന്‍ കഴിയും എന്ന് മാത്രമല്ല ടിപി വധത്തിന് ശേഷം സിപിഎം കടന്നു പോകുന്ന പ്രതിസന്ധികളെപ്പറ്റിക്കൂടി നാം വിലയിരുത്തേണ്ടി വരുമ്പോഴാണ്‌... ( പെട്ടന്ന് അവതാരകന്‍ ഇടപെടുന്നു)

അവതാരകന്‍ : ഉമേഷ് ബാബു ഞാന്‍ തിരിച്ചു വരാം. ശ്രീ ഭാസുരേന്ദ്ര ബാബു, ഉമേഷ് ബാബു പറഞ്ഞ സംഗതികള്‍ നമ്മള്‍ പരിഗണിക്കേണ്ടേ? എന്താണ്‌ നന്ദനം സിനിമ കേരളത്തിന്‌ നല്‍കുന്ന സന്ദേശം എന്ന് പരിശോധിക്കേണ്ടേ? ആഗോളീകരണത്തിന്റെ പുത്തന്‍ ആള്‍ രൂപങ്ങളുടെ സൃഷ്ടാവ് എന്ന് കരുതപ്പെടുന്ന രഞ്ജിത്താണ്‌ നവ്യയെ കണ്ടെത്തിയതെന്ന് കൂടി പരിഗണിച്ച് വേണ്ടേ പിണറായി ഒരു അഭിമുഖം നല്‍കാന്‍?

ഭാ.ബാ: ശ്രീ ഉമേഷ് ബാബു ഇവിടെ ചില വസ്തുതകള്‍ പരിഗണിക്കാതെ പോയി എന്ന് ഞാന്‍ കരുതുന്നു. നന്ദനം സിനിമയില്‍ നവ്യ അവതരിപ്പിച്ച കഥാപാത്രം ഒരു കീഴാള പെണ്‍കുട്ടിയുടേതാണ്‌, അല്ലെങ്കില്‍ അധ്വാനവര്‍ഗ്ഗത്തില്‍ പെട്ട ഒരു അടിച്ചുതളിക്കാരിയുടേതാണ്‌ എന്ന വസ്തുത അദ്ദേഹം മനഃപൂര്‍വ്വം മറച്ചു വയ്ക്കുന്നു. നവ്യ അവതരിപ്പിച്ച ജലോല്‍സവം എന്ന സിനിമയിലെയും വെള്ളിത്തിര എന്ന സിനിമയിലെയും കഥാപാത്രത്തെ ഒന്നും എന്റെ സുഹൃത്ത് ഉമേഷ് ബാബു കാണാതെ പോകുന്നു എന്നത് എന്നെ അത്ഭുതപ്പെടുത്തുന്നു. അതവിടെ നില്‍ക്കട്ടെ ഇനി രഞ്ജിത്തിലേക്ക് വന്നാല്‍ അദ്ദേഹം നരസിംഹമോ ആറാം തമ്പുരാനോ മാത്രമല്ല കയ്യൊപ്പും തിരക്കഥയും പ്രാഞ്ചിയേട്ടനും ഇന്ത്യന്‍ റുപ്പിയും സംവിധാനം ചെയ്ത ആളാണ്‌. ഇതൊക്കെ മനസിലാക്കി വേണം നാം ഒരു നിഗമനത്തില്‍ എത്തേണ്ടതെന്ന് ഞാന്‍ കരുതുന്നു.

അവതാരകന്‍ (സ്റ്റുഡിയോയില്‍ ഉള്ള അഡ്വ ജയശങ്കറിലേക്ക് തിരിഞ്ഞ്): ജയശങ്കര്‍ താങ്കള്‍ എങ്ങനെ ഇതിനെ നോക്കിക്കാണുന്നു?

[blurb:2:left] ജയശങ്കര്‍ : ഇത് ശുദ്ധ ധിക്കാരമാണ്‌. ഇഎംഎസ് മുതല്‍ വിഎസ് വരെ ഉള്ള മഹാന്മാര്‍ കയറി ഇരുന്ന കസേരയിലാണ്‌ പിണറായി ഇരിക്കുന്നത് എന്ന് അയാള്‍ മറക്കരുത്. ഇയാള്‍ക്ക് മതിഭ്രമമാണ്‌. നെയ്യാറ്റിങ്കരയില്‍ കൈവിട്ട നായര്‍ വോട്ട് ബാങ്കിലാണ്‌ പിണറായി നോട്ടമിട്ടിരിക്കുന്നതെന്ന്, വിഎസ് പറഞ്ഞത് പോലെ അരി ആഹാരമായി കഴിക്കുന്ന എല്ലാവര്‍ക്കും മനസിലാകും. നവ്യ നായരായതുകൊണ്ട് സുകുമാരന്‍ നായര്‍ അടക്കമുള്ളവര്‍ അഭിമുഖം കാണുമെന്നുറപ്പാണ്‌. എന്ന് മാത്രമല്ല, നായന്മാര്‍ക്ക് അനുകൂലമായി ചിലത് പിണറായി പറയാനുള്ള സാധ്യതയും ഉണ്ട്. ഇത് വെള്ളാപ്പള്ളി എങ്ങനെ കാണുമെന്നാണ്‌ ഞാന്‍ ആകാംക്ഷയോടെ കാത്തിരിക്കുന്നത്.

അവതാരകന്‍ : ശ്രീ ബര്‍ളിന്‍ കുഞ്ഞനന്തന്‍ നായര്‍ ടെലഫോണ്‍ ലൈനില്‍ ചേരുന്നു, ശ്രീ ബര്‍ളിന്‍ ഒരു സിനിമാ നടി പിണറായി വിജയന്റെ കുടുംബത്തെ അഭിമുഖം ചെയ്തിരിക്കുന്നു. എങ്ങനെ കാണുന്നു താങ്കള്‍ ഈ സംഭവത്തെ?

ബകുന: കേവലം ഒരു ചെത്തുകാരന്റെ മകനായ വിജയനെ ഒരു നായര്‍ യുവതി അഭിമുഖം ചെയ്തു എന്നതാണ്‌ ഇവിടുത്തെ പ്രശ്നം. ഇത് അധാര്‍മ്മികമാണ്‌. സഖാവ് വിഎസ് ഇതിനെതിരെ പ്രതികരിക്കണം. ഞാന്‍ ഈ വിഷയം കാരാട്ടിനെ കത്തയച്ചറിയിക്കും. ഇത് കേന്ദ്രക്കമ്മിറ്റി ചര്‍ച്ച ചെയ്യണം. പിബി അഭിപ്രായം പറയണം. ഇത് ഒരു ഗൂഡാലോചനയാണ്‌. ഇത് പരിശോധിക്കണം. പാര്‍ട്ടി മറുപടി പറയണം.

അവതാരകന്‍ : ശ്രീ ബര്‍ളിന്‍, തിരിച്ചു വരാം... ഇപ്പോള്‍ നീലകണ്ഠന്‍ ടെലഫോണ്‍ ലൈനില്‍ ഉണ്ട്. ശ്രീ നീലകണ്ഠന്‍, താങ്കള്‍ എങ്ങനെ ഇതിനെ കാണുന്നു?

നീലകണ്ഠന്‍ : ഇവിടെ നമ്മള്‍ ശ്രദ്ധിക്കാതെ പോകുന്ന ഒരു പ്രധാന കാര്യമുണ്ട്. അതായത് നവ്യ നായര്‍ കെ മധുവിന്റെ മരുമളാണ്‌. കെ മധു ആകട്ടെ സിബിഐ സിനിമകളുടെ സംവിധായകനും. അപ്പോള്‍ നമ്മള്‍ ഇതിനെ ലാവലിന്‍ കേസുമായി ബന്ധപ്പെടുത്തണം. നവ്യ വഴി കെ മധുവിനെയും കെ മധു വഴി സിബിഐയെയും സ്വാധീനിക്കാനുള്ള ശ്രമമാണ്‌ ഇതെന്ന് നമുക്ക് കാണാന്‍ കഴിയും.

അവതാരകന്‍ : ശ്രീ ജയശങ്കര്‍ , നീലകണ്ഠന്റെ ഈ നിരീക്ഷണത്തെ താങ്കള്‍ എങ്ങനെ കാണുന്നു?

ജയശങ്കര്‍ : പിണറായി വിജയനെ നമുക്കറിയാമല്ലോ. ഇതല്ല ഇതിലപ്പുറവും വിജയന്‍ ചെയ്യും. ഞാനിതില്‍ ഒരു അല്‍ഭുതവും കാണുന്നില്ല

അവതാരകന്‍ : അവസാനമായി ശ്രീ ഉമേഷ് ബാബു, ജീര്‍ണ്ണത ബാധിച്ച സിപിഎം നേതൃത്വത്തിന്റെ അപചയം അവസാനിപ്പിക്കാന്‍ താങ്കള്‍ എന്തെങ്കിലും മാര്‍ഗ്ഗം കാണുന്നുണ്ടോ? അത് പറഞ്ഞ് നമുക്കീ ചര്‍ച്ച അവസാനിപ്പിക്കാം.

ഉ.കെ.സി.: ഇവിടെയാണ്‌ വിഎസ് ഉയര്‍ത്തുന്ന ആശയങ്ങളുടെ പ്രസക്തി തെളിയുന്നത്. അദ്ദേഹവും ഞങ്ങളെപ്പോലെ ഉള്ളവരും നിരന്തരം ഉന്നയിച്ചു വരുന്ന വിഷയങ്ങള്‍ പ്രസക്തമാകുന്നത്. അപ്പോഴാണ്‌ നമുക്ക് ചന്ദ്രശേഖരന്റെ വധം ചര്‍ച്ചയാകുന്നത്. അങ്ങനെ വരുമ്പോള്‍ നമുക്ക് പലതും പറയേണ്ടി വരും. ആഗോളീകരണകാലത്ത്... ( അവതാരകന്‍ ഇടപെടുന്നു)

അവതാരകന്‍ : സമയക്കുറവ് കൊണ്ട് ചര്‍ച്ച അവസനിപ്പിക്കുന്നു, എല്ലാവര്‍ക്കും നന്ദി.

കിരണ്‍ തോമസ് തോമ്പില്‍

News Quotes

നവ്യ നായര്‍ എന്ന നടി അഭിനയിച്ച ചിത്രങ്ങള്‍ നിങ്ങള്‍ പരിശോധിക്കണം അവര്‍ ആദ്യമായി അഭിനയിച്ച ചിത്രം നന്ദനമാണ്‌ എന്ന് നമ്മള്‍ മറക്കരുത്. എന്തായിരുന്നു അതിന്റെ കഥ? ആരായിരുന്നു അതിന്റെ സംവിധായകന്‍ ?

നന്ദനം സിനിമയില്‍ നവ്യ അവതരിപ്പിച്ച കഥാപാത്രം ഒരു കീഴാള പെണ്‍കുട്ടിയുടേതാണ്‌, അല്ലെങ്കില്‍ അധ്വാനവര്‍ഗ്ഗത്തില്‍ പെട്ട ഒരു അടിച്ചുതളിക്കാരിയുടേതാണ്‌ എന്ന വസ്തുത അദ്ദേഹം മനഃപൂര്‍വ്വം മറച്ചു വയ്ക്കുന്നു. നവ്യ അവതരിപ്പിച്ച ജലോല്‍സവം എന്ന സിനിമയിലെയും വെള്ളിത്തിര എന്ന സിനിമയിലെയും കഥാപാത്രത്തെ ഒന്നും എന്റെ സുഹൃത്ത് ഉമേഷ് ബാബു കാണാതെ പോകുന്നു എന്നത് എന്നെ അത്ഭുതപ്പെടുത്തുന്നു.

for representative purpose only

പരിഹാസം

Country:

Default Home Page

UK Home Page

Authors:

Kiran Thomas Thompil