malayal.am

അരാഷ്ട്രീയമാകുന്ന പാർട്ടികൾ, ജനങ്ങളെ പരാജയപ്പെടുത്തുന്ന തെരഞ്ഞെടുപ്പുകൾ

Anil Vasudev — Sun, 28 Oct 2012 04:17:55 +0000

ജനകീയപ്രതിരോധങ്ങളെ ജീവിതോര്‍ജ്ജമാക്കിയ പ്രമുഖ പരിസ്ഥിതി പ്രവർത്തകൻ സി ആർ നീലകണ്ഠനുമായി അനിൽ വേങ്കോട് നടത്തിയ അഭിമുഖമാണു ചുവടെ. ഫിനാന്‍സ് ക്യാപിറ്റലിനു പിന്നാലെ ഭരണപ്രതിപക്ഷമുന്നണികള്‍ പായുമ്പോള്‍ തെരഞ്ഞെടുപ്പ് അപ്രസക്തമാകുന്നുവെന്ന് സി ആര്‍ വിലയിരുത്തുന്നു. മുന്‍ഗണനകളെക്കുറിച്ച് ഉറക്കെ സംസാരിക്കേണ്ടതുണ്ട് എന്ന ബോധ്യം ആവര്‍ത്തിച്ചുറപ്പിക്കുന്ന സംഭാഷണത്തില്‍ താനടക്കമുള്ളവര്‍ സമരനേതാക്കന്മാരല്ലെന്നും മാദ്ധ്യമങ്ങള്‍ക്കു മനസ്സിലാവാത്ത ജനകീയ ഇച്ഛകളെ ജനങ്ങള്‍ക്കായി പരിഭാഷപ്പെടുത്തിക്കൊടുക്കുന്ന വിവര്‍ത്തകരാണെന്നും വിനയം കൊള്ളുന്നു. അഭിമുഖത്തിലേക്ക്:

അനിൽ വേങ്കോട് : സി ആർ , ഇന്ത്യയിലെമ്പാടും ഭിന്ന ഭിന്നങ്ങളായ പ്രശ്നങ്ങളിലൂന്നി ചെറുതും വലുതുമായ നിരവധി ബഹുജന സമരങ്ങൾ നടക്കുന്നു. പാരിസ്ഥിതികവും സാമൂഹികവുമായ വിഷയങ്ങളിൽ മേധാ പട്ക്കർ, അരുന്ധതി റോയി, ബിനായക് സെൻ തുടങ്ങി താങ്കളടക്കമുള്ള വ്യക്തികളുടെ ഇടപെടലുകൾ നടക്കുന്നു. രാഷ്ട്രീയം പാർട്ടികൾക്ക് പുറത്തുമുളയ്ക്കുന്നു. എങ്ങനെ കാണുന്നു ഈ രാഷ്ട്രീയ സാഹചര്യങ്ങളെ?

സി ആർ നീലകണ്ഠൻ : ഇന്ത്യയിൽ മുതലാളിത്ത വികസന സങ്കല്പം അഥവാ ആഗോളീകരണ അധിനിവേശ വികസന സങ്കല്പം സജീവമായി നിൽക്കുന്ന കാലത്താണ് നാം ജീവിക്കുന്നത്. അതിന്റെ പ്രതിസന്ധികളാണ് നാം ഇന്നു കാണുന്ന വൈരുദ്ധ്യങ്ങൾ. മൂലധനമാണ് ഏറ്റവും വലിയ വികസന ഉപാധിയെന്ന് കരുതുന്നവരാണ് ഇവിടുത്തെ രാഷ്ട്രീയ നേതൃത്വം. ഫൈനാൻസ് ക്യാപ്പിറ്റൽ ഇന്ന് ഭൂമിയിൽ യഥേഷ്ടമുള്ള സാധനമാണ്. പണം വന്നാൽ എല്ലാമായെന്നാണ് എല്ലാ രാഷ്ട്രീയ പാർട്ടികളുടേയും വിചാരം. ഇതിനെയാണ് ഇൻ‌വെസ്റ്റർ ഫ്രണ്ട്ലി എന്ന് ഇടത് വലത് വ്യത്യാസമില്ലാതെ എല്ലാവരും പറയുന്നത്.

[blurb:1:right] മൂലധന നിക്ഷേപം വികസനം കൊണ്ടുവരുമെന്നും അത് നമ്മെ രക്ഷിക്കുമെന്നും കരുതുന്ന ഒരു രാഷ്ട്രീയമാണ് ഇന്നത്തെ അധികാര രാഷ്ട്രീയം അഥവാ ഭരണവർഗ്ഗ രാഷ്ട്രീയം എന്നു പറയുന്നത്. എന്നാൽ മൂലധനം വികസനത്തിന്റെ തോതല്ലന്നും പ്രകൃതി വിഭവങ്ങളും മണ്ണും വെള്ളവും മനുഷ്യരും അവരുടെ ആരോഗ്യവുമൊക്കെയാണ് ഒരു നാടിന്റെ പുരോഗതിയെ അടയാളപ്പെടുത്തുന്നതെന്ന് വാദിക്കുന്നവരുടേതാണ് ജനപക്ഷ രാഷ്ട്രീയം. അതുകൊണ്ട് തന്നെ നാട്ടിലുള്ള പ്രതിസന്ധികളൊന്നും പരിഹരിക്കുന്നതരത്തിലല്ല ഇന്നത്തെ ഭരണവർഗ്ഗ രാഷ്ട്രീയം നിൽക്കുന്നത്. അവർ കൊണ്ടുവരുന്ന പദ്ധതികൾ സമൂഹത്തിലെ പ്രശ്നങ്ങൾ മൂർച്ഛിപ്പിച്ചുകൊണ്ടിരിക്കുന്നു. ഇതാണ് ഇന്ന് സമൂഹത്തിൽ കാണുന്ന അടിസ്ഥാനപരമായ വ്യത്യാസമെന്ന് എനിക്ക് തോന്നുന്നു. അതുകൊണ്ട് എമേർജിംഗ് കേരളയായാലും ജിം ആയാലും മറ്റേതെങ്കിലും വികസന പദ്ധതിയായാലും ബഹുഭൂരിപക്ഷം വരുന്ന പൊതുജനങ്ങളുടെ മേലുള്ള അതിക്രമമായിത്തീരുന്നു. ഈ ആക്രമണങ്ങളെ പ്രതിരോധിക്കുകയാണ് ജനങ്ങൾ ചെയ്യുന്നത്.

കേന്ദ്രീകൃതമായ ഒരു രാഷ്ട്രീയ ബോധത്തിൽ നിന്നുകൊണ്ടല്ല ഈ ചെറുത്തുനിൽ‌പ്പുകൾ നടത്തുന്നത്. അവരെ ബാധിക്കുന്ന പ്രശ്നങ്ങൾ വരുമ്പോൾ ഒരോ സ്ഥലത്തും ആളുകൾ സമരരംഗത്ത് വരുകയാണ്. ഇപ്പോൾ മൂലമ്പള്ളിയിൽ ഭൂമി ഏറ്റെടുത്തപ്പോൾ, വിളപ്പിൽ ശാല മാലിന്യപ്രശ്നത്തിന്മേൽ, കാസർഗോഡ് എന്റോസൾഫാൻ പ്രശ്നത്തിൽ ഇങ്ങനെ നിരവധിയായ നിലനിൽ‌പ്പിന്റെ പ്രശ്നങ്ങളിൽ ജനങ്ങൾ സമര രംഗത്താണ്. ഇതിനെ നേരിടാൻ മൂലധനശക്തികൾ, ഭരണ വർഗ്ഗ ശക്തികൾ ഒരു വശത്ത് അവരെ സഹായിക്കാൻ രാഷ്ട്രീയ നേതൃത്വങ്ങൾ കക്ഷി രാഷ്ട്രീയത്തിനതീതമായി ഐക്യപ്പെടുന്നു. ജനങ്ങളോ ഇതിനെ പ്രതിരോധിച്ചുകൊണ്ട് സമരരംഗത്തുവരുന്നു. ഇവിടെയും കക്ഷിരാഷ്ട്രീയത്തിനു പുറത്ത് ഐക്യമുണ്ടാവുന്നു.

അതായത് സമൂഹത്തിലെ വൈരുദ്ധ്യങ്ങളെ പ്രതിനിധീകരിക്കാൻ കഴിയാതെ രാഷ്ട്രീയ പാർട്ടികൾ അരാഷ്ട്രീയമായിരിക്കുന്നു. ഭരണത്തോടടുക്കുമ്പോൾ ഇളമരം കരീമിനും കുഞ്ഞാലികുട്ടിക്കും ഒരേ വികസന നയവും ഒരേ ഭാഷയും കൈവരുന്നു. വർഗ്ഗതാല്പര്യ വ്യത്യാസങ്ങൾ രാഷ്ട്രീയത്തെ നിശ്ചയിക്കുന്നുവെന്ന മാർക്സിയൻ കാഴ്ചപ്പാട് ഓർക്കുക. ഇത്തരമൊരു സാഹചര്യത്തിൽ ഭരണത്തിലെ മാറ്റം ഒരനാവശ്യകാര്യമാണ്. അതായത് തെരഞ്ഞെടുപ്പിൽ ഇടത് ജയിച്ചാലും വലത് ജയിച്ചാലും ജനങ്ങൾ പരാജയപ്പെടുന്നു. സ്മാർട്ട് സിറ്റി കൊണ്ടുവരാം വിമാനത്താവളം കൊണ്ടുവരാം എന്ന് ഈ നേതാക്കന്മാർ പറഞ്ഞുകൊണ്ടിരിക്കേ കൊച്ചീ നഗരത്തിലെ ജനങ്ങൾ ചോദിക്കുന്നത് ഈ പൈപ്പിൽ എന്നാണ് വെള്ളം വരുന്നതെന്നാണ്.

താങ്കൾ പറഞ്ഞതുപോലെ പാർട്ടികൾ അരാഷ്ട്രീയമായിരിക്കുന്നു. ജനങ്ങളാവട്ടെ ചെറുതും വലുതുമായ നൂറുകണക്കിനു സമരമുഖങ്ങളിൽ നിൽക്കുന്നു. ഇതിൽ താങ്കളെപ്പോലുള്ളവരുടെ റോൾ എന്താണ്?

ഭൂസമരങ്ങളിൽ നിന്ന് കമ്മ്യൂണിസ്റ്റ് പാർട്ടികൾ നേരത്തേ പിൻ വാങ്ങിയിരുന്നു. അത്തരമൊരു സാഹചര്യത്തിലാണ് ചെങ്ങറ പോലുള്ള സമരങ്ങൾ വരുന്നത്. നമുക്കറിയാം നമ്മുടെ നാട്ടിൽ ആയിരക്കണക്കിനു ഏക്കർ ഭൂമി അനധികൃതമായി കൈവശം വച്ചിട്ടുള്ളവരുണ്ട്. അനധികൃത എസ്റ്റേറ്റുകളുണ്ട്, അത് മറിച്ചുവിറ്റവരുണ്ട്, മുറിച്ച് വിറ്റവരുണ്ട്, പാട്ടം അടയ്ക്കാത്തവരുണ്ട്.

[blurb:2:left] ഈ ഭൂമി മണ്ണിൽ പണിയെടുക്കുന്ന ജനങ്ങൾക്ക് അവകാശപ്പെട്ടതാണ്. ഇത് അമ്പത്തേഴു മുതൽ കമ്മ്യൂണിസ്റ്റ് പാർട്ടി പറയുന്നതാണ്. ഈ ആവശ്യമാണ് ജനങ്ങൾ ഉന്നയിക്കുന്നത്. ഇത് ഇപ്പോഴത്തെ കമ്മ്യൂണിസ്റ്റ് നേതാക്കൾക്ക് മനസ്സിലാവുന്നില്ല.

ഇങ്ങനെ വെള്ളത്തിന്റെ, ഭൂമിയുടെ, മണലിന്റെ, പുഴയുടെ, കണ്ടലിന്റെ, ചവറിന്റെ, വഴിയുടെ എല്ലാം കാര്യങ്ങൾക്കായി ജനങ്ങൾ മുന്നോട്ടുവരുന്നു. പക്ഷേ മുഖ്യധാരയ്ക്ക് ഈ സമരങ്ങൾ മനസ്സിലാവില്ല. മുഖ്യധാര ദീർഘകാലമായി ഭരണവർഗ്ഗങ്ങളും മാദ്ധ്യമങ്ങളും ഉണ്ടാക്കിയെടുത്ത ഒരു ബോധത്തിന്റെ ഫലമായി മറ്റൊരു ഫോർമാറ്റിൽ ചിന്തിക്കുന്നവരാണ്.

എന്നെപ്പോലുള്ളവർ ഈ സമരങ്ങളുടെ പൊരുളിനെ മുഖ്യധാരയ്ക്ക് മനസ്സിലാകും വിധം വിവർത്തനം ചെയ്യുന്ന പണിയാണ് ഏറ്റെടുത്തിട്ടുള്ളത്. ഞങ്ങളൊന്നും സമരനേതാക്കന്മാരല്ല . മുഖ്യധാരയ്ക്കും പാർശ്വവൽകൃതരായ പീഡിത ജനതയ്ക്കും ഇടയിലെ ട്രാൻസിലേറ്ററുടെ പണിയാണ് ഞങ്ങൾ ചെയ്യുന്നത്.

മുമ്പ് 'ജിം' വന്നപ്പോഴും ഇപ്പോൾ 'എമേർജിംഗ് കേരള' വന്നപ്പോഴും കേരളത്തിൽ വ്യാപകമായ എതിർപ്പുകൾ ഉണ്ടായി. കേരളത്തിന്റെ വ്യാവസായിക വികസനത്തിനും സാമ്പത്തിക വികസനത്തിനും സർക്കാർ മുൻ‌കൈ എടുക്കേണ്ടതില്ലേ? അത് തെരഞ്ഞെടുക്കപ്പെട്ട സർക്കാരിന്റെ ബാധ്യതയല്ലേ?

വേണം തീർച്ചയായും വേണം. പക്ഷേ സംഭവിക്കുന്നതെന്താണ്? കേരളം വളരുന്നതെങ്ങോട്ടാണ്? കേരളത്തിലെ ആരോഗ്യരംഗം നേരിടുന്ന വലിയ പ്രതിസന്ധിയുണ്ട്. അത് നാം എത്ര ചർച്ചചെയ്തിട്ടുണ്ട്?

കേരളത്തിലെ ക്യാൻസർ വളർച്ചാനിരക്ക് 15 ശതമാനമാണ്. അതായത് ഇന്ന് 100 പേർ ക്യാൻസർ ബാധിതരാണെങ്കിൽ അടുത്തവർഷം 115 പേരായിരിക്കും. ഭീകരമാണീ വളർച്ചാനിരക്ക്. വൃക്ക രോഗങ്ങൾ , പകർച്ച വ്യാധികൾ , പ്രമേഹം ഇൻഫെർട്ടിലിറ്റി ഇതെല്ലാം ഭീകരമാംവണ്ണം കൂടിവരികയാണ്.

[blurb:3:right] അവയവങ്ങൾ കേടായാൽ മാറ്റിവച്ചുകളയാമെന്ന നിലയിലാണ് ഈ രംഗത്തെ ചർച്ചകളെ സൂപ്പർ സ്പെഷ്യാലിറ്റി ആശുപത്രികൾ കൊണ്ട് പോകുന്നത്. അഞ്ചോ ആറോ ലക്ഷം രൂപ ചെലവിട്ട് അവയവങ്ങൾ മാറ്റി വയ്ക്കാൻ കേരളത്തിൽ എത്രപേർക്ക് ശേഷിയുണ്ട്? അല്ലെങ്കിലും അങ്ങനെയല്ലല്ലോ വേണ്ടത്.

അതുകൊണ്ട് നമുക്ക് ആരോഗ്യത്തോടെ ഇരിക്കാൻ വിഷം കലരാത്ത ഭക്ഷണം ലഭ്യമാവണം. കുടിക്കാൻ നല്ല വെള്ളം കിട്ടണം. വായുവും വെള്ളവും എല്ലാം വിഷവിമുക്തമായിരിക്കണം. അത് മുഖ്യപരിഗണനയിൽ വരുന്ന വികസനം ആവശ്യമാണ്.

വികസനത്തിനു ഭൂമി വേണം. തെങ്ങിന്റെ മുകളിൽ വികസനം വരുമോ എന്ന് ചോദിച്ചത് മാർക്സിസ്റ്റ് മന്ത്രിയാണ്. വികസനത്തിനായി ഭൂമി നൽകണമെന്നത് മാറി മാറി വരുന്ന എല്ലാ സർക്കാരുകളും അംഗീകരിച്ച തത്വമാണ്. അങ്ങനെ നൽകുന്ന ഭൂമി വനമാകാം, പുൽമേടാകാം, നെൽ‌പാടമാകാം, എസ്റ്റേറ്റ് ആകാം, കൊട്ടാരങ്ങളോ കടൽത്തീരമോ ആകാം നാടിന്റെ പാരിസ്ഥിതികവും സാംസ്കാരികവുമായ ഞരമ്പുകളെ മുറിച്ച് നൽകുകയാണ്.

മറുവശത്ത് ആളുകളുടെ പത്തും പതിനഞ്ചും സെന്റ് ഭൂമി ഏറ്റെടുക്കുമ്പോഴുള്ള പ്രശ്നമെന്താണ്? ഭൂമി ഇന്ന് ഏറ്റവും വലിയ മാർക്കറ്റ് ആണ്. ആരെങ്കിലും 5 സെന്റ് ഭൂമി ഇന്ന് വിറ്റാൽ ആ പണത്തിനു മറ്റൊരു 5 സെന്റ് വാങ്ങാനാവില്ല. അതുകൊണ്ട് ഭൂമി ഏറ്റെടുക്കാൻ വരുമ്പോൾ ആളുകൾ പ്രശ്നമുണ്ടാക്കും. മൂലമ്പള്ളിയിലെ അനുഭവം അവർക്കുണ്ട്. റോഡിനുവേണ്ടി നാലരക്കൊല്ലം മുമ്പ് മൂലമ്പള്ളിയിൽ 326 വീട്ടുകാരെയാണ് കുടിയിറക്കിയത്. അതിൽ 300 കുടുംബങ്ങൾ ഇന്നും പെരുവഴിയിലാണ്. എന്തായി ഇവരുടെ പുനരധിവാസം?

[blurb:4:left] എമേർജിംഗ് കേരളയിൽ വരുന്നവർക്ക് പതിനായിരക്കണക്കിനു ഭൂമിനൽകാമെന്ന് സർക്കാർ വാഗ്ദാനം ചെയ്യുന്നു. കൊടുക്കാൻ തയ്യാറായി നിയമങ്ങൾ ഇളവു ചെയ്ത് പ്രത്യേകം സംവിധാനമുണ്ടാക്കുന്നു. വികസനത്തിനെന്നും പറഞ്ഞ് ഇറക്കി വിട്ട മൂലമ്പള്ളിയിലെ മനുഷ്യരെ അധിവസിപ്പിക്കാൻ വെറും 12 ഏക്കർ ഭൂമി മതി. അത് കേൾക്കാൻ സർക്കാരില്ല. ഇവിടെയാണ് ജനങ്ങൾ സമരത്തിനു വരുന്നത്.

ഭരണകൂടത്തിന്റെ പരിഗണന ഇവിടെ വ്യക്തമാണ്. ആയിരക്കണക്കിനു ഏക്കർ ഭൂമി ഒരു വിഭാഗത്തിനു വിട്ടുകൊടുക്കാൻ സർക്കാർ തയ്യാറായി നിൽക്കുമ്പോൾ മറുവശത്ത് വികസനത്തിനെന്നും പറഞ്ഞ് ഭൂമി ഏറ്റെടുത്ത് കിടപ്പാടം പൊളിച്ചുകളഞ്ഞവരെ പുനരധിവസിപ്പിക്കാൻ പദ്ധതിയില്ല.

ഇതൊക്കെയാണെങ്കിലും നമ്മുടെ റോഡുകളുടെ ശോചനീയാവസ്ഥ, വർദ്ധിച്ചുവരുന്ന വാഹനത്തിരക്ക് ഇതിനിടയിൽ അടിസ്ഥാന വികസന രംഗത്ത് സർക്കാർ എന്തെങ്കിലും ചെയ്യേണ്ടേ? ഭൂമി ഏറ്റെടുക്കൽ പ്രശ്നമായിരിക്കുമ്പോൾ തന്നെ.

റോഡുകളുടെ സ്ഥിതി പരമ ദയനീയമാണ്. സർക്കാർ റോഡ് നന്നാക്കണ്ടയെന്നൊന്നും ഞങ്ങൾ പറഞ്ഞിട്ടില്ല. പക്ഷേ സർക്കാരിന്റെ പ്രയോർട്ടി ഏതിനാണ്?

ഇപ്പോൾ എമേർജിംഗ് കേരളായിൽ വന്ന പദ്ധതിയാണ് ‘ഹൈസ്പീഡ് റെയിൽ കോറിഡോർ’. തിരുവനന്തപുരത്ത് നിന്നു 53 മിനിട്ട് കൊണ്ട് എറണാകുളത്തും 142 മിനിട്ട്കൊണ്ട് കാസർഗോഡും എത്താവുന്ന അതിവേഗ റെയിൽ കോറിഡോർ പദ്ധതി. 75000 വീടുകളാണ് ഈ പദ്ധതി നടപ്പിലാക്കാനായി കുടിയോഴിപ്പിക്കേണ്ടിവരുന്നത്. മൂലമ്പള്ളിയിൽ 326 വീടുകൾ ഒഴിപ്പിച്ചിടത്തെ സ്ഥിതി നമ്മൾ നേരത്തേ കണ്ടു. അപ്പോഴാണ് 75000 കുടുംബങ്ങൾ വഴിയിലേയ്ക്കിറങ്ങുന്നത്. അതുണ്ടാക്കുന്ന സാമൂഹ്യ പ്രശ്നങ്ങൾ ഊഹിക്കാവുന്നതേയുള്ളൂ.

[blurb:5:right] 1,18,000 കോടിരൂപയാണ് ഇതിനു ഇന്നു കണക്കാക്കുന്ന ചെലവ്. ഇത് കേരളത്തിന്റെ ഒരു വർഷത്തെ ബഡ്ജറ്റിനേക്കാൾ വലിയ തുകയാണ്. 1,04,000 കോടിരൂപയാണ് ഈ പഞ്ചവർസര പദ്ധതിയിൽ കേരളത്തിന്റെ വികസനത്തിനു മാറ്റിവച്ചതുക. അതായത് അഞ്ചുവർഷം കൊണ്ട് കേരളവികസനത്തിനു പഞ്ചവത്സരപദ്ധതിയിൽ മാറ്റി വച്ചതുകയിൽ കൂടുതൽ തുക വേണം ഈ പദ്ധതിക്ക്. ഇതിനുള്ള പണം എവിടെനിന്നു കണ്ടെത്തും?

ഇപ്പോൾ പറയുന്നത് ലോണെടുക്കും എന്നാണ്. ലോണെടുത്താൽ തിരികെ അടയ്ക്കണ്ടേ? എങ്ങനെ തിരികെ അടയ്ക്കും? ഈ ട്രെയിനിൽ തിരുവന്തപുരത്ത് നിന്നു എറണാകുളം വരെപ്പോകാൻ 1400 രൂപയാകും . 2800 രൂപാ മുടക്കി തിരുവന്തപുരത്ത് നിന്നു എറണാകുളം വരെ പോയിവരാൻ കഴിയുന്ന എത്രപേരുണ്ട് നമ്മുടെ നാട്ടിൽ?

നോക്കൂ, വിരലിലെണ്ണാവുന്നവർക്ക് മാത്രം പ്രയോജനം ലഭിക്കുന്ന ഒരു പദ്ധതിക്ക് വേണ്ടി കൊടുത്തു തീർക്കാനാവാത്ത വലിയ തുകയ്ക്ക് നാടിനെ പണയപ്പെടുത്തുന്നു. ഇതിന്റെ പകുതി പണം വേണ്ട തിരുവനന്തപുരം കാസർഗോഡ് റെയിൽ നാലുവരിപ്പാതയാക്കാൻ. അതിലൂടെ 200 - 250 കിലോമീറ്റർ വേഗത്തിൽ ട്രെയിനോടിക്കാൻ ഇപ്പോൾതന്നെ ഇന്ത്യൻ റെയിൽവേയ്ക്ക് കഴിയും. ഒരു മണിക്കൂർ കൊണ്ട് എത്തിയില്ലെങ്കിലും മൂന്നുമണിക്കൂറുകൊണ്ട് കാസർഗോഡെത്തും. പക്ഷേ അതിലെല്ലാപേരും കയറും. അത് പാടില്ല. വളരെ എക്സ്‌ക്ലൂസീവായി ധനികനു യാത്രപോകണം. അതിന് അതിവേഗ റെയിൽ കോറിഡോർ ആവശ്യമാണ്. ഈ വികസനം ആർക്കുവേണ്ടിയെന്ന് നാം വീണ്ടും വീണ്ടും ചോദിച്ചുപോകുന്നത് ഇതുകൊണ്ടാണ്.

ദേശീയ പാത വികസനം വന്നപ്പോഴും വിവാദങ്ങൾ ഉണ്ടായല്ലോ, എന്തായിരുന്നു അതിനു പിറകിലെ പ്രശ്നങ്ങൾ?

ഇന്ത്യയിലെ മറ്റ് സംസ്ഥാനങ്ങളിൽ നിന്ന് വ്യത്യസ്തമായ സാഹചര്യങ്ങൾ കേരളത്തിലുണ്ട്. കേരളത്തിലെ ജനസാന്ദ്രത, വീടുകളുടെ നിരന്നുള്ള വിന്യാസം, ഭൂമിയുടെ ഉയർന്ന വില ഇങ്ങനെ നിരവധികാര്യങ്ങളുണ്ട്. അതിലെല്ലാമുപരിയായി കുടിയൊഴിപ്പിച്ചവരോട് നാളിതുവരെ സർക്കാരുകൾ കാണിച്ചിട്ടുള്ള ക്രൂരമായ അവഗണന. ഇതെല്ലാം പരിഗണിക്കാതെ ഭൂമിയേറ്റെടുക്കൽ കേരളത്തിൽ സാധ്യമല്ല.

ഇക്കാര്യങ്ങൾ എല്ലാം പരിഗണിച്ചുകൊണ്ടാണ് കേരളത്തിലെ ദേശീയപാതകൾ സർക്കാർ ചെലവിൽ നാലുവരിയാക്കാൻ വി എസ് സർക്കാരിന്റെ കാലത്ത് സർവ്വകക്ഷി യോഗം തീരുമാനിച്ചത്. അതനുസരിച്ച് വി എസ്സിന്റേയും ഉമ്മന്‍ ചാണ്ടിയുടേയും നേതൃത്വത്തിൽ സർവ്വകക്ഷി സംഘം ഡൽഹിക്കുപോയി. ഞാനുമുണ്ടായിരുന്നു, ആ സംഘത്തിൽ. അവിടെ കാര്യങ്ങൾ ബോധ്യപ്പെടുത്തി.

[blurb:6:left] ഇക്കാര്യത്തിൽ കേന്ദ്രതീരുമാനം വരുന്നതിനുമുന്നേ ഇവിടെ വീണ്ടും സർവ്വകക്ഷി യോഗം ചേർന്നു. കോൺഗ്രസ്സിൽ നിന്ന് വി എം സുധീരനെ മാറ്റി രമേശ് ചെന്നിത്തല വന്നു. മുസ്ലിം ലീഗിൽ നിന്ന് കുട്ടി അഹമ്മദ് കുട്ടിയുണ്ടായിരുന്നത് മാറ്റി സാക്ഷാൽ കുഞ്ഞാലിക്കുട്ടി വന്നു. മാർക്സിസ്റ്റ് പാർട്ടി വി എസ്സിനോട് മിണ്ടാതിരിക്കാൻ പറഞ്ഞിട്ട് പിണറായി വിജയൻ നേരിട്ടെത്തി. വീരേന്ദ്രകുമാറിന്റെ ഒരു കത്ത് യോഗത്തിൽ വായിക്കണമെന്ന് പറഞ്ഞത് പറ്റില്ലായെന്ന് രമേശ് ചെന്നിത്തലയും പിണറായി വിജയനും ഒരുമിച്ച് നിന്ന് വാദിച്ചു. നാലുവരി പാതയെന്ന തീരുമാനം മാറി 45 മീറ്റർ പാത BOT വ്യവസ്ഥയിൽ കൊണ്ടുവരാൻ തീരുമാനിച്ചു.

ഇന്നത്തെ സ്ഥിതിക്ക് ഒരു ലോറിക്ക് കിലോമീറ്ററിനു നാലരരൂപ നിരക്കിൽ ടോൾ കൊടുക്കേണ്ടി വരുന്ന സ്വകാര്യ റോഡാക്കി ദേശീയപാത മാറ്റുകയാണ്. പൊതുമേഖല സ്വകാര്യവൽക്കരിക്കുന്നതിനെതിരെ സമരം ചെയ്യുന്ന ഇടതുകക്ഷികൾ ഭരിക്കുമ്പോഴാണിത് സംഭവിച്ചെതെന്ന് നാം ഓർമ്മിക്കണം. 5000 കിലോമീറ്റർ പൊതുവഴി സ്വകാര്യ വഴിയാവുന്നു. 300 കോടി ചെലവഴിച്ച് റോഡു നിർമ്മിക്കാൻ കഴിയില്ലായെന്ന് പറഞ്ഞ് സർക്കാർ ഭൂമിയേറ്റെടുത്ത് സ്വകാര്യ വ്യക്തികളെ ഏൽ‌പ്പിക്കുന്നു. അവർ 300 കോടിയുടെ സ്ഥാനത്ത് പോലീസ് കാവലിൽ 2000 കോടി പിരിച്ചെടുക്കുന്നു. ഇരുന്നൂറും മുന്നൂറും പോലീസുകാർ ടോൾ ബൂത്തുകളിൽ കാവൽ നിൽക്കുന്നു. നൂറുവർഷത്തിനു മേൽ പൊതുവഴിയായി ജനങ്ങളുടെ സ്വന്തമായിരുന്ന ദേശീയ പാത വില്പനയ്ക്ക് വച്ചിരിക്കുന്നു.

കേരളത്തിന്റെ ഏറ്റവും വലിയ പൊതു സമ്പത്ത് പൊതുവഴിയാണ്. മഹാത്മാവായ അയ്യങ്കാളിയാണ് കേരളത്തിൽ പൊതുവഴികളുണ്ടാക്കിയത്. അദ്ദേഹം നടന്നുനേടിയതാണ് ആ സ്വാതന്ത്ര്യം. ഇന്ന് ഇടതു വലതു കക്ഷികൾ മറ്റൊരു തരത്തിൽ ഈ സ്വാതന്ത്ര്യം തിരികെയെടുക്കുന്നു. അപ്പോൾ നാം എന്തുചെയ്യണം ?

ഏ കെ ജിയും ഫാ: വടക്കനും ജനകീയ സമരങ്ങളും

ലോകം മുഴുവൻ വ്യാപിച്ചുകിടക്കുന്ന മലയാളികളിൽ വലിയ ധനികരുണ്ട് , താങ്കൾ നേരത്തേ പറഞ്ഞപോലെ അവർക്ക് ഫൈനാന്‍സ് ക്യാപിറ്റൽ പ്രശ്നമല്ല. അവർ കേരളത്തിന്റെ ഭൂമിയും ജലവുമടക്കമുള്ള പ്രകൃതി വിഭവങ്ങൾ കൈക്കലാക്കാൻ നടത്തുന്ന കുതന്ത്രങ്ങൾക്ക് വികസനത്തിന്റെ പേരിൽ നമ്മുടെ രാഷ്ട്രീയ നേതൃത്വം ദല്ലാൾപണി ചെയ്യുകയാണെന്ന് ആക്ഷേപമുണ്ടല്ലോ?

നെടുമ്പാശ്ശേരി വിമാനത്താവളത്തിനടുത്ത് 128 ഏക്കർ നെൽ വയൽ നികത്തി ഗോൾഫ് കോർട്ട് ഉണ്ടാക്കുന്നു. നെൽ‌വയൽ നീർത്തട സംരക്ഷണനിയമം ഐകകണ്ഠ്യേന പാസാക്കിയവരാണിവർ. ഒരേക്കർ നെൽ‌വയൽ അയ്യായിരം കോടി ലിറ്റർ വെള്ളം ശേഖരിക്കും അങ്ങനെയുള്ള 128 ഏക്കർ നെൽ‌വയൽ നികത്തി ഒരു ഗോൾഫ് കോർട്ട് നിർമ്മിക്കുന്നു.

[blurb:7:right] നിർമ്മിച്ചാലോ, അത് സംരക്ഷിക്കാൻ ധാരാളം വെള്ളം വേണം. അതിനായി മറ്റൊരിടത്ത് കുടിക്കാനുപയോഗിക്കേണ്ട വെള്ളം കൊണ്ട് വന്ന് പുല്ല് നനയ്ക്കും. ഒരു വർഷം 10 ലക്ഷം രൂപാ ചെലവിട്ട് ഗോൾഫ് കളിക്കാൻ കഴിയുന്നവർക്ക് കുടിവെള്ളത്തിനായി കേഴുന്ന വൈപ്പിനിലെ മനുഷ്യരെക്കാൾ പ്രയോർട്ടി ഉണ്ട്. അതുകൊണ്ട് കുടിവെള്ളം വിതരണം ചെയ്തില്ലെങ്കിലും ഗോൾഫ് കോർട്ട് നനയ്ക്കാൻ വെള്ളം നൽകും. ഇതാണ് ഗാന്ധി പറഞ്ഞത് ഭരിക്കുന്നവന്റെ പ്രയോർട്ടിയാണ് വികസനമെന്ന്.

വാഗമണ്ണിൽ വളരെ സവിശേഷമായ പുൽമേട് നികത്തി മറ്റൊരു ഗോൾഫ് കോർട്ട് നിർമ്മിക്കുന്നു. ഇപ്പോൾ എമേർജിംഗ് കേരളയിൽ വന്ന പദ്ധതിയാണ്. മീനച്ചിലാറിന്റെയും മറ്റും തുടക്കസ്ഥലമാണ്. വൈവിധ്യമാർന്ന ജൈവഘടനയുള്ള വളരെ പാരിസ്ഥിതിക പ്രത്യേകതകളുള്ള പ്രദേശമാണിവിടം.

ഗോൾഫ് കോർട്ടിലെ കീടനാശിനി പ്രയോഗം കൃഷിയെ അപേക്ഷിച്ച് ആറിരട്ടിയാണ്. കീടനാശിനി, കളനാശിനി ഇങ്ങനെ നിരന്തരം ഉപയോഗിച്ചുകൊണ്ടേയിരിക്കണം കാരണം അവരുദ്ദേശിക്കുന്ന പുല്ല് മാത്രമേ വളരാവൂ അല്ലാതെ ഒരു തവളയോ എലിയോ ഉറുമ്പോ ചിത്രശലഭമോ അതുവഴി പോകരുത്. പോയാൽ അത് ഗോൾഫ് കളിയെ ബാധിക്കും.

രണ്ടായിരം രൂപ ചെലവാക്കി ഡിന്നർ കഴിക്കാൻ മടിക്കുന്നവരാണ് മലയാളികൾ എന്ന് നമ്മെ കളിയാക്കിയ ഒരു വ്യവസായി ഉണ്ട്. പട്ടിണി പാവങ്ങൾക്ക് വേണ്ടിയുണ്ടാക്കിയ ചാനലിൽ ഇരുന്നുകൊണ്ടാണ് അയാളതുപറഞ്ഞതെന്ന് നാം ഓർക്കണം. ഇതൊക്കെ കൊണ്ടാണ് ചില സാമ്പത്തിക വിദഗ്ദ്ധരും പണ്ഡിതന്മാരും ചാനലിലൊക്കെയിരുന്ന് പറയുന്നത്, നിങ്ങൾ വിചാരിക്കുന്നത്ര ദരിദ്രവാസികളൊന്നുമല്ല മലയാളികളെന്ന്.

2000 രൂപയ്ക്ക് ഡിന്നർ കഴിക്കുന്നവർക്കും പ്രതിവർഷം 10 ലക്ഷം രൂപ ചെലവിട്ട് ഗോൾഫ് കളിക്കുന്നവർക്കും വേണ്ടി കേരളം ഒരുങ്ങേണ്ടതുണ്ട്. അതാണ് ഇന്നത്തെ വികസനത്തിന്റെ പ്രയോർട്ടി.

മൂന്ന് പോളിറ്റ് ബ്യൂറോ മെമ്പർമാരുടെ മക്കൾ ഗൾഫിലെ ഒരു വ്യവസായിയുടെ കമ്പനിയിലാണ്. പാർട്ടികളുടെയും നേതാക്കന്മാരുടേയും സ്പോൺസർമാരായി ഇതിനോടകം ഈ ധനികർ വളർന്നിട്ടുണ്ട്. അതുകൊണ്ടാണ് ഈ കമ്പനികളുടേയും വ്യവസായികളുടേയും ബ്രാന്റ് അംബാസിഡർമാരായി നേതാക്കന്മാർ പ്രവർത്തിക്കുന്നത്. 'എമേർജിംഗ് കേരള' പോലുള്ള മേളകൾ ഈ ബാന്ധവത്തിന്റെ ഉത്സവങ്ങളാണ്.

സാമുദായികമായ ചില മുറിച്ചുകടക്കലിലൂടെ പുറത്തുവരുകയും മാർക്സിന്റെ ദർശനങ്ങളാൽ സമൂഹത്തെ നോക്കിക്കാണാനുള്ള അടിസ്ഥാനങ്ങൾ ലഭിക്കുകയും പിന്നെ ഗാന്ധിയുടെ ഒക്കെ ചിന്തകളുടെ സ്വാധീനം കൂടിവന്നുചേർന്നതാണ് താങ്കളുടെ രാഷ്ട്രീയ ബോധം. ഇത്തരമൊരു രാഷ്ട്രീയ പരിപ്രേക്ഷ്യത്തിൽ നിന്നുകൊണ്ടുള്ള രാഷ്ട്രീയ ബദലുകളെക്കുറിച്ച് പറയാമോ?

ഇന്ന് യഥാർത്ഥത്തിൽ അത്തരമൊരു രാഷ്ട്രീയ ബദലിനെക്കുറിച്ചുള്ള ചിന്തകൾ വളരെ സജീവമായിട്ടുണ്ട്. പക്ഷേ ഇതിനോടുള്ള പ്രതികരണം വളരെ ശകലീകൃതമാണ്. ഇപ്പോൾ ചെങ്ങറപോലുള്ള സമരങ്ങൾ, ഇതിലൊക്കെ വരുന്ന ജനത വളരെ പാർശ്വവൽകൃതരായ ജനതയാണ്. ഇതിനെയെല്ലാം ഒരു പ്രത്യയ ശാസ്ത്ര അടിത്തറയിൽ കോർത്തെടുത്തിട്ടില്ല.

മുമ്പും കേരളത്തിൽ പ്രത്യയ ശാസ്ത്ര അടിത്തറയോടെ സമരങ്ങളെ കോർത്തെടുത്തിട്ടില്ലേ?

മുമ്പ് ഉണ്ടായിട്ടില്ലായെന്ന് പറയാനാകില്ല. ഏ കെ ജിയൊക്കെ കമ്മ്യൂണിസ്റ്റ് പാർട്ടി കെട്ടിപ്പെടുത്തത് അങ്ങനെയായിരുന്നു. ജനങ്ങൾക്ക് ഒരു പ്രശ്നമുണ്ടാകുമ്പോൾ ഏകെജിയെപ്പോലുള്ളവർ അതിലിടപെടുന്നു. ആ പ്രശ്നത്തിന്റെ രാഷ്ട്രീയം ജനങ്ങളെ പഠിപ്പിക്കുന്നു. ജനങ്ങളുടെ ആവശ്യങ്ങൾ പാർട്ടിക്കറിയാം. പാർട്ടിയെന്താണെന്ന് ജനങ്ങൾക്കും. ഇത്തരമൊരു പരസ്പര വിശ്വാസത്തിൽ നിർമ്മിച്ചെടുത്തതാണ് പാർട്ടിയുടെ അടിത്തറ.

[blurb:8:left] ഇന്നിപ്പോൾ ജനകീയപ്രശ്നങ്ങളുമായി കേരളത്തിലെ കമ്മ്യൂണിസ്റ്റ് പാർട്ടി ഓഫിസുകളിലേയ്ക്ക് ആളുകൾ പോകുന്നില്ല. എന്നുമാത്രമല്ല കേരളത്തിലെ മിക്കവാറും എല്ലാ ജനകീയ സമരങ്ങളുടേയും മറുവശത്ത് നിൽക്കുന്നത് മാർക്സിസ്റ്റ് പാർട്ടിയും കോൺഗ്രസ്സുമാണ്. കോൺഗ്രസ്സ് അങ്ങനെയാണെന്ന് ആളുകൾ നേരത്തേ തിരിച്ചറിഞ്ഞിരുന്നു.

മാർക്സിസ്റ്റ് പാർട്ടിയുടെ അവസ്ഥ ദയനീയമാണ്. പാർട്ടി സ്വാശ്രയ കോളേജിനു എതിരായി സമരം ചെയ്തു. നേതാവ് രാവിലെ കൂത്തുപറമ്പ് രക്തസാക്ഷി ദിനത്തിനു പ്രസംഗിച്ചിട്ട് ഇപ്പുറത്ത് പരിയാരം മെഡിക്കൽ കോളേജിൽ വന്നിരുന്ന് 50 ലക്ഷം രൂപ ക്യാപ്പിറ്റേഷൻ ഫീ വാങ്ങുന്ന നിലയിലെത്തിയിട്ടുണ്ട്. ഒരു മനസാക്ഷികുത്തുമില്ലാതെ പ്രസംഗിച്ചവനും പ്രസംഗം കേട്ടവനും കൂടിയാണിതുചെയ്യുന്നത്. പ്രസംഗിച്ചവൻ അതിന്റെ എം ഡിയാണ് പ്രസംഗം കേട്ടവൻ അവിടെ രക്ഷിതാവാണ്. അത്രമേൽ അരാഷ്ട്രീയവൽക്കരിക്കപ്പെട്ടിരിക്കുന്നതു കൊണ്ടാണ് കമ്മ്യൂണിസ്റ്റ് പാർട്ടികളെ വിട്ട് സാധാരണ ജനങ്ങൾ മറ്റ് മാർഗ്ഗങ്ങൾ തേടുന്നത്.

വിളപ്പിൽശാലയിൽ ചവറുകൊണ്ടിടമെന്ന് വാദിക്കുന്നത് മാർക്സിസ്റ്റ് മേയറാണ്. കേന്ദ്രസേനയെ കേരളത്തിൽ ഇടപെടുത്തുന്നതിനു ഇടതുപക്ഷം എന്നും എതിരായിരുന്നു. തെരഞ്ഞെടുപ്പിനു കേന്ദ്രസേന വന്നപ്പോൾ വി എസ്സ് പറഞ്ഞത് അവർ ബാരക്കിലിരിക്കും എന്നാണ്. വിളപ്പിൽ ശാലയിലെ സമരത്തെ നേരിടാൻ കേന്ദ്രസേനയെ വിളിക്കണം എന്ന് ഹൈക്കോടതിയിൽ അഫിഡവിറ്റ് നൽകിയത് മാർക്സിസ്റ്റ് പാർട്ടിയുടെ മേയറാണ്. സമരങ്ങളോടപ്പമല്ല മറിച്ച് അതിനെ തച്ചുടയ്ക്കുന്നവരോടൊപ്പമാണീ പാർട്ടികൾ.

സാമുദായികമായ ഒരു പുറത്തുകടക്കലിലൂടെ സാമൂഹികരംഗത്ത് വന്നുവെന്ന് പറഞ്ഞുവല്ലോ, അങ്ങനെയൊരാൾ സോളിഡാരിറ്റിപോലെ മത- ജാതി ബന്ധങ്ങളുള്ള സംഘടനകളോട് ചേർന്ന് സമര രംഗത്ത് വരുന്നു. ഇക്കാലംകൊണ്ട് സഞ്ചരിച്ച ദൂരങ്ങൾ തിരികെ നടക്കുകയാണോ?

വിളപ്പിൽശാലയില്‍ ചവറിടുന്നതിനെതിരെ സമരം ചെയ്യുന്നവർ അവരോട് സഹകരിക്കുന്ന ആരുമായും ചേരും. അല്ലാതെ അന്താരാഷ്ട്ര രാഷ്ട്രീയമൊന്നും നോക്കിയിട്ടല്ല അവർ സമരം ചെയ്യുന്നത്. മൂലമ്പള്ളിയിലെ അനുഭവം നോക്കൂ. കഴിഞ്ഞ ഇടതു സർക്കാർ പോലീസിനെ ഉപയോഗിച്ച് ഒരു ദിവസം 15 കുടുംബങ്ങളെ കുടിയിറക്കി. ഇതിൽ നടക്കാൻ കഴിയാത്തവരുണ്ടായിരുന്നു, പ്രായമായ ആളുകളുണ്ടായിരുന്നു, ഗർഭിണികളും കുട്ടികളുമുണ്ടായിരുന്നു. ഇവരെ അന്നുരാത്രി എവിടെക്കിടത്തും എന്ന ആവലാതിയിലായിരുന്നു ഞങ്ങൾ.

[blurb:9:right] ഞാനവിടത്തെ ബിഷപ്പിനെ കണ്ട് സഹായമഭ്യർത്ഥിച്ചു. ബിഷപ്പ് പള്ളിയുടെ പാരിഷ് ഹാളിൽ അവരെ കിടത്തി. ആദ്യം ബിഷപ്പിനു സംശയമുണ്ടായിരുന്നു. കാരണം സർക്കാരിനെതിരെയുള്ള സമരമാണ് പക്ഷേ ഈ കുടിയിറക്കിലുള്ള നീതികേട് അദ്ദേഹത്തിനു മനസ്സിലായി. കിടക്കാനിടം കൊടുത്തു. അങ്ങനെയാണ് പള്ളി മൂലമ്പള്ളി സമരത്തിലിടപെടുന്നത്.

നവോത്ഥാനകാലത്തും മതസംഘടനകളിൽ നിന്നും വ്യക്തികളിൽ നിന്നും ഇത്തരത്തിലുള്ള ഇടപെടലുകൾ ഉണ്ടായിട്ടുണ്ട്. മൂലമ്പള്ളിയിൽ കുടിയിറക്കൽ സമരത്തിൽ പള്ളിയെ ഇടപെടുത്തിയത് തെറ്റാവുകയും എറണാകുളത്ത് സ്ഥാനാർത്ഥിയെ നിറുത്തുന്ന സമയം വരുമ്പോൾ പള്ളി ഇടപെടുന്നത് സെക്കുലർ ആവുകയും ചെയ്യുന്നത് എങ്ങനെയെന്ന് എനിക്ക് മനസ്സിലാവുന്നില്ല. ഈ സമരങ്ങളിൽ രാഷ്ട്രീയ പാർട്ടികൾക്ക് ഇടപ്പെട്ട് ജനങ്ങളുടെ പിന്തുണ നേടാമായിരുന്നല്ലോ.

അമരാവതിയിൽ കടുത്ത ക്രിസ്തീയ വിശ്വാസികൾ യേശുവിന്റെ ചിത്രത്തിനോടൊപ്പം എ കെ ജിയുടെ ചിത്രം വച്ചിരിക്കുന്നത് ഞാൻ കണ്ടിട്ടുണ്ട്. ഒരിക്കലും കമ്മ്യൂണിസ്റ്റ് പാർട്ടിയിലേയ്ക്ക് വരാൻ സാധ്യതയില്ലാതിരുന്ന ആളുകളെ എകെജി പാർട്ടിയിലേയ്ക്ക് ആകർഷിച്ചത് അവരുടെ ജീവിത സമരത്തിൽ ഇടപെട്ടുകൊണ്ടായിരുന്നു. ഫാദർ വടക്കനോട് ചേർന്ന് അദ്ദേഹം സമരം നയിച്ചു.

ആരായിരുന്നു 1962 ലെ ഫാദർ വടക്കൻ? വിമോചന സമരം സി ഐ എയുടെ കാശ് വാങ്ങി നടത്തി പുറത്തുവന്ന ഫാദർ വടക്കൻ. മലങ്കോവിന്റെ മക്കൾ മലനാടിനു പുറത്തുപോയാലേ ഞാനീ ബൈബിൾ താഴെവയ്ക്കൂ എന്ന് പറഞ്ഞ ഫാ:വടക്കൻ. ആ വടക്കൻ നടത്തിയ സമരമാണ് എ കെ ജി ഏറ്റെടുത്തത്. വടക്കനുള്ളതുകൊണ്ട് ഞാനില്ലായെന്ന് എ കെജി പറഞ്ഞില്ല അങ്ങനെ മാറി നിന്നിരുന്നെങ്കിൽ കമ്മ്യൂണിസ്റ്റ് പ്രസ്ഥാനം വളരില്ലായിരുന്നു. അതുകൊണ്ട് ബിഷപ്പ് മൂലമ്പള്ളി സമരത്തിനു അനുഭാവം പ്രകടിപ്പിച്ചതുകൊണ്ട് ഞാനില്ലായെന്ന് പറയേണ്ട രാഷ്ട്രീയ സാഹചര്യം ഇവിടെയുണ്ടന്ന് എനിക്ക് തോന്നുന്നില്ല.

സംഘടകൾക്കെല്ലാം അവരവരുടെ അജണ്ടയുണ്ട് പക്ഷേ ഇന്ന് അവരുടെ അജണ്ടയോട് എന്തു ബന്ധമാണ് ഈ സംഘടകൾ പുലർത്തുന്നത്? ഇന്നത്തെ കമ്മ്യുണിസ്റ്റ് പാർട്ടികൾക്ക് അവരുടെ ആദർശങ്ങളോട് എന്ത് ബന്ധമാണുള്ളത്? ഗാന്ധിസത്തോട് കോൺഗ്രസ്സിനു അടുപ്പമുണ്ടോ? അതുകൊണ്ട് അജണ്ടയും ആദർശങ്ങളും വച്ച് സംഘടകളെ ഇന്ന് വിലയിരുത്താനാവില്ല. സോളിഡാരിറ്റി എന്റോസൾഫാൻ ബാധിതരുടെ വേദനയ്കൊപ്പം നിന്നാൽ അവരോട് സഹകരിക്കുന്നതിൽ കുഴപ്പമുള്ളതായി എനിക്കുതോന്നുന്നില്ല. ചെങ്ങറയിൽ തൊഴിലാളിവർഗ്ഗ പാർട്ടിയുടെ കേഡർമാർ മരുന്നും വെള്ളവും കൊടുക്കാതെ ദളിതരെ വളഞ്ഞിട്ട് തല്ലിയപ്പോൾ അവരെ സഹായിക്കാൻ സോളിഡാരിറ്റി വന്നു. എന്തുകൊണ്ട് സോളിഡാരിറ്റി എന്നു ചോദിക്കുന്നവർ ഏന്തുകൊണ്ട് ഡിവൈ എഫ് ഐ വരുന്നില്ലായെന്ന് ചോദിക്കേണ്ടതാണ്.

മഹാശ്വേതാ ദേവി കേരളത്തിൽ വന്നപ്പോൾ വി എസ്സിനെ കണ്ടിരുന്നു സി ആറും ഒപ്പമുണ്ടായിരുന്നു. മേധാ പട്ക്കർ വന്നപ്പോഴും താങ്കളോടൊപ്പമാണ് വി എസ്സിനെ കണ്ടത്. ദേശീയ തലത്തിൽ ഒരു ഇടതു ബദലിനുള്ള ആലോചനകൾ ഈ കൂടിക്കാഴ്ചകളിൽ നിന്നെല്ലാം മുളയ്ക്കുന്നുണ്ടോ?

മേധ വി എസ്സിനെ കണ്ടപ്പോൾ ആവശ്യപ്പെട്ടത് വി എസ്സ് ഇന്ത്യയിൽ ഇടതുപക്ഷത്തിന്റെ നേതൃത്വം ഏറ്റെടുക്കണം എന്നാണ്. വി എസ്സ് വിചാരിച്ചാലും പാർട്ടി അതിനു അനുവദിക്കുമോയെന്നത് വേറെകാര്യം. പക്ഷേ വി എസ്സിന്റെ നിലപാടുകളാണ് ഇന്ത്യയിൽ ഇടതുപക്ഷം ഉയർത്തി കൊണ്ടുവരേണ്ടതെന്ന അർത്ഥം മേധയുടെ അഭ്യർത്ഥനയിൽ അടങ്ങിയിട്ടുണ്ട്. ഇന്ത്യയിലുടനീളം ആയിരക്കണക്കിനു സമരങ്ങൾ നടക്കുന്നുണ്ട്. അവയെ ഒരു പ്രത്യയശാസ്ത്ര ഉൾക്കാമ്പോടെ കണ്ണിചേർക്കുന്നതരത്തിൽ ഇതൊരു ക്രിട്ടിക്കൽ മാസും ക്രിട്ടിക്കൽ നേതൃത്വവും ആയി രൂപം പ്രാപിച്ചിട്ടില്ല. വ്യക്തമായ പുരോഗതികൾ ഈ രംഗത്ത് നടക്കുന്നുണ്ട്.

കേരളത്തിലെ സാമൂഹിക ബോധത്തിൽ വന്ന ഒരു ഇടതുപക്ഷവൽക്കരണം ഇന്ന് അഡ്രസ്സുചെയ്യാതെപോവുകയാണോ?

തീർച്ചയായും അല്ല അങ്ങനെയായിരുന്നെങ്കിൽ ടി പി ചന്ദ്രശേഖരന്റെ കൊലപാതകം തെളിയിക്കപെടാതെ പോകുമായിരുന്നു. ഒരു ഇടതുമനസാക്ഷി ശക്തമായി ഉണർന്നതുകൊണ്ടാണ് മാർക്സിസ്റ്റ് പാർട്ടി പ്രതിരോധത്തിലായത്. ഷുക്കൂർ വധക്കേസ്സിൽ മുസ്ലിം‌ലീഗ് പോലും മിണ്ടുന്നില്ലല്ലോ...

[blurb:10:left] കേസ്സ്ഒത്തുതീർപ്പുകളുടെ കക്ഷിരാഷ്ട്രീയ താത്പര്യങ്ങൾ ടി പിയുടെ കേസ്സിൽ ഫലിക്കാതെപോയത് പൊതുമനസാക്ഷിയുടെ ശക്തിയായിരുന്നു. ഈ ഇടതുപക്ഷ ബോധം തെരഞ്ഞെടുപ്പ് രാഷ്ട്രീയത്തിൽ അപ്രസക്തമാണ്. ഇടതുപക്ഷം തോറ്റാൽ അവിടെ കോൺഗ്രസ്സിനു ഗുണം കിട്ടില്ലേയെന്നൊക്കെയുള്ള ചിന്തകളാണ് തെരഞ്ഞെടുപ്പിൽ പ്രവർത്തിക്കുന്നത്. ബൂർഷ്വാ ജനാധിപത്യത്തിലെ ദ്വന്ദങ്ങളിൽ വോട്ട് ചെയ്യാൻ ജനങ്ങൾ ബാധ്യസ്ഥരാവുന്നതുകൊണ്ടാണ് ഈ പ്രശ്നം. കേരളത്തിൽ മാർക്സിസ്റ്റ് പാർട്ടിക്ക് അനുകൂലമാകുന്ന ഈ ഘടകം ദേശീയതലത്തിൽ കോൺഗ്രസ്സിനു അനുകൂലമാവുന്നു. നിങ്ങൾ അമേരിക്കയുടെ കൂടെയാണോ അതോ അൽ ക്വൊയ്ദായുടെ കൂടെയോ എന്ന് ചോദിക്കുന്ന സാമ്രാജ്യത്വയുക്തിയും പ്രവർത്തിക്കുന്നത് ഇതേ ദ്വന്ദത്തിന്റെ ആനുകൂല്യത്തിലാണ്.

വി എസ്സിനെ വഴിതെറ്റിക്കുന്നത് താങ്കളാണെന്ന് പറയുന്നുണ്ടല്ലോ?

(ചിരി) വി എസ്സിനു 89 വയസ്സായി. ഇത്രയും നീണ്ട രാഷ്ട്രീയ –സമര ചരിത്രമുള്ള വി എസ്സിനെ ഞാൻ വഴിതെറ്റിച്ചാൽ തെറ്റുന്നിടത്താണ് എന്നു കരുതാമോ? ഞാൻ വി എസ്സി ന്റെ ആളാണെന്ന് ഇതുവരെ അവകാശപ്പെട്ടിട്ടില്ല. ഞാൻ പണം കൊടുത്തിട്ടോ മറ്റെന്തെങ്കിലും സുഖസൌകര്യങ്ങൾ നൽകിയിട്ടോ അദ്ദേഹത്തെ വഴിതെറ്റിക്കുന്നെന്ന് ആരും പറയുന്നില്ലല്ലോ... ഇവിടെ പലരെയും വഴിതെറ്റിക്കുന്നതങ്ങനെയാണല്ലോ...

[blurb:11:right] എന്റെ അഭിപ്രായങ്ങൾ സ്വതന്ത്രമായി ഞാൻ വി എസ്സിനോട് പറഞ്ഞിട്ടുണ്ട്. കാരണം നമ്മുടെ നിലപാടുകൾ വ്യക്തമായി പറയാൻ കഴിയുന്ന മാർക്സിസ്റ്റ് പാർട്ടിയിലെ ഏക നേതാവ് വി എസ്സ് ആണ്. വി എസ്സ് അതു കേൾക്കാൻ തയ്യാറാകും. ബോധ്യമായാൽ ശക്തമായ നിലപാടെടുക്കും.

വി എസ്സിനു തെറ്റിയ സന്ദർഭങ്ങളുണ്ട്. ചെങ്ങറയിലായാലും മൂലമ്പള്ളിയിലായാലും വി എസ്സിന്റെ നിലപാടുകളോട് വ്യക്തമായി എതിർപ്പുകളോടെ ഞാൻ മുന്നോട്ട് വന്നിട്ടുണ്ട്. ഇപ്പോൾ കോൺഗ്രസ്സിലാണെങ്കിൽ വി എം സുധീരനോട് പറയാം, വി ടി ബലറാമിനോട് പറയാം, സതീശനോട് പറയാം, സി പിഐ യിൽ ബിനോയ് വിശ്വത്തിനോട് പറയാം, മുല്ലക്കര രത്നാകരനോട് പറയാം, കേൾക്കാനുള്ള ജനാധിപത്യബോധമവർക്കുണ്ട്. മാർക്സിസ്റ്റ് പാർട്ടി നേതാക്കന്മാരോട് ചർച്ചയേ അസാധ്യമാണ്. വി എസ്സ് മാത്രമാണ് അതിൽ നിന്ന് ഭിന്നമായിട്ടുള്ളത്.

കക്ഷിരാഷ്ട്രീയം അപ്രസക്തമാണെന്നു കരുതുന്നുണ്ടോ?

ഇല്ല , ജയപ്രകാശ് നാരായണൻ പറഞ്ഞതു പോലെയൊന്നും ഞാൻ കരുതുന്നില്ല. പാർലമെന്റെറി ജനാധിപത്യത്തിൽ പാർട്ടികളും അതിന്റെ രാഷ്ട്രീയവും ആവശ്യമാണ്. കേരളത്തിൽ നിലവിലുള്ള പാർട്ടികൾ അരാഷ്ട്രീയമാണെന്നാണ് ഞാൻ പറഞ്ഞത്.

അഭിമുഖം: സി ആര്‍ നീലകണ്ഠന്‍ / അനില്‍ വേങ്കോട്

ചേര്‍ത്തുവായിക്കാന്‍:

സി ആര്‍ നീലകണ്ഠനുമായി കേരളീയം മാസിക നടത്തിയ അഭിമുഖം

News Quotes

മൂലധന നിക്ഷേപം വികസനം കൊണ്ടുവരുമെന്നും അത് നമ്മെ രക്ഷിക്കുമെന്നും കരുതുന്ന ഒരു രാഷ്ട്രീയമാണ് ഇന്നത്തെ അധികാര രാഷ്ട്രീയം അഥവാ ഭരണവർഗ്ഗ രാഷ്ട്രീയം എന്നു പറയുന്നത്. എന്നാൽ മൂലധനം വികസനത്തിന്റെ തോതല്ലന്നും പ്രകൃതി വിഭവങ്ങളും മണ്ണും വെള്ളവും മനുഷ്യരും അവരുടെ ആരോഗ്യവുമൊക്കെയാണ് ഒരു നാടിന്റെ പുരോഗതിയെ അടയാളപ്പെടുത്തുന്നതെന്ന് വാദിക്കുന്നവരുടേതാണ് ജനപക്ഷ രാഷ്ട്രീയം.

ഭരണത്തോടടുക്കുമ്പോൾ ഇളമരം കരീമിനും കുഞ്ഞാലികുട്ടിക്കും ഒരേ വികസന നയവും ഒരേ ഭാഷയും കൈവരുന്നു. വർഗ്ഗതാല്പര്യ വ്യത്യാസങ്ങൾ രാഷ്ട്രീയത്തെ നിശ്ചയിക്കുന്നുവെന്ന മാർക്സിയൻ കാഴ്ചപ്പാട് ഓർക്കുക. ഇത്തരമൊരു സാഹചര്യത്തിൽ ഭരണത്തിലെ മാറ്റം ഒരനാവശ്യകാര്യമാണ്. അതായത് തെരഞ്ഞെടുപ്പിൽ ഇടത് ജയിച്ചാലും വലത് ജയിച്ചാലും ജനങ്ങൾ പരാജയപ്പെടുന്നു.

ഞങ്ങളൊന്നും സമരനേതാക്കന്മാരല്ല . മുഖ്യധാരയ്ക്കും പാർശ്വവൽകൃതരായ പീഡിത ജനതയ്ക്കും ഇടയിലെ ട്രാൻസിലേറ്ററുടെ പണിയാണ് ഞങ്ങൾ ചെയ്യുന്നത്.

റോഡിനുവേണ്ടി നാലരക്കൊല്ലം മുമ്പ് മൂലമ്പള്ളിയിൽ 326 വീട്ടുകാരെയാണ് കുടിയിറക്കിയത്. അതിൽ 300 കുടുംബങ്ങൾ ഇന്നും പെരുവഴിയിലാണ്. എന്തായി ഇവരുടെ പുനരധിവാസം?

1,18,000 കോടിരൂപയാണ് ഹൈസ്പീഡ് റെയില്‍ കോറിഡോറിന് ഇന്നു കണക്കാക്കുന്ന ചെലവ്. അഞ്ചുവർഷം കൊണ്ട് കേരളവികസനത്തിനു പഞ്ചവത്സരപദ്ധതിയിൽ മാറ്റി വച്ചതുകയിൽ കൂടുതൽ തുക വേണം ഈ പദ്ധതിക്ക്. ഇതിന്റെ പകുതി പണം വേണ്ട തിരുവനന്തപുരം കാസർഗോഡ് റെയിൽ നാലുവരിപ്പാതയാക്കാൻ.

300 കോടി ചെലവഴിച്ച് റോഡു നിർമ്മിക്കാൻ കഴിയില്ലായെന്ന് പറഞ്ഞ് സർക്കാർ ഭൂമിയേറ്റെടുത്ത് സ്വകാര്യ വ്യക്തികളെ ഏൽ‌പ്പിക്കുന്നു. അവർ 300 കോടിയുടെ സ്ഥാനത്ത് പോലീസ് കാവലിൽ 2000 കോടി പിരിച്ചെടുക്കുന്നു. ഇരുന്നൂറും മുന്നൂറും പോലീസുകാർ ടോൾ ബൂത്തുകളിൽ കാവൽ നിൽക്കുന്നു.

മൂന്ന് പോളിറ്റ് ബ്യൂറോ മെമ്പർമാരുടെ മക്കൾ ഗൾഫിലെ ഒരു വ്യവസായിയുടെ കമ്പനിയിലാണ്. പാർട്ടികളുടെയും നേതാക്കന്മാരുടേയും സ്പോൺസർമാരായി ഇതിനോടകം ഈ ധനികർ വളർന്നിട്ടുണ്ട്. 'എമേർജിംഗ് കേരള' പോലുള്ള മേളകൾ ഈ ബാന്ധവത്തിന്റെ ഉത്സവങ്ങളാണ്.

ഇന്നിപ്പോൾ ജനകീയപ്രശ്നങ്ങളുമായി കേരളത്തിലെ കമ്മ്യൂണിസ്റ്റ് പാർട്ടി ഓഫിസുകളിലേയ്ക്ക് ആളുകൾ പോകുന്നില്ല. കേരളത്തിലെ മിക്കവാറും എല്ലാ ജനകീയ സമരങ്ങളുടേയും മറുവശത്ത് നിൽക്കുന്നത് മാർക്സിസ്റ്റ് പാർട്ടിയും കോൺഗ്രസ്സുമാണ്.

മൂലമ്പള്ളിയിൽ കുടിയിറക്കൽ സമരത്തിൽ പള്ളിയെ ഇടപെടുത്തിയത് തെറ്റാവുകയും എറണാകുളത്ത് സ്ഥാനാർത്ഥിയെ നിറുത്തുന്ന സമയം വരുമ്പോൾ പള്ളി ഇടപെടുന്നത് സെക്കുലർ ആവുകയും ചെയ്യുന്നത് എങ്ങനെയെന്ന് എനിക്ക് മനസ്സിലാവുന്നില്ല.

ഇന്നത്തെ കമ്മ്യുണിസ്റ്റ് പാർട്ടികൾക്ക് അവരുടെ ആദർശങ്ങളോട് എന്ത് ബന്ധമാണുള്ളത്? ഗാന്ധിസത്തോട് കോൺഗ്രസ്സിനു അടുപ്പമുണ്ടോ? അതുകൊണ്ട് അജണ്ടയും ആദർശങ്ങളും വച്ച് സംഘടകളെ ഇന്ന് വിലയിരുത്താനാവില്ല. സോളിഡാരിറ്റി എന്റോസൾഫാൻ ബാധിതരുടെ വേദനയ്കൊപ്പം നിന്നാൽ അവരോട് സഹകരിക്കുന്നതിൽ കുഴപ്പമുള്ളതായി എനിക്കുതോന്നുന്നില്ല.

മാർക്സിസ്റ്റ് പാർട്ടി നേതാക്കന്മാരോട് ചർച്ചയേ അസാധ്യമാണ്. വി എസ്സ് മാത്രമാണ് അതിൽ നിന്ന് ഭിന്നമായിട്ടുള്ളത്.

അനില്‍ വേങ്കോട്, സി ആര്‍ നീലകണ്ഠന്‍

മുഖം

Country:

Default Home Page

UK Home Page

Authors:

Anil Vasudev

ബാലേട്ടനും രാജമാണിക്യവും

Anvar Abdullah — Sat, 29 Sep 2012 11:27:56 +0000

ടിഎ ഷാഹിദ് എന്ന തിരക്കഥാകൃത്ത് അകാലത്തില്‍ മരണത്തിനു കീഴടങ്ങുമ്പോള്‍ മലയാളസിനിമാലോകത്ത് ഒരു ലഘുനടുക്കമുണരാതെ പോകുന്നതെന്ത് എന്നത് വിസ്മയകരമാണ്. വിജയങ്ങളോട് വിടപറഞ്ഞ്, താരസിംഹാസനങ്ങളുടെ തണലുകളില്‍നിന്ന് മാറി അകന്നുപോയ അവസ്ഥയിലാണ് ഷാഹിദ് വിടവാങ്ങുന്നത്. ബാലേട്ടനെന്ന വന്‍വിജയത്തില്‍ തുടങ്ങിയ ഷാഹിദ് പക്ഷേ, അവസാനം ചെയ്ത ചിത്രം എംഎല്‍എ മണി പത്താംക്ലാസും ഗുസ്തിയുമാണ്. അങ്ങനെയുമൊരു സിനിമയോ എന്നാവും പലരും ഇപ്പോള്‍ അമ്പരക്കുന്നത്. അതേ, അങ്ങനെയൊരു സിനിമയിറങ്ങി. ആരുമറിയാതെ പോകുകയും ചെയ്തു.

രണ്ടാം ഘട്ടത്തില്‍ അലിഭായ്, താന്തോന്നി, കാക്കി തുടങ്ങിയ പടങ്ങളാണു ഷാഹിദ് ചെയ്തത്. അവയൊന്നും വിജയങ്ങളായില്ലെന്നു മാത്രമല്ല, സിനിമയെന്ന നിലയില്‍ ദയനീയമായ അവസ്ഥയായിരുന്നുതാനും. പക്ഷേ, അതിനപ്പുറം ഷാഹിദിന് മലയാളസിനിമയില്‍ ഒരു ചെറിയ സ്ഥാനമുണ്ട്. അത് താരങ്ങളുടെ വൃക്ഷച്ചുവട്ടില്‍ അല്ലെങ്കില്‍ കരിഞ്ഞുപോകുമായിരുന്ന അവസ്ഥയില്‍ നിന്നിരുന്ന മലയാളസിനിമയ്ക്ക് അന്തരാളഘട്ടത്തില്‍ ഒരു കൈത്താങ്ങായിത്തീര്‍ന്ന ചാരിതാര്‍ത്ഥ്യത്തിന്റെ കഥയാണ്.
ശരിയാണ്. ഷാഹിദിന്റെ സിനിമകളൊന്നും മികച്ചവയായിരുന്നില്ല.

ജനപ്രിയചേരുവകളില്‍ പടച്ച പടപ്പുകള്‍ മാത്രമായിരുന്നു. ടൈപ്പ് കഥാപാത്രങ്ങള്‍, സ്ഥിരം മുഹൂര്‍ത്തങ്ങള്‍, മീറ്ററൊപ്പിക്കുന്ന സംഭാഷണങ്ങള്‍... അതിനപ്പുറം ഒന്നുമായിരുന്നില്ല അവ. അപ്പന്‍ - മകന്‍ ഡൈക്കോട്ടമി വച്ചുള്ള കാടും പടലും തല്ലലായിരുന്നു ബാലേട്ടന്‍ മുതല്‍ പത്താംക്ലാസും ഗുസ്തീം വരെയുള്ള പടങ്ങളെല്ലാം. അതൊരു ഫോര്‍മുലപ്പരിപാടിയായിരുന്നു. ബാലേട്ടനുശേഷം നാട്ടുരാജാവിലും മത്സരത്തിലും ബെന്‍ ജോണ്‍സണിലും രാജമാണിക്യത്തിലും ഒക്കെ ഇതേ അപ്പന്‍ മകന്‍ പരിപാടി തന്നെ അരങ്ങേറി. അതിങ്ങു താന്തോന്നിയിലൊക്കെയായപ്പോള്‍ ജനം ശരിക്കും അവിഞ്ഞു. അങ്ങനെ, ഷാഹിദ് മെല്ലെ പടിക്കു പുറത്തേക്കു നീങ്ങി. പരാജയപ്പെടുന്നവനെ പുറമ്പോക്കില്‍ തള്ളുന്ന സിനിമാലോകം ഷാഹിദിനെ ഒറ്റക്കോളം മരണവാര്‍ത്തവരെ എത്തിച്ചു സന്തോഷത്തോടെ റീത്തുമായി നില്‍ക്കുന്നു.

ഇതൊക്കെയാണെങ്കിലും ഷാഹിദിന് നേരത്തേ പറഞ്ഞൊരു സ്ഥാനം തീര്‍ച്ചയായും സിനിമയിലുണ്ട്. മോഹന്‍ലാല്‍ എന്ന താരപര്‍വതം തകര്‍ന്നുനിന്ന സമയത്താണ് ബാലേട്ടന്‍ വരുന്നത്. ബ്രഹ്മചാരി, ചതുരംഗം, വര്‍ണപ്പകിട്ട് എന്നിങ്ങനെ അനേകം സിനിമകള്‍ പൊട്ടി ലാലെന്ന നടന്‍ ഔട്ടായ മട്ടിലായപ്പോഴാണ് ബാലേട്ടനെന്ന പടം വന്നു വിജയിക്കുന്നത്. ശരിക്കും ലാലിനു രണ്ടാം ജന്മം കൊടുത്ത സിനിമ. അന്ന് അങ്ങനെയൊരു പുനര്‍ജന്മമുണ്ടായത് മലയാളസിനിമയ്ക്കും വാണിജ്യരംഗത്ത് ഗുണമാണു ചെയ്തത്. ലാലെന്ന വടവൃക്ഷം മലയാളവാണിജ്യസിനിമയുടെ നെടുംതൂണാണ്. ആ തൂണ്‍ അന്നു പറിഞ്ഞിരുന്നെങ്കില്‍ സിനിമ ചത്ത അവസ്ഥയിലെത്തിയിരുന്നേനേ.

അതുപോലെതന്നെയാണ് രാജമാണിക്യത്തിന്റെ കാര്യവും. മമ്മൂട്ടിയുടെ രണ്ടാം ജന്മമായിരുന്നു അത്. മമ്മൂട്ടിയുടെ രണ്ടാം മുഖം. ഇങ്ങനെയൊരു മമ്മൂട്ടി സാദ്ധ്യമാണെന്നു തെളിയിച്ച ആ ചിത്രത്തിന്റെ റണ്‍വേയിലാണ് മമ്മൂട്ടി ഒരിക്കല്‍ക്കൂടി ടേക്കോഫ് ചെയ്തത്. അതും മലയാളസിനിമയെ വാണിജ്യവ്യവസായരംഗമെന്ന നിലയില്‍ വളര്‍ത്തി.
ഷാഹിദ് എന്ന തിരക്കഥാകൃത്ത് കടന്നുപോകുമ്പോള്‍, സ്മരണകള്‍ക്കു സ്ഥാനമില്ലാത്ത സിനിമാരംഗത്ത് താരങ്ങള്‍ കണ്ണുനിറയ്ക്കുമായിരിക്കില്ല. പക്ഷേ, തീര്‍ച്ചയായും ബാലേട്ടനും രാജമാണിക്യവും കണ്ണീരൊഴുക്കാതെയിരിക്കുകയില്ല.

മുഖം

Country:

Default Home Page

Authors:

Anvar Abdullah

തിലകന്‍ എന്ന ഓര്‍മ

Anvar Abdullah — Mon, 24 Sep 2012 02:52:39 +0000

നടന്‍ തിലകന്‍ കടന്നുപോയി. അഭിനയത്തിന്റെ സമസ്തഭാവപൂര്‍ണതയാി മലയാളി ആഘോഷിച്ച ആ നടനവൈവിദ്ധ്യം കടന്നുപോയി.

തിലകന്‍ ഇല്ലാതാകുമ്പോള്‍ മലയാളത്തിന്റെ നടനലോകത്തെ ഒരു കാലംതന്നെ ഇല്ലാതാകുകയാണ്. ഇനി തിലകന്‍ എന്ന അഭിനേതാവിനായി ഒരു സിനിമയിലും ഒരു നിമിഷം ഉദിക്കുകയില്ല. ആ അഭിനയചാരുതയാല്‍ ഒരു കഥാപാത്രവും ജീവനാര്‍ന്നു മരണമില്ലാത്തവരായി മാറില്ല. പെരിയാറില്‍ തുടങ്ങി ഉസ്താദ് ഹോട്ടലില്‍ ആ യാത്ര പൂര്‍ണമായി. അല്ലെങ്കില്‍ ഒരിക്കലും പൂര്‍ണമാകാതെ ആ നദി പാതിയില്‍ പതറിനിന്നു.

എഴുപത്തിമൂന്നില്‍ പെരിയാറിലാണ് ആ അഭിനയസപര്യ സിനിമയ്ക്കു സ്വന്തമാകുന്നത്. അതിനു മുന്‍പും പിന്‍പും നാടകലോകത്ത് ഒരു പര്‍വതനാമമായി അതുണ്ടായിരുന്നു. നാടകത്തിലെ അഭിനയവീര്യം കണ്ടാണ് പിജെ ആന്റണി അദ്ദേഹത്തെ സിനിമയിലേക്കു ക്ഷണിക്കുന്നത്. എന്നാല്‍ പെരിയാറിന്റെ പരാജയം തിലകന് തുടര്‍വര്‍ഷങ്ങളില്‍ സാദ്ധ്യത നിഷേധിച്ചു. പിന്നീട് കെ ജി ജോര്‍ജാണ് തിലകനെ വീണ്ടും സിനിമയ്ക്കു സ്വന്തമാക്കുന്നത്. കോലങ്ങളും യവനികയും തിലകനെ താരമാക്കി. പിന്നീട് ഇരകളും പഞ്ചവടിപ്പാലവും വ്യത്യസ്തമുഖങ്ങള്‍ സമ്മാനിച്ചു.

വലിയ പുരസ്‌കാരങ്ങള്‍ തിലകനു ലഭിച്ചില്ല. എന്നാല്‍ പുരസ്‌കാരങ്ങള്‍ക്ക് എത്തിപ്പിടിക്കാനാവുന്നതിലും ഉയരെയായിരുന്നു ആ നടനവൈഭവം. പുരസ്‌കാരം നിഷേധിച്ചവരേ ചെറുതായുള്ളൂ. കിരീടത്തിലെയും പെരുന്തച്ചനിലെയും ഇരകളിലെയും അഭിനയം ലോകനിലവാരത്തിലുള്ളതായിരുന്നു.

രണ്ടായിരത്തിലുണ്ടായ ശാരീരികപ്രശ്‌നങ്ങള്‍ തിലകന്റെ തുടര്‍ന്നുള്ള അഭിനയജീവിതത്തിനു പരിമിതികള്‍ തീര്‍ത്തു. ആ അവശതകളെ അതിജീവിച്ച തിലകന്റെ മഹാപ്രകടനങ്ങള്‍ നാം ഏകാന്തം മുതല്‍ ഉസ്താദ് ഹോട്ടല്‍ വരെ കണ്ടു. തന്റെ പരാധീനതകളെ മനസ്സിലാക്കാത്ത പ്രസ്താവനകള്‍കൊണ്ട് തിലകന്‍ വിവാദങ്ങള്‍ തീര്‍ത്തപ്പോള്‍ പ്രകോപനം കൊണ്ടവര്‍ തീര്‍ത്ത വിലക്കുകള്‍ നമുക്കും മലയാളസിനിമയ്ക്കും മഹോന്നതമായ ചില സാദ്ധ്യതകള്‍ ഇല്ലാതാക്കി.

ഇരുന്നൂറില്‍പ്പരം സിനിമകളില്‍ അഭിനയിച്ച തിലകന്‍ എത്രയോ എണ്ണം പറഞ്ഞ കഥാപാത്രങ്ങളെ നമുക്കു നല്കി. മുന്തിരിത്തോപ്പുകളിലെ പോള്‍ പൈലോക്കാരനും നാടോടിക്കാറ്റിലെ അനന്തന്‍ നമ്പ്യാരും ഇരകളിലെ അപ്പനും സന്ദേശത്തിലെ കഥാപാത്രവും മുതല്‍ ഇന്ത്യന്‍ റുപ്പിയിലെ അച്യുതമേനോനും ഉസ്താദ് ഹോട്ടലിലെ ജിപ്‌സിയായ കഥാപാത്രവും വരെ.

തിലകനു നടനെന്ന നിലയില്‍ മരണമേയില്ല. ആ മനുഷ്യന്‍ എന്നും വിവാദങ്ങളുടെ കളിക്കൂട്ടുകാരനായിരുന്നു. തിലകനെന്ന വ്യക്തിയെയല്ല, ആ പേരില്‍ അറിയപ്പെട്ട നടനെയാണ് കലാകേരളം വാരിപ്പുണര്‍ന്നത്. ആ പ്രതിഭയ്ക്കു മുന്നില്‍ കൂപ്പുകൈ. ആ ഓര്‍മയ്ക്കുമുന്നില്‍ ശിരോവന്ദനം.

മുഖം

Country:

Default Home Page

Authors:

Anvar Abdullah

ബാബു മൊശായ് - സാത് രംഗ് കേ സപ്നേ...

Feature Desk — Wed, 25 Jul 2012 16:08:27 +0000

ദൂര്‍ദര്‍ശന്‍ അരക്കിട്ടുറപ്പിച്ച ഹിന്ദിപ്രേമത്തെ പുതിയതായി വന്ന സാറ്റ്‌ലൈറ്റ്‌ ചാനലുകളിലൊന്നായ സോണി ടി.വി. കട്ടുകൊണ്ടുപോയ തൊണ്ണൂറുകളിലൊരുദിവസം. ചാനലില്‍ ഹൃഷികേശ്‌ മുഖര്‍ജി ഫെസ്റ്റിവല്‍ നടക്കുന്നു. സിനിമ- ആനന്ദ്‌. രാജേഷ്‌ ഖന്നയെന്ന താരത്തെ പ്രശസ്‌തനാക്കുന്നതില്‍ പങ്കുവഹിച്ച സിനിമയാണിതെന്ന്‌ ഇടത്തരം സിനിമാപ്രേമിയായ അമ്മയുടെ സാക്ഷ്യപത്രവുമുണ്ട്‌.

മുമ്പ്‌ കാണാത്തതല്ലല്ലോ ഈ ഖന്നയെന്നായിരുന്നു ആദ്യചിന്ത. അതിലും പത്തുവര്‍ഷങ്ങള്‍ക്കുമുമ്പ്‌ ദൂര്‍ദര്‍ശന്‍ 'ആരാധന' എന്ന സൂപ്പര്‍ഹിറ്റ്‌ സംപ്രേഷണം ചെയ്‌തപ്പോള്‍ ഒട്ടും ആരാധനയില്ലാതെ കണ്ടിരുന്നിട്ടുണ്ട്‌ ഇദ്ദേഹത്തെ. രംഗോലിയിലും ചിത്രഹാറിലും ശനി, ഞായര്‍ദിനപ്പടങ്ങളിലും സ്ഥിരം മുഖങ്ങളിലൊന്നായിരുന്നു ഇദ്ദേഹവും ഷമ്മി കപൂറും ശശികപൂറും.

[blurb:1:right] ഒരു മുന്‍പരിചയവുമില്ലാത്ത ഒരാളെ നോക്കി മേരീ സപ്‌നോം കീറാണി എന്ന്‌ പാടാനാവുമോ എന്ന്‌ അന്നേ സംശയിച്ചിട്ടുണ്ട്‌. ആശാ പരീഖിന്റെ കൂടെ തേരീ കാരണ്‍ തേരീ കാരണ്‍ എന്നും അച്ഛാ തൊ ഹം ചല്‍തേ ഹേ എന്നുമൊക്കെ പാടിയപ്പോള്‍ അവരുടെ കുസൃതികള്‍ക്കൊത്ത നടനാണല്ലോ എന്ന്‌ കരുതിയിട്ടുണ്ട്‌. ഏ മെരേ ദില്‍ കേചേന്‍ എന്ന്‌ തനുജയെയും പ്യാര്‍ ദിവാനാ ഹോതാ ഹെ എന്ന്‌ ആശാപരീഖിനെയും നോക്കി പ്രേമം നിറഞ്ഞ കണ്ണുകളോടെ രാജേഷ്‌ ഖന്ന പാടിയപ്പോള്‍ ഞാനും അവരുടെ അത്രയും തന്നെ നാണിച്ചിട്ടുണ്ട്‌; എന്റെ കണ്ണില്‍ നിറഞ്ഞ പ്രേമം തൊട്ടടുത്തിരിക്കുന്ന അച്ഛനോ അമ്മയോ തിരിച്ചറിഞ്ഞാലോ എന്ന ചിന്തയില്‍. ഹാഥീ മേരീ സാഥീയില്‍ ചല്‍ ചല്‍ മേരീ ഹാഥീ എന്നു പാടിയപ്പോള്‍ ചിരിച്ചുമറിഞ്ഞിട്ടുണ്ട്‌. നാട്യം ഒരല്‍പ്പം കൂടുതലല്ലേ എന്ന്‌ സംശയം ജനിപ്പിക്കുന്ന മുംതാസിന്റെ കൂടെ ജയ്‌ ജയ്‌ ശിവശങ്കര്‍ എന്ന്‌ തല അല്‍പ്പം ചരിച്ച്‌ കണ്ണുകളിറുക്കി തുള്ളിക്കളിച്ചപ്പോള്‍ ഞാനും കൂടെ കൂടിയിട്ടുണ്ട്‌. ഋഷി കപൂറിന്റെയൊക്കെ കൂടെ അഭിനയിക്കേണ്ട ടീനാ മുനീമിന്റെ (ടീനാ അംബാനി) വീട്ടുമുറ്റത്ത്‌ നിന്ന്‌ മഞ്ഞത്ത്‌ രാപ്പകലില്ലാതെ നഹീ ജീനാ നഹീ ജീനാ തേരേ ബിന്‍ നഹീ ജീനാ എന്നു പാടിയത്‌ ഒരല്‌പം കടന്നുപോയില്ലേയെന്ന്‌ ചിന്തിപ്പിച്ചിട്ടുണ്ട്‌.

എന്നാല്‍ ആനന്ദ്‌ കാണിച്ചു തന്നത്‌ മറ്റൊരു രാജേഷ്‌ ഖന്നയെ ആയിരുന്നു. എല്ലാ കുസൃതികള്‍ക്കുമപ്പുറം ഒരു ശാന്തത. അമിതാഭ്‌ ബച്ചനെ നോക്കി ബാബു മൊശായി (ബാബു മഹാശയ്‌) എന്നു വിളിക്കുമ്പോളും ലളിതാ പവാറിനോട്‌ നിങ്ങള്‍ സിസ്റ്ററല്ല മദറാണ്‌ എന്നു പറയുമ്പോളും മൗനി ബാബയോട്‌ നിങ്ങള്‍ക്കെങ്ങനെ മിണ്ടാതിരിക്കാന്‍ പറ്റുമെന്ന്‌ ആശ്ചര്യപ്പെടുമ്പോളും ആ കുസൃതി കാണാം. എന്നാല്‍ കഹീ ദൂര്‍ പാടുമ്പോള്‍കാണുന്ന ഖന്ന അതിനുമുമ്പ്‌ കണ്ടിട്ടുള്ളതില്‍ നിന്നും വ്യത്യസ്‌തനായിരുന്നു. അവിടെ രാജേഷ്‌ ഖന്നയില്ലായിരുന്നു, ആനന്ദ്‌ മാത്രം. ആ സിനിമാപ്പാട്ടുകളെല്ലാം പാടിയത്‌ അദ്ദേഹത്തിന്‌ ചേരും എന്നറിയപ്പെട്ടിരുന്ന കിഷോര്‍ കുമാറല്ല, മറിച്ച്‌ മുകേഷ്‌ ആയിരുന്നുവെന്നത്‌ രസകരമാണ്‌

തൊട്ടുപുറകേ വന്നു ബാവര്‍ച്ചി എന്ന അടുക്കളക്കാരന്‍. സംഗീതവും നൃത്തവും ഇംഗ്ലീഷും ഫിലോസഫിയും പിന്നെ പാചകവും അറിയുന്ന അടുക്കളക്കാരന്‍ അതിശയോക്തി നിറഞ്ഞ കഥാപാത്രം തന്നെയാണ്‌. എന്നിട്ടും അതിശയോക്തിക്ക്‌ ഇടം കൊടുത്തില്ല രാജേഷ്‌ ഖന്ന. അവിടേയും ഖന്നയില്ല, ബാവര്‍ച്ചി മാത്രം.

എഴുതിയത്‌ രാജേഷ്‌ ഖന്നയല്ലെന്ന്‌ അറിയാം, എങ്കിലും ആനന്ദിലെയും ബാവര്‍ച്ചിയിലെയും ചില സംഭാഷണശകലങ്ങള്‍ ചിന്തിപ്പിക്കന്നതാണ്‌. സിന്ദഗീ ബഡീ ഹോനീ ചാഹിയേ, ലംബീ നഹി (ജീവിതം വലുതാകണം, നീളമുള്ളതല്ല) എന്ന്‌ ആനന്ദ്‌ പറയുമ്പോള്‍ It is so simple to be happy, but so difficult to be simple എന്നാണ്‌ ബാവര്‍ച്ചിയിലെ രാഘവ്‌ എന്ന രഘുവിന്റെ അഭിപ്രായം.

ഗുഡ്ഡിയില്‍ ധര്‍മേന്ദ്രയായിത്തന്നെയാണു ധര്‍മേന്ദ്ര അഭിനയിക്കുന്നത്. ആ സിനിമയിലെ നായികയായെത്തുന്ന ജയ ഭാദുരിക്ക് ധര്‍മേന്ദ്രയോടു പ്രേമമെന്നതാണു സിനിമയുടെ പ്രമേയം. ഇതു് ക്ലൈമാക്സില്‍ മനസ്സിലാക്കുമ്പോള്‍ ധര്‍മേന്ദ്ര ചോദിച്ചുപോകുന്നു, എന്നെയൊക്കെ പെണ്‍കുട്ടികള്‍ക്ക് ഇഷ്ടമാണോ, ഞാന്‍ കരുതിയിരുന്നത് എല്ലാ പെണ്‍കുട്ടികള്‍ക്കും ഇഷ്ടം രാജേഷ് ഖന്നയെയാണെന്നാണ്.

അതായിരുന്നു രാജേഷ് ഖന്ന.

രാജേഷ്‌ ഖന്ന മരിക്കുമ്പോള്‍ ഒരു താരം മരിച്ചാലുള്ള ദുഃഖമല്ല ഉണ്ടാകുന്നത്‌. ഹിന്ദി സിനിമ ദൂര്‍ദര്‍ശനപ്പുറത്തേയ്‌ക്ക്‌ കണ്ടുതുടങ്ങുമ്പോഴേയ്ക്കും അദ്ദേഹം ചിത്രത്തിലില്ലാതായിട്ടുണ്ട്‌. അതിനാല്‍ നികത്താന്‍ പറ്റാത്ത വിടവാണോ മരണം ഉണ്ടാക്കിയതെന്നറിയില്ല. തീയേറ്ററല്ല അദ്ദേഹത്തെ എന്നെപ്പോലെ പലരുടേയും പ്രിയനടനാക്കിയത്‌. ദൂര്‍ദര്‍ശനാണ്‌. അദ്ദേഹത്തെപ്പോലെ ഷമ്മി കപൂര്‍, ശശി കപൂര്‍ എന്നിവരും എന്റെയും ഒരുപക്ഷേ എന്റെ പോലെ ദൂര്‍ദര്‍ശനില്‍ കാഴ്‌ച തുടങ്ങിയ കാണാനുള്ള കൗതുകം മൂലം മാത്രം ശുദ്ധഹിന്ദിയിലുള്ള കൃഷിദര്‍ശന്‍ പോലും കണ്ടുപോരികയും ചെയ്‌തിരുന്ന പലരുടേയും ഓര്‍മ്മകളുടെ ഭാഗമായിരുന്നു. ആ മരണം ആ ഓര്‍മ്മകള്‍ക്കാണ്‌ ആഘാതം ഏല്‍പ്പിച്ചത്‌.

സുജാത

News Quotes

ഏ മെരേ ദില്‍ കേചേന്‍ എന്ന്‌ തനുജയെയും പ്യാര്‍ ദിവാനാ ഹോതാ ഹെ എന്ന്‌ ആശാപരീഖിനെയും നോക്കി പ്രേമം നിറഞ്ഞ കണ്ണുകളോടെ രാജേഷ്‌ ഖന്ന പാടിയപ്പോള്‍ ഞാനും അവരുടെ അത്രയും തന്നെ നാണിച്ചിട്ടുണ്ട്‌; എന്റെ കണ്ണില്‍ നിറഞ്ഞ പ്രേമം തൊട്ടടുത്തിരിക്കുന്ന അച്ഛനോ അമ്മയോ തിരിച്ചറിഞ്ഞാലോ എന്ന ചിന്തയില്‍. ഹാഥീ മേരീ സാഥീയില്‍ ചല്‍ ചല്‍ മേരീ ഹാഥീ എന്നു പാടിയപ്പോള്‍ ചിരിച്ചുമറിഞ്ഞിട്ടുണ്ട്‌. നാട്യം ഒരല്‍പ്പം കൂടുതലല്ലേ എന്ന്‌ സംശയം ജനിപ്പിക്കുന്ന മുംതാസിന്റെ കൂടെ ജയ്‌ ജയ്‌ ശിവശങ്കര്‍ എന്ന്‌ തല അല്‍പ്പം ചരിച്ച്‌ കണ്ണുകളിറുക്കി തുള്ളിക്കളിച്ചപ്പോള്‍ ഞാനും കൂടെ കൂടിയിട്ടുണ്ട്‌.

രാജേഷ് ഖന്ന

മുഖം

Country:

Default Home Page

UK Home Page

Authors:

Feature Desk

ഹനൂമാന്‍ എന്ന ഓര്‍മ

Anvar Abdullah — Fri, 13 Jul 2012 06:11:00 +0000

എംടി വാസുദേവന്‍ നായര്‍ ഒരിക്കല്‍ എഴുതിയിട്ടുണ്ട്. ഇന്ത്യയില്‍ ജനിച്ചുവളരുകയും ഇവിടത്തെ ഇതിഹാസകഥകള്‍ കേട്ടുറങ്ങുകയും ചെയ്യുന്ന കുട്ടികളെ മുഴുവന്‍ വശത്താക്കിയ രണ്ടു കഥാപാത്രങ്ങളേയുള്ളൂ. ഒന്നാമത്തെ ആള്‍ രാമായണത്തിലെ ഹനൂമാന്‍. രണ്ടാമത്തെയാള്‍ മഹാഭാരതത്തിലെ ഭീമസേനന്‍. ഒരുപാടു തിന്നുകയും പോത്തുപോലെ ഉറങ്ങുകയും ആര്‍ക്കോ വേണ്ടി ആളെക്കൊല്ലുകയും ചെയ്യുന്ന പാവത്തുങ്ങളായ രണ്ടു കഥാപാത്രങ്ങള്‍. രണ്ടാളും മാരുതിയുടെ മക്കള്‍.

എംടി വാസുദേവന്‍ എന്ന കുട്ടിക്ക് ഭീമസേനനോടു തോന്നിയ അതിരറ്റ ഇഷ്ടമാണ് പില്‍ക്കാലത്ത് അദ്ദേഹത്തെക്കൊണ്ട് രണ്ടാമൂഴം എഴുതിച്ചത്.

രാമായണകഥ കേട്ടിട്ടുള്ള കുട്ടികള്‍ പില്‍ക്കാലത്ത് മുതിര്‍ന്നു വലിയവരായി. പക്ഷേ, എക്കാലവും ആ ഹനൂമാന്‍പ്രിയം അവരിലുണ്ടായിരിക്കാനാണു സാദ്ധ്യത. മനുഷ്യന്റെ പൂര്‍വജന്മസ്മൃതിയുമായിരിക്കാം അത്തരമൊരു നിഷ്കളങ്കമര്‍ക്കടനോടുള്ള പ്രിയം.

ഇങ്ങനെയൊക്കെയുള്ള ഹനൂമാന്‍ എന്ന കഥാപാത്രത്തെ എണ്‍പതുകള്‍ക്കുശേഷം വെറും ശിവകാശി കലണ്ടര്‍ പടത്തിനും അമര്‍ചിത്രകഥാവരകള്‍ക്കും അപ്പുറമൊരു ചലിക്കുന്ന, സംസാരിക്കുന്ന ഓര്‍മയാക്കി മാറ്റിയത് ദാരാസിംഗാണ്. രാമാനന്ദസാഗറിന്റെ രാമായണം പരമ്പരയിലൂടെ ഹനൂമാനായി രംഗത്തെത്തി നാളുകളോളം അന്നത്തെ കുട്ടികളുടെ പ്രിയതോഴനായി നിന്ന ദാരാസിംഗ്. അതിനും ഒന്നരപ്പതിറ്റാണ്ടു മുന്‍പ് ഹിന്ദിയിലിറങ്ങിയ ബജ്റംഗ് ബലി എന്ന സിനിമയില്‍ ഹനൂമാനായതും ദാരാസിംഗ് ആയിരുന്നു.

ആ പരമ്പര അതിന്റെ ഗുണനിലവാരം കൊണ്ട് താഴേക്കിടയിലുള്ളതായിരുന്നെന്ന് ഇന്നു നമുക്കു വ്യക്തമായി അറിയാം. അതുതന്നെയല്ല, ഹനൂമാന്റെയും മറ്റു കുരുങ്ങുവേഷക്കാരുടെയും വേഷവിധാനമവും മേക്കപ്പുമൊക്കെ പരിതാപകരമാംവണ്ണം ഭീകരമായിരുന്നുവെന്നും. എല്ലാ കുഴപ്പങ്ങള്‍ക്കുമപ്പുറം ദാരാസിംഗിന്റെ ഹനൂമാന്‍ ഒരു കഥാപാത്രമെന്നതിലപ്പുറം പില്‍ക്കാലസമൂഹത്തിന്റെ ഓര്‍മയില്‍ ഒരു നൊസ്റ്റാള്‍ജിയയായി നില്‍ക്കുക തന്നെ ചെയ്യുന്നു.

മഹാഭാരതം സീരിയലായിത്തീര്‍ന്നപ്പോള്‍ അതിലെ ഭീമസേനനെ അവതരിപ്പിച്ച നടന്‍ സങ്കല്പങ്ങള്‍ക്കൊത്തുയരാതിരുന്നത് ആ സീരിയലിനെ പ്രതികൂലമായി ബാധിച്ചിട്ടുണ്ട്. പകരം കര്‍ണനായെത്തിയ പങ്കജ് ധീറും ദുര്യോധനനായെത്തിയ പുനീത് ഇസ്സാറുമാണ് പിടിച്ചുനിന്നത്.

മഹാഭാരതത്തില്‍ ഒരു രംഗമുണ്ട്. കല്യാണസൌഗന്ധികം പറിക്കാന്‍ പോകുന്ന ഭീമന്‍ ഹനൂമാനെ കണ്ടുമുട്ടുന്നത്. കുഞ്ചന്‍ നമ്പ്യാരെ നോക്കെടാ നമ്മുടെ മാര്‍ഗേ കിടക്കുന്ന മര്‍ക്കടാ നീയങ്ങു മാറിക്കിട ശെടാ! എന്നു പറയിക്കാന്‍ പോന്ന നാടകീയരംഗം. ഇതു സീരിയലില്‍ ആവര്‍ത്തിച്ചപ്പോള്‍, രാമായണത്തില്‍നിന്നു ദാരാസിംഗ് തന്നെവന്നു മഹാഭാരതം സീരിയലില്‍ ഹനൂമാനാകാന്‍. അങ്ങനെ രാമായണത്തിലും മഹാഭാരതത്തിലും അഭിനയിച്ച നടനുമായി അദ്ദേഹം.

അറുപതുകളില്‍ ലോകഗുസ്തിചാംപ്യനായതോടെ പ്രശസ്തിയിലേക്കു നടന്നുകയറിയ ദാരാസിംഗ് പില്‍ക്കാലത്ത് ഇടവേളകളിലൂടെയാണെങ്കിലും ബോളിവുഡില്‍ ചുവടുറപ്പിച്ചിരുന്നു. മഹാനായ അലക്സാണ്ടറോട് ഇടഞ്ഞ് ഇന്ത്യന്‍ പ്രതാപത്തിന്റെ കൊടിക്കൂറയുയര്‍ത്തിയ പോറസിന്റെ കഥ പറഞ്ഞ പഴയകാല ബോളിവുഡ് ചിത്രത്തില്‍ ഇന്ത്യന്‍ ഷോ ബിസിനസിന്റെ പ്രാരംഭമുഖമായ പൃഥ്വിരാജ് ചൌഹാന്‍ പോറസായപ്പോള്‍ അലക്സാണ്ടറായെത്തിയത് ദാരാസിംഗാണ്. ഇന്ന്, പുതുകാലസിനിമയുടെ, ബോളിവുഡ് ജനപ്രിയനവതരംഗത്തിന്റെ തുടക്കചിത്രങ്ങളിലൊന്നായ ജെബ് വീ മെറ്റ് വരെ അദ്ദേഹത്തിന്റെ അഭിനയമുഖങ്ങള്‍ വ്യാപിച്ചുകിടക്കുന്നു.

മലയാളികള്‍ക്കും ദാരാസിംഗ് ഒരു പ്രിയസ്മരണയാണ്. സിബി മലയിലിന്റെ ആദ്യചിത്രമായ മുത്താരംകുന്നു പിഒയില്‍ ഗുസ്തി ചാംപ്യന്‍ ധാരാസിംഗായിത്തന്നെ അദ്ദേഹം അവതരിച്ചു. പില്‍ക്കാലത്ത് ബോളിവുഡിന്റെ അവിഭാജ്യഘടകമായിത്തീര്‍ന്ന പ്രിയദര്‍ശനും ആ ചിത്രത്തിന്റെ പിന്നണിയിലുണ്ടായിരുന്നു. എന്നാല്‍, അന്ന് ദാരാസിംഗിനോടു സംസാരിക്കാന്‍ നിയുക്തനായിരുന്നത് ഹിന്ദിയില്‍ അത്യാവശ്യം പ്രാവീണ്യമുണ്ടായിരുന്ന, ആ ചിത്രത്തിന്റെ കഥാകൃത്തു കൂടിയായ, നടന്‍ ജഗദീഷായിരുന്നു.

വളരെ സൌമനസ്യത്തോടെ ആ വേഷം കെട്ടാന്‍ അദ്ദേഹം തയ്യാറായി. ഈയിടെ ഈ ചിത്രം കുസ്തി എന്ന പേരില്‍ ബോളിവുഡിലുമെത്തിയെന്നത് കൌതുകമുള്ള കഥ. ഹിന്ദിയില്‍ പ്രിയദര്‍ശന്റെ മുഖ്യസഹായിയായി പ്രവര്‍ത്തിക്കുന്ന സംവിധായകന്‍ ടി കെ രാജീവ് കുമാറാണ് ചിത്രം ഹിന്ദിയിലെത്തിച്ചത്. പ്രിയനായിരുന്നു രാജീവിനോട് ഈ ചിത്രം നിര്‍ദേശിച്ചത്.

അങ്ങനെ ഹനൂമാന്‍ കടന്നുപോകുകയാണ്. ഹനൂവില്‍ ഇന്ദ്രനേല്പിച്ച മുറിവുമായി വീണുപോയ ബാലഹനൂമാനെയുമെടുത്ത് വായുദേവന്‍ ഒരു ഗുഹയിലൊളിച്ച കഥയുണ്ട്. ലോകം പ്രാണവായു കിട്ടാതെ പിടഞ്ഞപ്പോള്‍ ദേവകളെല്ലാം ചെന്ന് പ്രാര്‍ത്ഥിച്ചും ഹനൂമാന് ചിരജ്ഞീവിത്വം നല്കിയുമാണ് വായുദേവനെ സമാധാനിപ്പിച്ചത്. ചിരജ്ഞീവിയാണു ഹനൂമാന്‍. പക്ഷേ, ധാരാസിംഗ് അങ്ങനെയല്ല. മനുഷ്യന്റെ ഓര്‍മയെന്ന പ്രാണവായുവായിരിക്കാം ഹനൂമാന്‍ എന്ന ചിരജ്ഞീവിത്വം. അങ്ങനെ നോക്കിയില്‍ ഈ ഹനൂമാന്‍ അങ്കിളിന്റെ ഓര്‍മയ്ക്കും നേട്ടം അതിന്റെ ചിരഞ്ജീവിത്വം തന്നെ.

ശ്യാം നരേന്ദ്രന്‍

ഹനൂമാനായി ധാരാസിങ്

മുഖം

Country:

Default Home Page

UK Home Page

Authors:

S Narendran